FD Rules 2026: ଅକ୍ଟୋବର ୧ରୁ ବଦଳିବ Fixed Deposit ନିୟମ, ଜାଣନ୍ତୁ କ’ଣ ରହିବ ନୂଆ ବ୍ୟବସ୍ଥା
ଅକ୍ଟୋବର ୧, ୨୦୨୬ରୁ ବ୍ୟାଙ୍କର Fixed Deposit (FD) ନିୟମରେ କିଛି ବଡ଼ ପରିବର୍ତ୍ତନ ଲାଗୁ ହେବ। ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (RBI) ବ୍ୟାଙ୍କ ଜମା ଉପରେ ସୁଧ ହାର ସମ୍ପର୍କିତ ନୂଆ ନିୟମ ଆଣିଛି। ଏହା ଅଧୀନରେ ବଡ଼ ଜମା ବା Bulk Deposit ପାଇଁ ଅଧିକ ସ୍ୱଚ୍ଛତା ଆଣିବା ସହ ବ୍ୟାଙ୍କଗୁଡ଼ିକର ବିଭିନ୍ନ ଶାଖାରେ ସମାନ ତାରିଖରେ ଗ୍ରହଣ କରାଯାଇଥିବା ସମାନ ରାଶିର ଜମା ପାଇଁ ସମାନ ସୁଧ ହାର ଦେବାକୁ ନିର୍ଦ୍ଦେଶ ଦିଆଯାଇଛି। ଏଠାରେ Bulk Deposit କହିଲେ ୩ କୋଟି ଟଙ୍କା କିମ୍ବା ତାଠାରୁ ଅଧିକ ମୂଲ୍ୟର ଏକକ Term Depositକୁ ବୁଝାଯାଉଛି।
ନୂଆ ନିୟମ ଅନୁସାରେ ବ୍ୟାଙ୍କଗୁଡ଼ିକୁ ଜମା ଉପରେ ଦେବାକୁ ଥିବା ସୁଧ ହାର ନିଜ ୱେବସାଇଟରେ ଆଗୁଆ ଭାବେ ପ୍ରକାଶ କରିବାକୁ ପଡ଼ିବ। ବିଶେଷକରି Bulk Deposit ଉପରେ ସୁଧ ହାର ପ୍ରତ୍ୟେକ କାର୍ଯ୍ୟଦିବସରେ ସକାଳ ୧୦ଟାରେ ପ୍ରକାଶ କରିବାକୁ ହେବ ଏବଂ ସର୍ବାଧିକ ୧୦ ମିନିଟ୍ର ଗ୍ରେସ୍ ପିରିୟଡ୍ ସହିତ ୧୦ଟା ୧୦ ମିନିଟ୍ ସୁଦ୍ଧା ଏହା ପ୍ରକାଶିତ ହୋଇଥିବା ଆବଶ୍ୟକ। ଏହାସହ ସମାନ ଦିନରେ ସମାନ ରାଶିର ଜମା ଗ୍ରହଣ କରାଯାଇଥିଲେ, ବ୍ୟାଙ୍କର ଭିନ୍ନ ଶାଖାରେ ମଧ୍ୟ ସମାନ ସୁଧ ହାର ଲାଗୁ କରିବାକୁ ହେବ। ତେବେ ୩ କୋଟି ଟଙ୍କାରୁ କମ୍ ଅର୍ଥାତ୍ ସାଧାରଣ ଖୁଚୁରା FD ନିବେଶକାରୀଙ୍କ ଉପରେ ଏହି ପରିବର୍ତ୍ତନର ସିଧାସଳଖ ପ୍ରଭାବ ସୀମିତ ରହିବ।
ନୂଆ ନିୟମରେ ବ୍ୟାଙ୍କଗୁଡ଼ିକୁ Bulk Deposit ପାଇଁ ଭିନ୍ନ ସୁଧ ହାର ଦେବାର ସୁବିଧା ମଧ୍ୟ ମିଳିବ। ଜମାର ଆକାର ଓ Liquidity Coverage Ratio (LCR) ଅଧୀନରେ ଲାଗୁ ହେଉଥିବା ଝୁମ୍ପକୁ ବିଚାର କରି ବ୍ୟାଙ୍କ ଏହି ସୁଧ ହାର ନିର୍ଦ୍ଧାରଣ କରିପାରିବ। RBIର ଏହି ପରିବର୍ତ୍ତନର ମୁଖ୍ୟ ଲକ୍ଷ୍ୟ ହେଉଛି ବଡ଼ ଜମା ଉପରେ ସୁଧ ହାର ସମ୍ପର୍କିତ ଅଧିକ ସ୍ୱଚ୍ଛତା ଓ ସମାନତା ଆଣିବା। ସାଧାରଣ FD ନିବେଶକାରୀଙ୍କ ପାଇଁ ଏହାର ପ୍ରଭାବ କମ୍ ଥିଲେ ମଧ୍ୟ, ବଡ଼ ରାଶିର FD କରୁଥିବା ନିବେଶକାରୀମାନେ ଅକ୍ଟୋବର ୧ରୁ ଲାଗୁ ହେବାକୁ ଥିବା ନୂଆ ନିୟମ ଓ ବ୍ୟାଙ୍କର ଘୋଷିତ ସୁଧ ହାର ଉପରେ ନଜର ରଖିବା ଆବଶ୍ୟକ।
