ଜି ଫାଉଣ୍ଡର ସୁଭାଷ ଚନ୍ଦ୍ରଙ୍କୁ CBI ଝଟକା, ₹୧,୩୨୨ କୋଟିର ଋଣ ଡିଫଲ୍ଟ ଅଭିଯୋଗ
ଜି ଗ୍ରୁପ୍ର ପ୍ରତିଷ୍ଠାତା ସୁଭାଷ ଚନ୍ଦ୍ରଙ୍କ ବିରୋଧରେ ବଡ଼ ଅଭିଯୋଗ ଆଣିଛି CBI। LIC ହାଉସିଂ ଫାଇନାନ୍ସ ଲିମିଟେଡ୍କୁ ଭୁଲ ନେଟ୍ୱର୍ଥ ସୂଚନା ଦେଇ ଦୁଇଟି କମ୍ପାନୀ ପାଇଁ ଋଣ ଗ୍ୟାରେଣ୍ଟି ଦେବା ଏବଂ ପରେ ସେହି ଋଣ ଡିଫଲ୍ଟ ହେବା ଘଟଣାରେ CBI ସୁଭାଷ ଚନ୍ଦ୍ରଙ୍କ ବିରୋଧରେ FIR ରୁଜୁ କରିଛି। CBI ଅନୁଯାୟୀ, ଏହି ଋଣ ଡିଫଲ୍ଟ ଯୋଗୁଁ LIC ହାଉସିଂ ଫାଇନାନ୍ସର ପ୍ରାୟ ₹୧,୩୨୨ କୋଟି କ୍ଷତି ହୋଇଛି। ଚନ୍ଦ୍ରଙ୍କ ବିଦେଶ ଯାତ୍ରା ରୋକିବା ପାଇଁ ତାଙ୍କ ବିରୋଧରେ ଲୁକ୍ଆଉଟ୍ ସର୍କୁଲାର ମଧ୍ୟ ଜାରି ହୋଇଛି।
ମାମଲାର କେନ୍ଦ୍ରରେ ରହିଛି ଦୁଇଟି ବଡ଼ ଋଣ। ଭାସନ୍ତ ସାଗର ପ୍ରପର୍ଟିଜ୍ ପ୍ରାଇଭେଟ୍ ଲିମିଟେଡ୍କୁ ₹୫୦୦ କୋଟି ଏବଂ ଡିଜିଟାଲ୍ ସବ୍ସ୍କ୍ରାଇବର ମ୍ୟାନେଜମେଣ୍ଟ ଆଣ୍ଡ କନସଲଟାନ୍ସି ସର୍ଭିସେସ୍ ପ୍ରାଇଭେଟ୍ ଲିମିଟେଡ୍କୁ ₹୪୮୦ କୋଟି ଋଣ ଦିଆଯାଇଥିଲା। ଉଭୟ ଋଣରେ ସୁଭାଷ ଚନ୍ଦ୍ର ବ୍ୟକ୍ତିଗତ ଗ୍ୟାରେଣ୍ଟର ଥିଲେ। CBI FIR ଅନୁଯାୟୀ, ୨୦୧୮ରେ ଚନ୍ଦ୍ର ଦେଇଥିବା ନେଟ୍ୱର୍ଥ ସାର୍ଟିଫିକେଟ୍କୁ ଆଧାର କରି ଋଣ ମଞ୍ଜୁର ହୋଇଥିଲା। ₹୫୦୦ କୋଟିର ଋଣ ପାଇଁ ତାଙ୍କ ନେଟ୍ୱର୍ଥ ₹୫୯,୧୧୩ କୋଟି ଏବଂ ₹୪୮୦ କୋଟିର ଋଣ ପାଇଁ ₹୪୦,୫୬୨ କୋଟି ଥିବା ଦର୍ଶାଯାଇଥିଲା।
ତେବେ ପରବର୍ତ୍ତୀ ବ୍ୟକ୍ତିଗତ ଦେବାଳିଆ ପ୍ରକ୍ରିୟାରେ ସୁଭାଷ ଚନ୍ଦ୍ର ନିଜେ ଏହି ନେଟ୍ୱର୍ଥ ନେଇ ପ୍ରଶ୍ନ ଉଠାଇଥିବା CBI କହିଛି। FIR ଅନୁଯାୟୀ, ୨୦୨୪ରେ ତାଙ୍କ ନେଟ୍ୱର୍ଥ ₹୩୧.୭୯ କୋଟି ଥିବା ଚନ୍ଦ୍ର ଦର୍ଶାଇଥିଲେ। ଏହାସହ ୨୦୧୭-୧୮ରେ ମଧ୍ୟ ତାଙ୍କ ନେଟ୍ୱର୍ଥ ₹୪୦,୦୦୦ କୋଟିରୁ ଅଧିକ ନଥିବା ସେ କହିଥିବା ଅଭିଯୋଗ ରହିଛି। CBI ଏହି ମାମଲାରେ ସୁଭାଷ ଚନ୍ଦ୍ରଙ୍କ ସହ ତିନିଟି କମ୍ପାନୀ, କିଛି ନିର୍ଦ୍ଦେଶକ ଓ ଅନ୍ୟ ଅଜଣା ବ୍ୟକ୍ତିଙ୍କୁ ଅଭିଯୁକ୍ତ କରିଛି। ଋଣ ଡିଫଲ୍ଟ ଏବଂ କଥିତ ନେଟ୍ୱର୍ଥ ବିବରଣୀକୁ ନେଇ ଏବେ CBI ତଦନ୍ତ ଚାଲିଛି।
