Satyendar Jain Bail: ଦୁର୍ନୀତି ନିରୋଧ ଶାଖା( Anti-Corruption Branch) ମାମଲାରେ ସତ୍ୟେନ୍ଦ୍ର ଜୈନଙ୍କୁ ବଡ଼ ଆଶ୍ୱସ୍ତି, ରାଉଜ୍ ଆଭେନ୍ୟୁ କୋର୍ଟରୁ ମିଳିଲା ଜାମିନ
ନୂଆଦିଲ୍ଲୀ: ଆମ୍ ଆଦମୀ ପାର୍ଟି (AAP) ନେତା ସତ୍ୟେନ୍ଦ୍ର ଜୈନଙ୍କୁ ACB ମାମଲାରେ ବଡ଼ ଆଶ୍ୱସ୍ତି ମିଳିଛି। ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟ ତାଙ୍କୁ ୨ ଲକ୍ଷ ଟଙ୍କାର ବେଲ୍ ବଣ୍ଡ୍ରେ ଜାମିନ ପ୍ରଦାନ କରିଛନ୍ତି। ଆଣ୍ଟି-କରପ୍ସନ୍ ବ୍ରାଞ୍ଚ (ACB) ଦ୍ୱାରା ତଦନ୍ତ କରାଯାଉଥିବା ଏହି ମାମଲାରେ ଜୈନଙ୍କ ପକ୍ଷରୁ ତାଙ୍କ ଓକିଲ କୋର୍ଟରେ ଜାମିନ ପାଇଁ ଯୁକ୍ତି ରଖିଥିଲେ।
ଜୈନଙ୍କ ଓକିଲ କହିଥିଲେ ଯେ, FIR ରୁଜୁ ହେବାର ପ୍ରାୟ ୨୭ ମାସ ପରେ ତାଙ୍କୁ ଗିରଫ କରାଯାଇଛି। ଏହି ସମୟ ମଧ୍ୟରେ ସେ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିଥିବା ଏବଂ ମାମଲାରେ ଥିବା ପ୍ରମାଣ ମୁଖ୍ୟତଃ ଦସ୍ତାବିଜ ଆଧାରିତ ବୋଲି ଯୁକ୍ତି ଦିଆଯାଇଥିଲା। ଅନ୍ୟପଟେ ACB ଜାମିନକୁ ବିରୋଧ କରି କହିଥିଲା ଯେ, ତଦନ୍ତ ଏବେ ମଧ୍ୟ ପ୍ରାରମ୍ଭିକ ପର୍ଯ୍ୟାୟରେ ରହିଛି ଏବଂ ଜୈନଙ୍କ ବିରୋଧରେ ଏକାଧିକ ମାମଲା ବିଚାରାଧୀନ ଅଛି।
ତେବେ ଉଭୟ ପକ୍ଷର ଯୁକ୍ତି ଶୁଣିବା ପରେ କୋର୍ଟ ସତ୍ୟେନ୍ଦ୍ର ଜୈନଙ୍କୁ ଜାମିନ ଦେଇଛନ୍ତି। ତାଙ୍କ ଜାମିନ ସହ ଜଡ଼ିତ ଅନ୍ୟ ସର୍ତ୍ତଗୁଡ଼ିକ ସମ୍ପର୍କରେ ଅଧିକ ସ୍ପଷ୍ଟତା ଅଫିସିଆଲ୍ ଅର୍ଡର କପି ଆସିବା ପରେ ମିଳିବ। ଏହି ରାୟକୁ ନେଇ AAP ଶିବିରରେ ଆଶ୍ୱସ୍ତି ଦେଖାଦେଇଥିବା ବେଳେ ମାମଲାର ଆଗାମୀ ତଦନ୍ତ ଉପରେ ଏବେ ନଜର ରହିଛି।
