Delhi MCD: ସତ୍ୟ ନିକେତନ ଘଟଣା ପରେ ଆକ୍ସନ୍ ମୋଡ୍ରେ ମହାନଗର ନିଗମ, ୩୪ ଘର ଭଙ୍ଗାଯିବା ସହ ୧୭ ସମ୍ପତ୍ତି ସିଲ୍
ନୂଆଦିଲ୍ଲୀ: ଦିଲ୍ଲୀର ସତ୍ୟ ନିକେତନରେ ପିଜି ଚାଲୁଥିବା ଏକ କୋଠା ଭୁଶୁଡ଼ି ୭ ଜଣଙ୍କ ମୃତ୍ୟୁ ପରେ ଅବୈଧ ଓ ବିପଜ୍ଜନକ ନିର୍ମାଣ ବିରୋଧରେ ମହାନଗର ନିଗମର କାର୍ଯ୍ୟାନୁଷ୍ଠାନ ଜୋରଦାର ହୋଇଛି। ଗତ ଦୁଇ ଦିନରେ ଏମ୍ସିଡିର ୧୨ଟି ଜୋନ୍ରେ ୩୪ଟି ସମ୍ପତ୍ତି ବିରୋଧରେ ଧ୍ୱଂସ କାର୍ଯ୍ୟାନୁଷ୍ଠାନ ନିଆଯାଇଥିବା ବେଳେ ୧୭ଟି ସମ୍ପତ୍ତିକୁ ସିଲ୍ କରାଯାଇଛି। ଅବୈଧ ନିର୍ମାଣ, ନିୟମ ଉଲ୍ଲଂଘନ ଓ ଅସୁରକ୍ଷିତ କୋଠା ଚିହ୍ନଟ କରିବା ଉପରେ ଏବେ ଗୁରୁତ୍ୱ ଦିଆଯାଉଛି।
ଏହାସହ ଦିଲ୍ଲୀରେ ପିଜି ଭାବେ ବ୍ୟବହୃତ ହେଉଥିବା ପ୍ରାୟ ୧,୨୪୩ଟି ଭବନକୁ ଚିହ୍ନଟ କରାଯାଇଛି। ଏହି ଭବନଗୁଡ଼ିକରେ ପ୍ରାୟ ୨୪ ହଜାର ଲୋକ ରହୁଥିବା ଜଣାପଡ଼ିଛି। ସେଗୁଡ଼ିକର ଢାଞ୍ଚାଗତ ସୁରକ୍ଷା ଯାଞ୍ଚ କରିବା ସହ ଭବନଗୁଡ଼ିକୁ ସୁରକ୍ଷିତ, ସାମାନ୍ୟ ମରାମତି ଆବଶ୍ୟକ, ବଡ଼ ମରାମତି ଆବଶ୍ୟକ ଏବଂ ବିପଜ୍ଜନକ—ଏଭଳି ବର୍ଗରେ ଚିହ୍ନଟ କରାଯାଉଛି। ବିଶେଷକରି ୫ ମହଲାରୁ ଅଧିକ ଆରସିସି ଢାଞ୍ଚା ଏବଂ ୪ ମହଲାରୁ ଅଧିକ ଲୋଡ୍-ବିୟରିଂ କୋଠା ଉପରେ ଅଧିକ ନଜର ରହିଛି।
ଏମ୍ସିଡି ପକ୍ଷରୁ ପିଜି ଭବନଗୁଡ଼ିକର ସର୍ଭେ କାମ ସେପ୍ଟେମ୍ବର ୧୦ ସୁଦ୍ଧା ଶେଷ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ସର୍ଭେ ସମୟରେ ଢାଞ୍ଚାଗତ ଦୁର୍ବଳତା, ଅନଧିକୃତ ନିର୍ମାଣ, ସମ୍ପତ୍ତିର ଭୁଲ ବ୍ୟବହାର କିମ୍ବା ଅନ୍ୟ କୌଣସି ସୁରକ୍ଷା ଉଲ୍ଲଂଘନ ମିଳିଲେ ନିୟମ ଅନୁଯାୟୀ ପଦକ୍ଷେପ ନିଆଯିବ। ସତ୍ୟ ନିକେତନ ଘଟଣା ପରେ ରାଜଧାନୀରେ ପିଜି ଓ ଅନ୍ୟ ଆବାସିକ କୋଠାର ସୁରକ୍ଷାକୁ ନେଇ ପ୍ରଶାସନର ତତ୍ପରତା ଏବେ ଆହୁରି ବଢ଼ିଛି।
