Iran Sanctions: ଇରାନ୍କୁ ଆର୍ଥିକ ଫାଇଦା ପହଞ୍ଚାଇଲେ ପରିଣାମ ଭୋଗିବେ, ଭାରତ-ଇରାନ୍ ସାକ୍ଷାତକାର ପରେ ଆମେରିକାର ଚେତାବନୀ
ନୂଆଦିଲ୍ଲୀ: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଇରାନ୍ ରାଷ୍ଟ୍ରପତି ମାସୁଦ ପେଜେସ୍କିଆନ୍ଙ୍କ ମଧ୍ୟରେ ବିଶ୍କେକ୍ରେ ଏସ୍ସିଓ ସମ୍ମିଳନୀ ଅବସରରେ ଦ୍ୱିପାକ୍ଷିକ ବୈଠକ ହେବା ପରେ ଇରାନ୍ ପ୍ରସଙ୍ଗରେ ଆମେରିକା କଡ଼ା ବାର୍ତ୍ତା ଦେଇଛି। ଆମେରିକାର ବୈଦେଶିକ ସଚିବ ମାର୍କୋ ରୁବିଓ କହିଛନ୍ତି ଯେ, କୌଣସି ଦେଶ ଇରାନ୍କୁ ଆମେରିକୀୟ କଟକଣା ଏଡ଼ାଇବାରେ ସହଯୋଗ କଲେ କିମ୍ବା ଇରାନ୍କୁ ରାଜସ୍ୱ ଆୟ କରିବାର ବ୍ୟବସ୍ଥା କରିଦେଲେ, ସେହି ଦେଶ ମଧ୍ୟ ଆମେରିକାର କଟକଣାର ସମ୍ମୁଖୀନ ହୋଇପାରେ। ଫକ୍ସ ନ୍ୟୁଜ୍ ରେଡିଓର ‘ଦ ବ୍ରାଏନ୍ କିଲ୍ମିଡ୍ ଶୋ’ରେ ରୁବିଓ କହିଥିଲେ ଯେ, ଅନେକ ଦେଶ ଇରାନ୍ ସହ ଆଲୋଚନା କରୁଛନ୍ତି, କିନ୍ତୁ କଟକଣା ଏଡ଼ାଇବା ପାଇଁ ବ୍ୟବସ୍ଥା କରୁଥିବା ଦେଶ ବିରୋଧରେ ପଦକ୍ଷେପ ନିଆଯିବ।
ଏହାର ଗୋଟିଏ ଦିନ ପୂର୍ବରୁ ବିଶ୍କେକ୍ରେ ମୋଦି ଓ ପେଜେସ୍କିଆନ୍ଙ୍କ ମଧ୍ୟରେ ଆଲୋଚନା ହୋଇଥିଲା। ଦୁଇ ନେତା ଭାରତ-ଇରାନ୍ ଦ୍ୱିପାକ୍ଷିକ ସମ୍ପର୍କ ସହ ପଶ୍ଚିମ ଏସିଆର ସାମ୍ପ୍ରତିକ ସ୍ଥିତି ଉପରେ ମତ ବିନିମୟ କରିଥିଲେ। ଭାରତ ପକ୍ଷରୁ ସମସ୍ତ ସମସ୍ୟାର ସମାଧାନ ଆଲୋଚନା ଓ କୂଟନୀତି ମାଧ୍ୟମରେ ହେବା ଉଚିତ ବୋଲି ମତ ରଖାଯାଇଥିଲା। ଏଥିସହ ସାମୁଦ୍ରିକ ଯାତାୟାତ ଓ ବାଣିଜ୍ୟର ସ୍ୱାଧୀନତା ସୁରକ୍ଷିତ ରଖିବା ଉପରେ ମଧ୍ୟ ଭାରତ ଗୁରୁତ୍ୱ ଦେଇଥିଲା।
ଇରାନ୍ ସହ ଭାରତର ସମ୍ପର୍କରେ ଚାବାହାର ବନ୍ଦରର ଗୁରୁତ୍ୱ ଅଧିକ। ଏହି ବନ୍ଦର ମାଧ୍ୟମରେ ପାକିସ୍ତାନକୁ ଏଡ଼ାଇ ଭାରତ ମଧ୍ୟ ଏସିଆ ସହ ଯୋଗାଯୋଗର ଏକ ରଣନୀତିକ ମାର୍ଗ ପାଇଥାଏ। ତେବେ ଇରାନ୍ ଉପରେ ବଢ଼ୁଥିବା ଆମେରିକୀୟ କଟକଣା ମଧ୍ୟରେ ଚାବାହାର ସମେତ ଭାରତର ଇରାନ୍ ସହ ଆର୍ଥିକ ଓ ରଣନୀତିକ ସମ୍ପର୍କ ନେଇ କୂଟନୈତିକ ସନ୍ତୁଳନ ରକ୍ଷା କରିବା ଚ୍ୟାଲେଞ୍ଜ ହୋଇଛି। ତେବେ ରୁବିଓଙ୍କ ବୟାନକୁ ଭାରତ ବିରୋଧରେ କୌଣସି ସିଧାସଳଖ ଅଭିଯୋଗ ଭାବେ ଆମେରିକା ଦର୍ଶାଇନାହିଁ; ଏହା ଇରାନ୍କୁ କଟକଣା ଏଡ଼ାଇବାରେ ସହଯୋଗ କରୁଥିବା ଦେଶଗୁଡ଼ିକ ପାଇଁ ସାଧାରଣ ଚେତାବନୀ ଭାବେ ଆସିଛି।
