ଶ୍ରୀଲଙ୍କା; ନିମ୍ନମାନର ଭାରତୀୟ ଆଖି ଔଷଧ ବ୍ୟବହାର କରି ୩୦ରୁ ଅଧିକ ବ୍ୟକ୍ତିଙ୍କ ଆଖିରେ ସଂକ୍ରମଣ
ନୂଆଦିଲ୍ଲୀ: ଆଉ ଏକ ଭାରତୀୟ ଔଷଧ କମ୍ପାନୀ ଉପରେ ଆସିଲା ସାଂଘାତିକ ଅଭିଯୋଗ। ନିମ୍ନମାନର ଔଷଧ ପ୍ରସ୍ତୁତ କରୁଥିବା ଅଭିଯୋଗ ହୋଇଛି। ଗୁଜରାଟର ଏକ କମ୍ପାନୀ ଉପରେ ଶ୍ରୀଲଙ୍କା ସରକାର ଏହି ଅଭିଯୋଗ ଆଣିଛନ୍ତି। ଅଭିଯୋଗ ଅନୁଯାୟୀ ଇଣ୍ଡିଆନା ଅପଥୋମ୍ଲିକ୍ସ କମ୍ପାନୀ ପକ୍ଷରୁ ପଠାଯାଉଥିବା ଆଖି ଡ୍ରପ୍ କାରଣରୁ ୩୦ରୁ ଅଧିକ ଜଣଙ୍କ ଆଖିରେ ସଂକ୍ରମଣ ହୋଇଛି ।
ଇଣ୍ଡିଆନା ଚକ୍ଷୁ ଅପଥୋମ୍ଲିକ୍ସ ଉପରେ ଗୁରୁତର ଅଭିଯୋଗ କରିବା ପରେ ଭାରତର ଆପେକ୍ସ ଫାର୍ମାସ୍ୟୁଟିକାଲ୍ସ ରପ୍ତାନି ପରିଷଦ କମ୍ପାନୀକୁ ଏକ ନୋଟିସ ପଠାଇଛି। ଯେଉଁଥିରେ ଦୁଇ ଦିନ ମଧ୍ୟରେ ଆଭ୍ୟନ୍ତରୀଣ ତଦନ୍ତ ସମ୍ପର୍କରେ ସ୍ପଷ୍ଟ କରିବାକୁ କମ୍ପାନୀକୁ କୁହାଯାଇଛି।
ବାଣିଜ୍ୟ ଏବଂ ଶିଳ୍ପ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଥିବା ଫାର୍ମେକ୍ସିଲ୍ ନାମକ ଏକ ଏଜେନ୍ସି ଗୁରୁବାର ଦିନ ଇଣ୍ଡିଆନା ଅପଥୋମ୍ଲିକ୍ସ କମ୍ପାନୀକୁ ଏକ କାରଣ ଦର୍ଶାଅ ନୋଟିସ୍ ପଠାଇଛି। ଅନ୍ୟପକ୍ଷରେ, କମ୍ପାନୀ ଦ୍ବାରା ଉତ୍ପାଦିତ ମିଥାଇଲପ୍ରେଡନିସୋଲୋନ୍ ଆଇ ଡ୍ରପ୍ସର ଗୁଣବତ୍ତା ସମ୍ପର୍କରେ କେନ୍ଦ୍ରୀୟ ଡ୍ରଗ୍ ଷ୍ଟାଣ୍ଡାର୍ଡ କଣ୍ଟ୍ରୋଲ୍ ଅର୍ଗାନାଇଜେସନ୍ ମଧ୍ୟ ଅନୁସନ୍ଧାନ ଆରମ୍ଭ କରିଛି।
