୨୭ ସେକେଣ୍ଡରେ ୮ ଥର କଚାଡ଼ି ମାରିଥିଲା ଶିଶୁକୁ, ୪୦ ଦିନରେ ଅଭିଯୁକ୍ତକୁ ମୃତ୍ୟୁଦଣ୍ଡ ଶୁଣାଇଲେ କୋର୍ଟ
ନୂଆଦିଲ୍ଲୀ: ଉତ୍ତର ପ୍ରଦେଶର ଫିରୋଜାବାଦରେ ଦେଢ଼ ବର୍ଷର ଶିଶୁ ଆରଭଙ୍କୁ ନିର୍ମମ ଭାବେ ହତ୍ୟା କରିଥିବା ଅଭିଯୁକ୍ତ ବିରାଜଙ୍କୁ କୋର୍ଟ ମୃତ୍ୟୁଦଣ୍ଡରେ ଦଣ୍ଡିତ କରିଛନ୍ତି | ଘଟଣାର ମାତ୍ର ୪୦ ଦିନ ମଧ୍ୟରେ ରାୟ ଘୋଷଣା ହୋଇଥିବା ବେଳେ ଏହାକୁ ଏକ ତ୍ୱରିତ ବିଚାରର ଉଦାହରଣ ବୋଲି କୁହାଯାଉଛି। ଗୁରୁବାର ଅଭିଯୁକ୍ତ ଦୋଷୀ ସାବ୍ୟସ୍ତ ହୋଇଥିବା ବେଳେ ଶୁକ୍ରବାର କୋର୍ଟ ତାଙ୍କୁ ଫାଶୀ ଦଣ୍ଡାଦେଶ ଶୁଣାଇଥିଲେ। ରାୟ ଶୁଣିବା ପରେ ଅଭିଯୁକ୍ତ ଅଦାଲତରେ କାନ୍ଦି ପକାଇଥିଲେ।
ସୂଚନା ଅନୁସାରେ, ଗତ ମେ ୩୦ ତାରିଖରେ ଫିରୋଜାବାଦର ଶିକୋହାବାଦ ଅଞ୍ଚଳର ଯାଦବ କଲୋନୀରେ ଏହି ଜଘନ୍ୟ ଘଟଣା ଘଟିଥିଲା। ଅଭିଯୁକ୍ତ ବିରାଜ ଶିଶୁ ଆରଭକୁ ଚକଲେଟ୍ ଦେବା ବାହାନାରେ ଘରୁ ବାହାରକୁ ନେଇଥିଲା। ପରେ ଘରଠାରୁ ପ୍ରାୟ ୫୦ ମିଟର ଦୂରରେ ଏକ ନିଛାଟିଆ ସ୍ଥାନରେ ମାତ୍ର ୨୭ ସେକେଣ୍ଡ ମଧ୍ୟରେ ଶିଶୁଟିକୁ ୮ ଥର ତଳେ କଚାଡ଼ି ପିଟି ହତ୍ୟା କରିଥିଲା। ଏହାପରେ ଶବକୁ ଘର ସମ୍ମୁଖରେ ଛାଡ଼ି ଫେରାର ହୋଇଯାଇଥିଲା। ସ୍ଥାନୀୟ ସିସିଟିଭି କ୍ୟାମେରାରେ ସମ୍ପୂର୍ଣ୍ଣ ଘଟଣା ରେକର୍ଡ ହୋଇଥିଲା, ଯାହା ତଦନ୍ତରେ ଗୁରୁତ୍ୱପୂର୍ଣ୍ଣ ପ୍ରମାଣ ସାବ୍ୟସ୍ତ ହୋଇଥିଲା।
ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ବିରାଜ ଦାବି କରିଥିଲା ଯେ ଶିଶୁର ମା’ଙ୍କ ସହ ତାଙ୍କର ପ୍ରେମ ସମ୍ପର୍କ ଥିଲା ଏବଂ ବିବାହ ପ୍ରସ୍ତାବ ପ୍ରତ୍ୟାଖ୍ୟାନ ହେବା ପରେ ସେ ପ୍ରତିଶୋଧ ନେବା ପାଇଁ ଏହି ଅପରାଧ ଘଟାଇଥିଲା। ଘଟଣା ପରେ ପୋଲିସ ତାଙ୍କୁ ଏନକାଉଣ୍ଟର ସମୟରେ ଗିରଫ କରିଥିଲା। ତଦନ୍ତକାରୀ ଅଧିକାରୀ ମାତ୍ର ଛଅ ଦିନ ମଧ୍ୟରେ ଚାର୍ଜସିଟ୍ ଦାଖଲ କରିଥିବା ବେଳେ ଜୁନ୍ ୧୫ରୁ ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା। ସମସ୍ତ ପ୍ରମାଣ ଓ ସାକ୍ଷୀଙ୍କ ବୟାନ ଆଧାରରେ କୋର୍ଟ ଏହାକୁ ‘ବିରଳରୁ ବିରଳତମ’ ଜଘନ୍ୟ ଅପରାଧ ଭାବେ ବିବେଚନା କରି ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ପ୍ରଦାନ କରିଛନ୍ତି।
