Fentanyl Chemical Smuggling: ଫେଣ୍ଟାନିଲ୍ ତିଆରି ପାଇଁ ରାସାୟନିକ ଚୋରାଚାଲାଣ, ଆମେରିକାରେ ଗୁଜରାଟୀ ବ୍ୟବସାୟୀଙ୍କୁ ସାଢ଼େ ୪ ବର୍ଷ ଜେଲ୍
ନୂଆଦିଲ୍ଲୀ: ଆମେରିକାରେ ମାରାତ୍ମକ ଓପିଓଏଡ୍ ଫେଣ୍ଟାନିଲ୍ ତିଆରିରେ ବ୍ୟବହୃତ ରାସାୟନିକ ପଦାର୍ଥ ଚୋରାଚାଲାଣ ମାମଲାରେ ଗୁଜରାଟର ୩୭ ବର୍ଷୀୟ ଭାବେଶ ରଣଛୋଡଭାଇ ଲାଥିୟାଙ୍କୁ ୫୪ ମାସ, ଅର୍ଥାତ୍ ପ୍ରାୟ ସାଢ଼େ ୪ ବର୍ଷ ଜେଲ୍ଦଣ୍ଡ ମିଳିଛି। ଆମେରିକାର ନ୍ୟୁୟର୍କର ବ୍ରୁକଲିନ୍ ସ୍ଥିତ ଫେଡେରାଲ୍ କୋର୍ଟରେ ଜିଲ୍ଲା ଜଜ୍ ପାମେଲା କେ. ଚେନ୍ ଏହି ଦଣ୍ଡାଦେଶ ଦେଇଛନ୍ତି। ଲାଥିୟା ରାସାୟନିକ ପଦାର୍ଥଗୁଡ଼ିକୁ ଭିଟାମିନ୍-ସି ଓ ଆଣ୍ଟାସିଡ୍ ଟାବଲେଟ୍ ଭାବେ ଦର୍ଶାଇ ଆମେରିକାକୁ ଚୋରାଚାଲାଣ କରିଥିବା ଅଭିଯୋଗ ରହିଥିଲା।
ଲାଥିୟାଙ୍କୁ ଭାବେଶ ଭାଇ, ଭାବେଶ ପଟେଲ ଓ ଭାବେଶ ଲାଥିୟା ନାମରେ ମଧ୍ୟ ଜଣାଯାଏ। ସୁରତର ବାସିନ୍ଦା ଲାଥିୟା Raxuter Chemicals ନାମକ କମ୍ପାନୀର ପ୍ରତିଷ୍ଠାତା ଓ ମୁଖ୍ୟ ଥିଲେ। ଆମେରିକାର ଇଷ୍ଟର୍ନ ଡିଷ୍ଟ୍ରିକ୍ଟ ଅଫ୍ ନ୍ୟୁୟର୍କର ଆମେରିକୀୟ ଆଟର୍ଣ୍ଣି କାର୍ଯ୍ୟାଳୟ ଅନୁସାରେ, ତାଙ୍କ କମ୍ପାନୀ ଫେଣ୍ଟାନିଲ୍ ତିଆରିରେ ବ୍ୟବହୃତ ୫୦ ପାଉଣ୍ଡରୁ ଅଧିକ ରାସାୟନିକ ପଦାର୍ଥ ବେଆଇନ ଭାବେ ଆମେରିକାକୁ ବିକ୍ରି ଓ ଚୋରାଚାଲାଣ କରିଥିଲା। ଏହି ମାମଲାକୁ ଭାରତରେ ଥିବା ଜଣେ ଯୋଗାଣକାରୀଙ୍କ ସମ୍ପୃକ୍ତି ଥିବା ପ୍ରଥମ ମାମଲା ବୋଲି ଆମେରିକୀୟ ଅଭିଯୋଜକମାନେ ବର୍ଣ୍ଣନା କରିଛନ୍ତି।
୨୦୨୫ ଜାନୁଆରୀରେ ନ୍ୟୁୟର୍କ ସିଟିରୁ ଲାଥିୟାଙ୍କୁ ଗିରଫ କରାଯାଇଥିଲା। ତାଙ୍କ ବିରୋଧରେ ତାଲିକାଭୁକ୍ତ ରାସାୟନିକ ପଦାର୍ଥ ବଣ୍ଟନ ଓ ଆମଦାନୀ ପାଇଁ ଷଡ଼ଯନ୍ତ୍ର, ଫେଣ୍ଟାନିଲ୍ ତିଆରିରେ ବ୍ୟବହାର ହେବ ବୋଲି ଜାଣି ରାସାୟନିକ ପଦାର୍ଥ ଯୋଗାଣ, ଚୋରାଚାଲାଣ ସମେତ ଅନ୍ୟାନ୍ୟ ଅଭିଯୋଗ ଲାଗିଥିଲା। ଏହି ଅପରାଧଗୁଡ଼ିକ ପାଇଁ ସର୍ବାଧିକ ୫୩ ବର୍ଷ ପର୍ଯ୍ୟନ୍ତ ଜେଲ୍ଦଣ୍ଡର ବ୍ୟବସ୍ଥା ଥିଲା। ଲାଥିୟା ୨୦୨୬ ଏପ୍ରିଲରେ ନିଜ ଦୋଷ ସ୍ୱୀକାର କରିଥିଲେ। ଦଣ୍ଡ ଶେଷ ହେବା ପରେ ୨୦୩୧ ମାର୍ଚ୍ଚରେ ତାଙ୍କୁ ଆମେରିକାରୁ ଡିପୋର୍ଟ କରାଯିବା ସହ ୨୪,୫୬୦ ଡଲାର, ଅର୍ଥାତ୍ ପ୍ରାୟ ୨୩ ଲକ୍ଷ ଟଙ୍କା ଜବତ ଅର୍ଥ ଭାବେ ଦେବାକୁ ମଧ୍ୟ ନିର୍ଦ୍ଦେଶ ହୋଇଛି।
