Hardik Pandya: ଅଷ୍ଟ୍ରେଲିଆ ‘ଏ’ ବିପକ୍ଷ ସିରିଜ୍ରେ ଖେଳିବେ ହାର୍ଦ୍ଦିକ ପାଣ୍ଡ୍ୟା! ଫିଟନେସ୍ କ୍ଲିୟରେନ୍ସ ସର୍ତ୍ତରେ ଇଣ୍ଡିଆ ‘ଏ’ ଟିମରେ ସାମିଲ
ନୂଆଦିଲ୍ଲୀ: ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ପୁଣିଥରେ ପ୍ରତିଯୋଗିତାମୂଳକ କ୍ରିକେଟକୁ ଫେରିବା ଦିଗରେ ଆଉ ଏକ ପାଦ ଆଗକୁ ବଢ଼ାଇଛନ୍ତି। ଅଷ୍ଟ୍ରେଲିଆ ‘ଏ’ ବିପକ୍ଷ ଆଗାମୀ ତିନିଟି ଦିନିକିଆ ମ୍ୟାଚ୍ ପାଇଁ ତାଙ୍କୁ ଭାରତ ‘ଏ’ ଦଳରେ ସାମିଲ କରାଯାଇଛି। ତେବେ ହାର୍ଦ୍ଦିକଙ୍କ ଖେଳିବା ଫିଟନେସ୍ କ୍ଲିୟରେନ୍ସ ଉପରେ ନିର୍ଭର କରିବ। ଏହି ସିରିଜ୍ରେ ଋତୁରାଜ ଗାଏକ୍ୱାଡ୍ ଅଧିନାୟକ ଏବଂ ଦେବଦତ୍ତ ପଡିକଲ୍ ଉପଅଧିନାୟକ ରହିଛନ୍ତି। ପୁଡୁଚେରୀରେ ଅକ୍ଟୋବର ୬, ୯ ଓ ୧୧ ତାରିଖରେ ତିନୋଟି ଦିନିକିଆ ମ୍ୟାଚ୍ ଖେଳାଯିବ।
ଗତ କିଛି ମାସ ଧରି ଆଘାତ ସମସ୍ୟା ଯୋଗୁଁ ହାର୍ଦ୍ଦିକଙ୍କୁ କ୍ରିକେଟ୍ରୁ ଦୂରେଇ ରହିବାକୁ ପଡ଼ିଛି। ୨୦୨୬ ଆଇପିଏଲ୍ରେ ପିଠିର ମାଂସପେଶୀ ସମ୍ପର୍କିତ ସମସ୍ୟା ଯୋଗୁଁ ସେ କିଛି ମ୍ୟାଚ୍ ଖେଳିପାରିନଥିଲେ। ଏହାପରେ ଜଂଘର ମାଂସପେଶୀରେ ଆଘାତ ଯୋଗୁଁ ଆଫଗାନିସ୍ତାନ ବିପକ୍ଷ ଭାରତର ଘରୋଇ ସିରିଜ୍ରୁ ମଧ୍ୟ ସେ ବାଦ୍ ପଡ଼ିଥିଲେ। ପରବର୍ତ୍ତୀ ସମୟରେ ଆଉ ଏକ ଗୋଡ଼ ଆଘାତ ତାଙ୍କ ଫେରିବା ପ୍ରକ୍ରିୟାକୁ ବିଳମ୍ବ କରିଥିଲା। ତେଣୁ ଅଷ୍ଟ୍ରେଲିଆ ‘ଏ’ ବିପକ୍ଷ ଏହି ସିରିଜ୍ ତାଙ୍କ ଫିଟନେସ୍ ଓ ମ୍ୟାଚ୍ ଫିଟନେସ୍ ପରୀକ୍ଷା ପାଇଁ ଗୁରୁତ୍ୱପୂର୍ଣ୍ଣ ହେବ।
ଅଷ୍ଟ୍ରେଲିଆ ‘ଏ’ ବିପକ୍ଷ ଭାରତ ‘ଏ’ ସିରିଜ୍ରେ ପ୍ରଥମେ ସେପ୍ଟେମ୍ବର ୨୨ରୁ ୨୫ ଏବଂ ସେପ୍ଟେମ୍ବର ୨୯ରୁ ଅକ୍ଟୋବର ୨ ପର୍ଯ୍ୟନ୍ତ ଦୁଇଟି ବହୁଦିନିଆ ମ୍ୟାଚ୍ ଖେଳାଯିବ। ଏହାପରେ ଅକ୍ଟୋବର ୬, ୯ ଓ ୧୧ରେ ତିନିଟି ଦିନିକିଆ ମ୍ୟାଚ୍ ହେବ। ହାର୍ଦ୍ଦିକ ଫିଟନେସ୍ କ୍ଲିୟର କରି ଏହି ମ୍ୟାଚ୍ଗୁଡ଼ିକରେ ଖେଳିଲେ, ଦୀର୍ଘ ସମୟ ପରେ ପ୍ରତିଯୋଗିତାମୂଳକ କ୍ରିକେଟ୍କୁ ଫେରିବା ସହ ନିଜ ଫିଟନେସ୍ ଓ ଫର୍ମ ପରଖିବାର ସୁଯୋଗ ପାଇବେ। ତିନୋଟି ମ୍ୟାଚ୍ ମଧ୍ୟରେ ତାଙ୍କ ଶରୀର କିପରି ପ୍ରତିକ୍ରିୟା କରୁଛି ଏବଂ ମ୍ୟାଚ୍ର ଚାପ ସମ୍ଭାଳିବାକୁ ସେ କେତେ ପ୍ରସ୍ତୁତ, ତାହା ମଧ୍ୟ ଚୟନକର୍ତ୍ତାଙ୍କ ପାଇଁ ଗୁରୁତ୍ୱ ବହନ କରିବ।
