Hanuman Ansh Controversy: ୪୫୨ କୋଟିର ସଫଳତା ପରେ ‘ହନୁମାନ ଅଂଶ’ ଫିଲ୍ମ ଟିମ୍ରେ ମତଭେଦ! ପ୍ରମୋସନ୍ ଓ ଅଧିକାରକୁ ନେଇ ବିବାଦ
ମୁମ୍ବାଇ: ନୀମ କରୋଲି ବାବାଙ୍କ ଜୀବନ ଉପରେ ଆଧାରିତ ଫିଲ୍ମ ‘ହନୁମାନ ଅଂଶ’ ବକ୍ସ ଅଫିସ୍ରେ ବଡ଼ ସଫଳତା ପାଇବା ପରେ ଏବେ ଏହାର ନିର୍ମାତା ଓ ଟିମ୍ ମଧ୍ୟରେ ମତଭେଦକୁ ନେଇ ଚର୍ଚ୍ଚା ହେଉଛି। ରିପୋର୍ଟ ଅନୁସାରେ, ପ୍ରମୋସନ୍ ସମୟରେ ଜଣେ ନିର୍ମାତାଙ୍କୁ ଅଧିକ ଗୁରୁତ୍ୱ ମିଳୁଥିବା ନେଇ ଟିମ୍ର କିଛି ସଦସ୍ୟଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ଫିଲ୍ମଟି ପ୍ରାୟ ୨ କୋଟି ଟଙ୍କା ବଜେଟ୍ରେ ତିଆରି ହୋଇ ବିଶ୍ୱବ୍ୟାପୀ ୪୫୨.୮୬ କୋଟି ଟଙ୍କା ଆୟ କରିଥିବା Sacnilkର ତଥ୍ୟକୁ ଉଦ୍ଧୃତ କରି ରିପୋର୍ଟ ପ୍ରକାଶ ପାଇଛି।
ଫିଲ୍ମର ନିର୍ଦ୍ଦେଶକ ଡା. ବିଶାଳ ଚତୁର୍ବେଦୀ ଏବଂ ନିର୍ମାତା ନମ୍ରତା ଜି. ସିଂହ, ରାଗିନୀ ସୋନା ଓ ଅନୁପ୍ରିୟା ନାଗରଙ୍କ ମଧ୍ୟରେ ମତଭେଦ ଥିବା ନେଇ ଖବର ଆସିଛି। ଏହି ପରିସ୍ଥିତି ମଧ୍ୟରେ ସ୍ୱମ୍ଭୁ ମିଡିଆ ନେଟୱର୍କ ପକ୍ଷରୁ ଏକ ଅଧିକୃତ ବିବୃତି ଜାରି କରାଯାଇଛି। ଏଥିରେ ନମ୍ରତା ସିଂହ ଓ ଡା. ବିଶାଳ ଚତୁର୍ବେଦୀଙ୍କୁ କମ୍ପାନୀର ଏକ୍ଜିକ୍ୟୁଟିଭ୍ ଡାଇରେକ୍ଟର ଭାବେ ଘୋଷଣା କରିବା ସହ ଫିଲ୍ମର PR, ମାର୍କେଟିଂ, ପୁରସ୍କାର ଓ ସହଯୋଗ ସମ୍ପର୍କିତ କାର୍ଯ୍ୟ ସେମାନଙ୍କ ଅଧୀନରେ ରହିବ ବୋଲି କୁହାଯାଇଛି।
ତେବେ ଫିଲ୍ମର ସମସ୍ତ ଅଧିକାର ଚାରି ନିର୍ମାତାଙ୍କ ମଧ୍ୟରେ ମିଳିତ ଭାବେ ରହିଥିବା ଏବଂ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ପାଇଁ ସମସ୍ତଙ୍କ ସମ୍ମତି ଆବଶ୍ୟକ ବୋଲି ବିବୃତିରେ ସ୍ପଷ୍ଟ କରାଯାଇଛି। ଫିଲ୍ମର ନାଁରେ କୌଣସି ବ୍ୟକ୍ତି ଏକାକୀ ଅଧିକାର କିମ୍ବା ବ୍ୟବସାୟିକ ନିଷ୍ପତ୍ତି ନେଇପାରିବେ ନାହିଁ। ଏହା ସହ ଫିଲ୍ମ ସମ୍ପର୍କରେ ସାର୍ବଜନୀନ ମତ ରଖିବା କିମ୍ବା କାର୍ଯ୍ୟକ୍ରମରେ ପ୍ରତିନିଧିତ୍ୱ କରିବା ପୂର୍ବରୁ ଅଧିକୃତ ଟିମ୍ର ଅନୁମତି ନେବାକୁ କଳାକାର ଓ କ୍ରୁ ସଦସ୍ୟଙ୍କୁ କୁହାଯାଇଛି। ଏହି ମତଭେଦ ଯୋଗୁଁ ‘ହନୁମାନ ଅଂଶ ୨’ର ଭବିଷ୍ୟତ ନେଇ ମଧ୍ୟ ଅନିଶ୍ଚିତତା ରହିଛି।
