UP 2020 Gangrape Case: ଜାଲ୍ ଆଫିଡେଭିଟ୍ ଦେଇ କୋର୍ଟଙ୍କୁ ବିଭ୍ରାନ୍ତ ଅଭିଯୋଗ, ୩୧ ଜଣଙ୍କ ବିରୋଧରେ ମାମଲା
ଉତ୍ତରପ୍ରଦେଶ: ଉତ୍ତରପ୍ରଦେଶର ଭଦୋହି ଜିଲ୍ଲାର ୨୦୨୦ ଗଣଦୁଷ୍କର୍ମ ମାମଲାରେ ଅଭିଯୁକ୍ତମାନଙ୍କୁ ସୁରକ୍ଷା ଦେବା ପାଇଁ କୋର୍ଟରେ ଜାଲ୍ ଓ ଭୁଲ୍ ଆଫିଡେଭିଟ୍ ଦାଖଲ କରାଯାଇଥିବା ଅଭିଯୋଗରେ ୩୧ ଜଣଙ୍କ ସମେତ କିଛି ଅଜଣା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ହୋଇଛି। ମୁଖ୍ୟ ନ୍ୟାୟିକ ମାଜିଷ୍ଟ୍ରେଟ୍ ଆନନ୍ଦ ମିଶ୍ରଙ୍କ ନିର୍ଦ୍ଦେଶ ପରେ ଉଞ୍ଜ ଥାନାରେ ଏହି FIR ରୁଜୁ କରାଯାଇଛି।
ପୀଡ଼ିତା ଜଣକ ଗତ ଜୁନ୍ ୬ରେ କୋର୍ଟରେ ଆବେଦନ କରି କିଛି ଅଧିକାରୀ ଅଭିଯୁକ୍ତମାନଙ୍କୁ ସହଯୋଗ କରିଥିବା ଏବଂ ତାଙ୍କ ବୟାନକୁ ଚାପି ଦେବା ପାଇଁ ଭୁଲ୍ ଆଫିଡେଭିଟ୍ ବ୍ୟବହାର କରାଯାଇଥିବା ଅଭିଯୋଗ କରିଥିଲେ। ୨୦୨୦ରେ ଜଣେ ୪୫ ବର୍ଷୀୟା ମହିଳା ନିଜ ଘରେ ଅନେକ ଥର ଗଣଦୁଷ୍କର୍ମର ଶିକାର ହୋଇଥିବା ଅଭିଯୋଗ ଆଣିଥିଲେ। ପ୍ରାରମ୍ଭିକ ତଦନ୍ତରେ ପୀଡ଼ିତାଙ୍କ ବୟାନ ରେକର୍ଡ କରାଯାଇନଥିବା ଓ ତାଙ୍କ ଡାକ୍ତରୀ ପରୀକ୍ଷା ମଧ୍ୟ ହୋଇନଥିବା ଅଭିଯୋଗ ରହିଛି। ପରେ କୋର୍ଟଙ୍କ ନିର୍ଦ୍ଦେଶରେ ମାମଲାର ପୁନଃତଦନ୍ତ କରାଯାଇଥିଲା।
ଦ୍ୱିତୀୟ ତଦନ୍ତ ସମୟରେ ମଧ୍ୟ ଜାଲ୍ ଓ ମନଗଢ଼ା ଆଫିଡେଭିଟ୍ ଉପରେ ଭରସା କରାଯାଇଥିବା ଅଭିଯୋଗ ରହିଛି। ଏହା ଆଧାରରେ ୨୦୨୧ ଅକ୍ଟୋବର ୩୦ରେ କୋର୍ଟରେ କ୍ଲୋଜର ରିପୋର୍ଟ ଦାଖଲ ହୋଇଥିଲା। ପୀଡ଼ିତା ଏହାକୁ ଚ୍ୟାଲେଞ୍ଜ କରିବା ପରେ କୋର୍ଟ ତାଙ୍କ ବୟାନ ରେକର୍ଡ କରି ଗଣଦୁଷ୍କର୍ମ ଅଭିଯୋଗରେ ପ୍ରାଥମିକ ଭାବେ ଯଥେଷ୍ଟ ଆଧାର ଥିବା ଦର୍ଶାଇଥିଲେ। ବର୍ତ୍ତମାନ ରାଜପତି ବିନ୍ଦଙ୍କ ସମେତ ୩୧ ଜଣ ଓ କିଛି ଅଜଣା ବ୍ୟକ୍ତିଙ୍କ ବିରୋଧରେ ନୂଆ ମାମଲା ରୁଜୁ ହୋଇଥିବା ବେଳେ ପୁଲିସ ଘଟଣାର ବିସ୍ତୃତ ତଦନ୍ତ ଜାରି ରଖିଛି।
