Swatantra Bharadwaj: ଗିରଫକୁ ଚ୍ୟାଲେଞ୍ଜ କରିଥିବା ଆବେଦନ ହେଲା ଖାରଜ, ଟ୍ରାଏଲ୍ କୋର୍ଟ ଯିବାକୁ କହିଲେ ଦିଲ୍ଲୀ ହାଇକୋର୍ଟ
ନୂଆଦିଲ୍ଲୀ: ଜନ୍ତର ମନ୍ତରରେ Cockroach Janta Party (CJP)ର ଆନ୍ଦୋଳନ ସମୟରେ ଜଣେ ଛାତ୍ରୀଙ୍କ ବାପାଙ୍କୁ ମାଡ଼ ମାରିଥିବା ଅଭିଯୋଗରେ ଗିରଫ ହୋଇଥିବା ହିନ୍ଦୁତ୍ୱ ଇନ୍ଫ୍ଲୁଏନ୍ସର ସ୍ୱତନ୍ତ୍ର ଭାରଦ୍ୱାଜଙ୍କୁ ଦିଲ୍ଲୀ ହାଇକୋର୍ଟରୁ ଝଟକା ଲାଗିଛି। ତାଙ୍କ ଗିରଫକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ହେବିୟସ୍ କର୍ପସ୍ ଆବେଦନକୁ ଜଷ୍ଟିସ୍ ନବୀନ ଚାୱଲା ଓ ଜଷ୍ଟିସ୍ ରବିନ୍ଦର ଦୁଦେଜାଙ୍କ ଖଣ୍ଡପୀଠ ଖାରଜ କରିଛନ୍ତି। କୋର୍ଟ କହିଛନ୍ତି ଯେ, ଭାରଦ୍ୱାଜ ବର୍ତ୍ତମାନ ନ୍ୟାୟିକ ଆଦେଶ ଅନୁଯାୟୀ ହେପାଜତରେ ଅଛନ୍ତି ଏବଂ ଗିରଫକୁ ନେଇ ଆପତ୍ତି ଥିଲେ ଉପଯୁକ୍ତ ଟ୍ରାଏଲ୍ କୋର୍ଟରେ ଚ୍ୟାଲେଞ୍ଜ କରିପାରିବେ।
ଭାରଦ୍ୱାଜଙ୍କ ଓକିଲ ଯୁକ୍ତି ଦେଇଥିଲେ ଯେ, ଯେଉଁ FIR ଆଧାରରେ ତାଙ୍କୁ ଗିରଫ କରାଯାଇଛି, ତାହା CJP ଆନ୍ଦୋଳନ ସମ୍ପର୍କିତ ମାମଲାରେ ସୁପ୍ରିମକୋର୍ଟଙ୍କ ନିକଟତମ ଆଦେଶ ଦ୍ୱାରା ଖାରଜ ହୋଇସାରିଛି। ତେବେ ଦିଲ୍ଲୀ ପୁଲିସ ଏହି ଦାବିକୁ ଖଣ୍ଡନ କରି କହିଛି ଯେ, ଭାରଦ୍ୱାଜଙ୍କ ବିରୋଧରେ ଥିବା FIR ଖାରଜ ହୋଇନାହିଁ। ହାଇକୋର୍ଟ ମଧ୍ୟ ଦର୍ଶାଇଛନ୍ତି ଯେ, FIR ଖାରଜ ହୋଇଥିବା ଯେଉଁ ଆଧାରରେ ଯାଚିକା ଦାଖଲ ହୋଇଛି, ସେହି ମୁଦ୍ଦା ଯାଚିକାରେ ସ୍ପଷ୍ଟ ଭାବେ ଉଠାଯାଇନଥିଲା।
ଭାରଦ୍ୱାଜଙ୍କୁ ସେପ୍ଟେମ୍ବର ୪ରେ ଉତ୍ତରପ୍ରଦେଶର ବୁଲନ୍ଦଶହରରୁ ଗିରଫ କରାଯାଇଥିଲା। ପ୍ରଥମେ ତାଙ୍କୁ ଗୋଟିଏ ଦିନ ପୁଲିସ ରିମାଣ୍ଡରେ ପଠାଯାଇଥିବା ବେଳେ ପରେ ପଟିଆଲା ହାଉସ୍ କୋର୍ଟ ତାଙ୍କୁ ୧୪ ଦିନର ନ୍ୟାୟିକ ହେପାଜତକୁ ପଠାଇଛନ୍ତି ଏବଂ ସେପ୍ଟେମ୍ବର ୨୧ରେ ପୁଣି କୋର୍ଟରେ ହାଜର କରାଯିବ। ଜନ୍ତର ମନ୍ତରରେ CJP ଆନ୍ଦୋଳନ ସମୟରେ ଛାତ୍ରୀଙ୍କ ବାପାଙ୍କୁ ଆକ୍ରମଣ କରିଥିବା ଅଭିଯୋଗ ପରେ ଏହି ମାମଲା ଚର୍ଚ୍ଚାକୁ ଆସିଥିଲା।
