Madras High Court: ସ୍ୱାମୀ ଯେଉଁଠି ଚାକିରି କରିବେ, ସ୍ତ୍ରୀ ସେଠାକୁ ଯିବା ବାଧ୍ୟତାମୂଳକ ନୁହେଁ; ଦୀର୍ଘ ବିଚ୍ଛେଦ ପରେ ଛାଡ଼ପତ୍ର ମଞ୍ଜୁର
ନୂଆଦିଲ୍ଲୀ: ସ୍ୱାମୀଙ୍କ ଚାକିରି ଯେଉଁ ସ୍ଥାନରେ ଥିବ, ସ୍ତ୍ରୀ ମଧ୍ୟ ସବୁବେଳେ ତାଙ୍କ ସହ ସେଠାକୁ ଯିବାକୁ ବାଧ୍ୟ ନୁହନ୍ତି ବୋଲି ମାଡ୍ରାସ ହାଇକୋର୍ଟ ଟିପ୍ପଣୀ ଦେଇଛନ୍ତି। ଏକ ପାରିବାରିକ ବିବାଦର ଶୁଣାଣି କରି ଜଷ୍ଟିସ୍ ଜି.ଆର୍. ସ୍ୱାମୀନାଥନ ଓ ଏମ୍.ଡି. ସୁମତିଙ୍କ ଖଣ୍ଡପୀଠ କହିଛନ୍ତି, ଚାକିରି କାରଣରୁ ସ୍ୱାମୀଙ୍କୁ ସ୍ଥାନାନ୍ତର ହେବାକୁ ପଡ଼ିଲେ ପ୍ରତ୍ୟେକ ଥର ସ୍ତ୍ରୀ ତାଙ୍କ ପଛେ ପଛେ ଯିବେ ବୋଲି ଆଶା କରାଯାଇପାରିବ ନାହିଁ। ଏହି ମାମଲାରେ ଦମ୍ପତି ୧୬ ବର୍ଷରୁ ଅଲଗା ରହୁଥିବା ବେଳେ ୧୯୯୨ରେ ସେମାନଙ୍କ ବିବାହ ହୋଇଥିଲା ଏବଂ ସେମାନଙ୍କର ୪ଟି ସନ୍ତାନ ଅଛନ୍ତି।
ମାମଲା ଅନୁସାରେ, ସ୍ୱାମୀ ଚାକିରି କାରଣରୁ ମୁମ୍ବାଇ ଯାଇଥିଲେ, କିନ୍ତୁ ସ୍ତ୍ରୀଙ୍କୁ ସାଙ୍ଗରେ ନେଇନଥିଲେ। ପରେ ସେ ସ୍ତ୍ରୀଙ୍କ ବିରୋଧରେ ପରକୀୟା ସମ୍ପର୍କର ଅଭିଯୋଗ ଆଣି ଛାଡ଼ପତ୍ର ଆବେଦନ କରିଥିଲେ। ତେବେ ପରିବାର ଅଦାଲତ ତାଙ୍କ ଆବେଦନ ଖାରଜ କରିବା ସହ କହିଥିଲେ ଯେ, ସ୍ତ୍ରୀଙ୍କୁ ସାଙ୍ଗରେ ନ ନେବା ଯୋଗୁ ସ୍ୱାମୀ ନିଜ ଭୁଲର ଫାଇଦା ଉଠାଇ ଛାଡ଼ପତ୍ର ଦାବି କରୁଛନ୍ତି। ଏହାସହ ସ୍ୱାମୀଙ୍କ ଚାକିରି ଯେଉଁଠି ହେଉନା କାହିଁକି, ସ୍ତ୍ରୀଙ୍କୁ ସାଙ୍ଗରେ ରଖିବା ତାଙ୍କ ଦାୟିତ୍ୱ ବୋଲି ନିମ୍ନ ଅଦାଲତ ମତ ଦେଇଥିଲେ।
ହାଇକୋର୍ଟ ପରିବାର ଅଦାଲତଙ୍କ ଏହି ଯୁକ୍ତି ସହ ସହମତ ହୋଇନଥିଲେ। ଖଣ୍ଡପୀଠ କହିଛନ୍ତି, ସ୍ୱାମୀଙ୍କ ଚାକିରି ସ୍ଥାନ ପରିବର୍ତ୍ତନ ହେଲେ ପ୍ରତ୍ୟେକ ଥର ସ୍ତ୍ରୀଙ୍କୁ ସାଙ୍ଗରେ ନେଇଯିବା ସମ୍ଭବ ହୋଇନପାରେ। ସେହିପରି ସ୍ତ୍ରୀଙ୍କ ପରକୀୟା ସମ୍ପର୍କ ଥିବା ନେଇ ସ୍ୱାମୀ କରିଥିବା ଅଭିଯୋଗକୁ ମଧ୍ୟ କୋର୍ଟ ଗ୍ରହଣ କରିନଥିଲେ। ଦୀର୍ଘ ୧୬ ବର୍ଷ ଧରି ଅଲଗା ରହିବା ଏବଂ ସମ୍ପର୍କରେ ତିକ୍ତତା ବଢ଼ିଯିବାରୁ ଦମ୍ପତିଙ୍କ ଏକାଠି ରହିବାର ସମ୍ଭାବନା ନଥିବା ଦର୍ଶାଇ ହାଇକୋର୍ଟ ପରିବାର ଅଦାଲତଙ୍କ ରାୟକୁ ପଲଟାଇ ଛାଡ଼ପତ୍ର ମଞ୍ଜୁର କରିଛନ୍ତି। ଏଥିସହ ସ୍ତ୍ରୀଙ୍କୁ ୭ ଲକ୍ଷ ଟଙ୍କା ଭରଣପୋଷଣ ଭତ୍ତା ଦେବାକୁ ସ୍ୱାମୀଙ୍କୁ ନିର୍ଦ୍ଦେଶ ଦିଆଯାଇଛି।
