Udala Medical: ସାପ କାମୁଡ଼ିଲା, କିନ୍ତୁ ସାପକୁ ଜରିରେ ଧରି ସାଇକେଲରେ ମେଡିକାଲ ଦଉଡି ଗଲେ ଯୁବକ!
ମୟୁରଭଞ୍ଜ: ସାପ କାମୁଡ଼ିବା ପରେ ସାଧାରଣତଃ ଲୋକେ ଭୟଭୀତ ହୋଇପଡ଼ନ୍ତି। ହେଲେ ଉଦଳା ଏନ୍ଏସିର ୧୦ ନମ୍ବର ୱାର୍ଡରେ ଘଟିଛି ଏକ ଭିନ୍ନ ଘଟଣା। ସାପ କାମୁଡ଼ିବା ପରେ ଜଣେ ଯୁବକ ସାପଟିକୁ ଏକ ଜରିରେ ଧରି ସାଇକେଲ ଯୋଗେ ସିଧା ମେଡିକାଲରେ ପହଞ୍ଚିଛନ୍ତି। ଯୁବକ ଜଣକ ହେଉଛନ୍ତି ମୋଚିରାମ ଟୁଡୁ। ସୂଚନା ଅନୁସାରେ, ମୋଚିରାମଙ୍କୁ ଏକ ସାପ କାମୁଡ଼ିବା ପରେ ସେ ଭୟଭୀତ ନହୋଇ ସାପଟିକୁ ଜରିରେ ଧରିଥିଲେ। ପରେ ସାଇକେଲରେ ଉଦଳା ମେଡିକାଲରେ ପହଞ୍ଚିଥିଲେ। ତାଙ୍କ ସହ ସାପକୁ ଦେଖି ମେଡିକାଲରେ ଉପସ୍ଥିତ ଲୋକେ ଚକିତ ହୋଇଯାଇଥିଲେ।
ସାପ କାମୁଡ଼ା ଯୋଗୁଁ ମୋଚିରାମ ଗୁରୁତର ହୋଇଥିବା ଜଣାପଡ଼ିଛି। ତାଙ୍କୁ ଉଦଳା ମେଡିକାଲରେ ଚିକିତ୍ସା କରାଯାଉଛି। ମେଡିକାଲରୁ ସାମ୍ନାକୁ ଆସିଥିବା ମୋଚିରାମଙ୍କ ସହ ସାପ ଥିବା ଦୃଶ୍ୟ ଏବେ ଚର୍ଚ୍ଚାରେ ରହିଛି। ସାପଟିକୁ ଧରି ମେଡିକାଲ ନେବା ଯୋଗୁଁ ଘଟଣାଟି ଅଧିକ ଆଶ୍ଚର୍ଯ୍ୟଜନକ ହୋଇଛି। ତେବେ ସାପଟି କେଉଁ ପ୍ରଜାତିର ଏବଂ ଏହାର ବିଷର ପ୍ରଭାବ କେତେ ଥିଲା, ସେନେଇ ସ୍ପଷ୍ଟ ସୂଚନା ମିଳିନାହିଁ।
ତେବେ ସାପ କାମୁଡ଼ିଲେ ନିଜେ ସାପକୁ ଧରିବା ଆଦୌ ସୁରକ୍ଷିତ ନୁହେଁ। ସାପଟି ଜୀବିତ ଥିଲେ ତାହାକୁ ଧରିବା ସମୟରେ ପୁଣିଥରେ କାମୁଡ଼ିବାର ଆଶଙ୍କା ରହିଥାଏ। ତେଣୁ ସାପ କାମୁଡ଼ିଲେ ସାପକୁ ଧରିବା କିମ୍ବା ମାରିବାକୁ ଚେଷ୍ଟା ନକରି ଯଥାଶୀଘ୍ର ନିକଟସ୍ଥ ମେଡିକାଲରେ ପହଞ୍ଚିବା ଜରୁରୀ। ସମ୍ଭବ ହେଲେ ସାପର ଫଟୋ ଦୂରରୁ ନିରାପଦ ଭାବେ ନେଇ ଡାକ୍ତରଙ୍କୁ ଦେଖାଇପାରିବେ, କିନ୍ତୁ ସାପକୁ ଧରିବା ଉଚିତ ନୁହେଁ।
