କରୁର ଉପନିର୍ବାଚନ ପୂର୍ବରୁ ବିଜୟଙ୍କ ରଣ ହୁଙ୍କାର! ଦୁର୍ନୀତି ଓ ଷ୍ଟାମ୍ପିଡ୍ ପ୍ରସଙ୍ଗ ଉଠାଇ ବିରୋଧୀ DMK ଉପରେ ବର୍ଷିଲେ
ତାମିଲନାଡୁରେ ଆଗାମୀ ସାତଟି ବିଧାନସଭା ଆସନର ଉପନିର୍ବାଚନକୁ ନେଇ ରାଜ୍ୟ ରାଜନୀତି ସରଗରମ ରହିଛି । ଏହାରି ମଧ୍ୟରେ ମୁଖ୍ୟମନ୍ତ୍ରୀ ତଥା ଟିଭିକେ (TVK) ମୁଖ୍ୟ ସି. ଜୋସେଫ ବିଜୟ କରୁରରେ ଜୋରଦାର ପ୍ରଚାର ଆରମ୍ଭ କରି ବିରୋଧୀ DMKକୁ କଡ଼ା ଭାଷାରେ ସମାଲୋଚନା କରିଛନ୍ତି। ଗତବର୍ଷ ଟିଭିକେର କରୁର ରାଲିରେ ଘଟିଥିବା ଷ୍ଟାମ୍ପିଡ୍ରେ ୪୧ ଜଣଙ୍କ ମୃତ୍ୟୁ ପରେ ମୁଖ୍ୟମନ୍ତ୍ରୀ ଭାବେ ଏହା ଥିଲା ତାଙ୍କର ପ୍ରଥମ କରୁର ଗସ୍ତ।
ନିଜ ଭାଷଣରେ ବିଜୟ କହିଥିଲେ, କରୁର ଷ୍ଟାମ୍ପିଡ୍ ତାଙ୍କ ଜୀବନର ସବୁଠାରୁ ବଡ଼ ଦୁଃଖଦ ଘଟଣା। ସେ ଅଭିଯୋଗ କରିଥିଲେ ଯେ, ସେତେବେଳର DMK ସରକାର ଚାହିଁଥିଲେ ରାଲିକୁ ବନ୍ଦ କରିପାରିଥାନ୍ତା, କିନ୍ତୁ ତାହା କରାଯାଇନଥିଲା। ଏହି ଘଟଣା ପାଇଁ କିଏ ଦାୟୀ ତାହାର ଜବାବ ଲୋକଙ୍କୁ ମିଳିବା ଉଚିତ୍ ବୋଲି ସେ କହିଥିଲେ। ଏହାସହ ଉପନିର୍ବାଚନରେ DMKକୁ କଡ଼ା ଜବାବ ଦେବାକୁ ଭୋଟରଙ୍କୁ ଆହ୍ୱାନ କରିଥିଲେ।
ମୁଖ୍ୟମନ୍ତ୍ରୀ ବିଜୟ DMK ଉପରେ ଦୁର୍ନୀତି, କ୍ଷମତାର ଦୁରୁପଯୋଗ ଓ ‘ହର୍ସ ଟ୍ରେଡିଂ’ ଭଳି ସଙ୍ଗୀନ ଅଭିଯୋଗ ଆଣିଛନ୍ତି । ସେ କହିଛନ୍ତି , ତାଙ୍କ ସରକାର ଅନେକ ଅନିୟମିତ ଟେଣ୍ଡର ବାତିଲ କରିଛି ଏବଂ ଦୁର୍ନୀତି ବିରୋଧରେ କଠୋର ପଦକ୍ଷେପ ନେଉଛି। ଅନ୍ୟପକ୍ଷରେ ବିରୋଧୀ DMK ବିଜୟଙ୍କ ସମସ୍ତ ଅଭିଯୋଗକୁ ଖଣ୍ଡନ କରି କହିଛି ଯେ, ତାଙ୍କର କରୁର ଗସ୍ତ କେବଳ ଉପନିର୍ବାଚନକୁ ଆଖିଆଗରେ ରଖି କରାଯାଇଛି। ଗତବର୍ଷର ଷ୍ଟାମ୍ପିଡ୍ ଘଟଣାର ତଦନ୍ତ ବର୍ତ୍ତମାନ ସିବିଆଇ କରୁଛି।
ସୂଚନା ଯୋଗ୍ୟ, ବିଧାନସଭା ନିର୍ବାଚନର କିଛି ସପ୍ତାହ ମଧ୍ୟରେ ଶାସକ ଟିଭିକେକୁ ପରିବର୍ତ୍ତନ କରିବା ପରେ କରୁରରୁ ପୂର୍ବତନ ମନ୍ତ୍ରୀ ଏମଆର ବିଜୟଭାସ୍କରଙ୍କ ସମେତ ଛଅ ଜଣ ଏଆଇଏଡିଏମକେ ବିଧାୟକଙ୍କ ଇସ୍ତଫା ଯୋଗୁଁ ଏହି ସମସ୍ତ ଆସନ ଖାଲି ରହିଛି | ତେଣୁ ଏହି ଉପନିର୍ବାଚନ ଶୀଘ୍ର ଘୋଷଣା ହୋଇପାରେ ବୋଲି ଅନୁମାନ କରାଯାଉଛି । ବିଜୟ ଯେଉଁ ଦୁଇଟି ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିଲେ ସେଥିମଧ୍ୟରୁ ଗୋଟିଏରୁ ଇସ୍ତଫା ଦେବା ପରେ ସପ୍ତମ ଆସନ ଖାଲି ମଧ୍ୟ ଖାଲି ପଡିଛି | ତେବେ ସାତଟି ବିଧାନସଭା ଆସନରେ ହେବାକୁ ଥିବା ଉପନିର୍ବାଚନ ଟିଭିକେ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଧରାଯାଉଛି। କାରଣ ଏହି ଆସନଗୁଡ଼ିକରେ ବିଜୟଙ୍କ ଦଳ ବିଜୟୀ ହେଲେ ବିଧାନସଭାରେ ଦଳର ସ୍ଥିତି ଆହୁରି ମଜବୁତ ହେବ।
