Kuwait Rescue: ଭାରତୀୟ ଦୂତାବାସର ହସ୍ତକ୍ଷେପ ପରେ ଉଦ୍ଧାର ହେଲେ ତାମିଲନାଡୁର ମହିଳା, କହିଲେ- ‘ଏବେ ଭଲ ପୋଷାକ ଓ ଭଲ ଖାଦ୍ୟ ମିଳୁଛି’
ନୂଆଦିଲ୍ଲୀ: କୁଏତ୍ରେ ନିର୍ଯାତନାର ଶିକାର ହେଉଥିବା ଅଭିଯୋଗ କରି ସହାୟତା ମାଗିଥିବା ତାମିଲନାଡୁର ଜଣେ ମହିଳାଙ୍କୁ ଭାରତୀୟ ଦୂତାବାସ ଉଦ୍ଧାର କରିଛି। କଲ୍ଲାକୁରିଚି ଜିଲ୍ଲାର ବାସିନ୍ଦା ଭାନିଥା କୁଏତ୍ରେ ପ୍ରାୟ ୩ ମାସ ଧରି ରହୁଥିଲେ। କିଛି ଦିନ ପୂର୍ବରୁ ସେ ଏକ ଭିଡିଓ ଜାରି କରି ନିଜକୁ ଉଦ୍ଧାର କରି ଭାରତ ଫେରାଇ ଆଣିବାକୁ ତାମିଲନାଡୁ ସରକାର ଓ ପୁଲିସକୁ ନିବେଦନ କରିଥିଲେ। ସେ କହିଥିଲେ ଯେ, ତାଙ୍କୁ ସେଠାରେ ନିର୍ଯାତନା ଦିଆଯାଉଛି ଏବଂ ଗତ ଦୁଇ ମାସର ଦରମା ମଧ୍ୟ ମିଳିନାହିଁ।
ଭାନିଥାଙ୍କ ଏହି ଭିଡିଓ ତାମିଲନାଡୁ ପ୍ରଶାସନର ନଜରକୁ ଆସିବା ପରେ ଅଧିକାରୀମାନେ ତାଙ୍କ ପରିଚୟ ନିଶ୍ଚିତ କରି ପରିବାରକୁ ଖୋଜିଥିଲେ। ପରେ ତାଙ୍କ ମା’ ଭେନିଲା ଅଭିଯୋଗ କରିଥିଲେ ଯେ, ଜଣେ ଏଜେଣ୍ଟ ତାଙ୍କ ଝିଅଙ୍କୁ କୁଏତ୍ରେ ଘରୋଇ ସହାୟିକା ଭାବେ କାମ ଦେବାର ପ୍ରତିଶ୍ରୁତି ଦେଇ ପଠାଇଥିଲେ। କିନ୍ତୁ ସେଠାରେ ପହଞ୍ଚିବା ପରେ ଝିଅଙ୍କୁ ନିର୍ଯାତନା ଦିଆଯାଉଥିବା ମା’ ଅଭିଯୋଗ କରିଥିଲେ। ପରିବାର ପକ୍ଷରୁ ଭାନିଥାଙ୍କୁ ଉଦ୍ଧାର କରି ଭାରତ ଫେରାଇ ଆଣିବାକୁ ଅଭିଯୋଗ ଦାଖଲ କରାଯାଇଥିଲା।
ଶେଷରେ ଭାରତୀୟ ଦୂତାବାସର ହସ୍ତକ୍ଷେପ ପରେ ଭାନିଥାଙ୍କୁ ଉଦ୍ଧାର କରାଯାଇଛି। ଉଦ୍ଧାର ପରେ ଦୂତାବାସରୁ ସେ ଏକ ନୂଆ ଭିଡିଓ ଜାରି କରି ଭାରତୀୟ ଦୂତାବାସକୁ ଧନ୍ୟବାଦ ଦେଇଛନ୍ତି। ଏହି ଭିଡିଓରେ ସେ କହିଛନ୍ତି, “ଏବେ ମୁଁ ଭାରତୀୟ ଦୂତାବାସରେ ଅଛି। ଧନ୍ୟବାଦ ଭାରତୀୟ ଦୂତାବାସ। ଏବେ ମୋତେ ଭଲ ପୋଷାକ ଓ ଭଲ ଖାଦ୍ୟ ମିଳୁଛି।” ଭାନିଥାଙ୍କୁ ଭାରତ ଫେରାଇ ଆଣିବା ପାଇଁ ଆବଶ୍ୟକ ପ୍ରକ୍ରିୟା ଜାରି ରହିଛି।
