‘ଇଭିଲ୍ ଆଇ’ ବ୍ରେସଲେଟ୍ ନା କଳା ସୂତା? କେଉଁଟି ଅଧିକ ପ୍ରଭାବଶାଳୀ, କଣ କହେ ବିଶ୍ୱାସ ଓ ବିଜ୍ଞାନ
ଖରାପ ନଜର କିମ୍ବା ନେଗେଟିଭ୍ ଏନର୍ଜିରୁ ସୁରକ୍ଷା ପାଇବା ପାଇଁ ଅନେକ ଲୋକ ହାତ କିମ୍ବା ଗୋଡ଼ରେ କଳା ସୂତା ବାନ୍ଧୁଥିବା ବେଳେ, ଆଉ କେତେକ ‘ଇଭିଲ୍ ଆଇ’ ବ୍ରେସଲେଟ୍ ପିନ୍ଧୁଛନ୍ତି। ଭାରତୀୟ ପରମ୍ପରାରେ କଳା ସୂତାକୁ ଅଶୁଭ ଦୃଷ୍ଟିରୁ ସୁରକ୍ଷାର ପ୍ରତୀକ ବୋଲି ମାନାଯାଏ। ଅନ୍ୟପକ୍ଷରେ, ନୀଳ ଆଖି ଆକୃତିର ‘ଇଭିଲ୍ ଆଇ’ ପ୍ରତୀକ ମଧ୍ୟପୂର୍ବ ଓ ମେଡିଟେରେନିୟନ୍ ଅଞ୍ଚଳର ପୁରାତନ ବିଶ୍ୱାସ ସହ ଜଡ଼ିତ, ଯାହାକୁ ଇର୍ଷ୍ୟା ଓ ଖରାପ ନଜରରୁ ସୁରକ୍ଷାର ପ୍ରତୀକ ଭାବେ ଦେଖାଯାଏ। ବର୍ତ୍ତମାନ ଏହା ଫ୍ୟାଶନ୍ ଆକ୍ସେସରି ଭାବେ ମଧ୍ୟ ବେଶ୍ ଲୋକପ୍ରିୟ।
କଳା ସୂତା ସରଳ, କମ୍ ଖର୍ଚ୍ଚସାପେକ୍ଷ ଏବଂ ପାରମ୍ପରିକ ଆସ୍ଥା ସହ ଜଡ଼ିତ ଥିବାବେଳେ, ‘ଇଭିଲ୍ ଆଇ’ ବ୍ରେସଲେଟ୍ ପରମ୍ପରା ସହ ଆଧୁନିକ ଷ୍ଟାଇଲ୍ର ମିଶ୍ରଣ ବୋଲି ଧରାଯାଏ। ଉଭୟର ଉଦ୍ଦେଶ୍ୟ ଏକା—ଖରାପ ନଜରରୁ ସୁରକ୍ଷା। ତେବେ ବୈଜ୍ଞାନିକ ଭାବେ ଏହି ଦୁଇଟି ମଧ୍ୟରୁ କୌଣସିଟି ଖରାପ ନଜର କିମ୍ବା ନେଗେଟିଭ୍ ଏନର୍ଜିରୁ ସୁରକ୍ଷା ଦେଇଥାଏ ବୋଲି ପ୍ରମାଣିତ ହୋଇନାହିଁ।
ବିଶେଷଜ୍ଞଙ୍କ ମତରେ, କଳା ସୂତା ହେଉ କି ‘ଇଭିଲ୍ ଆଇ’ ବ୍ରେସଲେଟ୍—ଏହାର ପ୍ରଭାବ ମୁଖ୍ୟତଃ ବ୍ୟକ୍ତିଗତ ଆସ୍ଥା ଓ ସାଂସ୍କୃତିକ ବିଶ୍ୱାସ ଉପରେ ନିର୍ଭର କରେ। ତେଣୁ କେଉଁଟି ପିନ୍ଧିବେ, ତାହା ଆପଣଙ୍କ ବିଶ୍ୱାସ, ପସନ୍ଦ ଓ ଜୀବନଶୈଳୀ ଅନୁଯାୟୀ ନିଷ୍ପତ୍ତି ନେବା ଉଚିତ୍।
