BSP Politics: ମାୟାବତୀଙ୍କ ଶର୍ତ୍ତ ପରେ ରାଜନୀତିରୁ ସନ୍ନ୍ୟାସ ନେଲେ ଅଶୋକ ସିଦ୍ଧାର୍ଥ, ଆକାଶ ଆନନ୍ଦଙ୍କ ଭବିଷ୍ୟତ ଉପରେ ନଜର
ଉତ୍ତରପ୍ରଦେଶ: ଉତ୍ତରପ୍ରଦେଶର ରାଜନୀତିରେ ବିଏସ୍ପିକୁ ନେଇ ବଡ଼ ଘଟଣାକ୍ରମ ସାମ୍ନାକୁ ଆସିଛି। ପୂର୍ବତନ ରାଜ୍ୟସଭା ସାଂସଦ ତଥା ବିଏସ୍ପିରୁ ବହିଷ୍କୃତ ନେତା ଅଶୋକ ସିଦ୍ଧାର୍ଥ ରାଜନୀତିରୁ ସନ୍ନ୍ୟାସ ନେବାକୁ ଘୋଷଣା କରିଛନ୍ତି। ସେ ଦଳ ସୁପ୍ରିମୋ ମାୟାବତୀଙ୍କ ଭଣଜା ଆକାଶ ଆନନ୍ଦଙ୍କ ଶ୍ୱଶୁର। ଅଶୋକ ସିଦ୍ଧାର୍ଥ Xରେ ପୋଷ୍ଟ କରି ନିଜର ରାଜନୈତିକ ଓ ସାମାଜିକ ଜୀବନରୁ ସନ୍ନ୍ୟାସ ନେଉଥିବା ଜଣାଇଛନ୍ତି। ତାଙ୍କ ଏହି ଘୋଷଣା ମାୟାବତୀଙ୍କ ସେହି ବୟାନର ଗୋଟିଏ ଦିନ ପରେ ଆସିଛି, ଯେଉଁଥିରେ ସେ ଅଶୋକ ସିଦ୍ଧାର୍ଥ ରାଜନୀତିରୁ ସମ୍ପୂର୍ଣ୍ଣ ଦୂରେଇଲେ ଆକାଶ ଆନନ୍ଦଙ୍କୁ ଦଳରେ ପୁଣି ଦାୟିତ୍ୱ ଦେବା ନେଇ ବିଚାର କରାଯାଇପାରେ ବୋଲି କହିଥିଲେ।
ମାୟାବତୀ ଅଭିଯୋଗ କରିଥିଲେ ଯେ ଅଶୋକ ସିଦ୍ଧାର୍ଥ ଦଳର ମିଶନ ଅପେକ୍ଷା ବ୍ୟକ୍ତିଗତ ସ୍ୱାର୍ଥ ଓ ରାଜନୈତିକ ଆକାଂକ୍ଷାକୁ ଅଧିକ ଗୁରୁତ୍ୱ ଦେଇଛନ୍ତି। ଏହାର ପ୍ରଭାବ ତାଙ୍କ ଜ୍ୱାଇଁ ଆକାଶ ଆନନ୍ଦଙ୍କ ରାଜନୈତିକ ଭୂମିକା ଉପରେ ମଧ୍ୟ ପଡ଼ିଥିବା ମାୟାବତୀ କହିଥିଲେ। ତେଣୁ ଅଶୋକ ସିଦ୍ଧାର୍ଥ ରାଜନୀତିକ ଆକାଂକ୍ଷା ଛାଡ଼ି ସମ୍ପୂର୍ଣ୍ଣ ସନ୍ନ୍ୟାସ ନେଲେ ହିଁ ଆକାଶଙ୍କୁ ପୁଣି ବିଏସ୍ପିରେ ସକ୍ରିୟ ଦାୟିତ୍ୱ ଦେବା ନେଇ ସହାନୁଭୂତିର ସହ ବିଚାର କରାଯିବ ବୋଲି ସେ ସ୍ପଷ୍ଟ କରିଥିଲେ। ଏହାପରେ ଅଶୋକ ସିଦ୍ଧାର୍ଥ ନିଜ ଘୋଷଣାରେ ମାୟାବତୀଙ୍କୁ ‘ଭଉଣୀ’ ବୋଲି ସମ୍ବୋଧନ କରି ତାଙ୍କ ଆଦେଶ ନିଜ ପାଇଁ ସର୍ବୋପରି ବୋଲି କହିଛନ୍ତି।
ଅଶୋକ ସିଦ୍ଧାର୍ଥ କହିଛନ୍ତି ଯେ ମାୟାବତୀଙ୍କ ମାର୍ଗଦର୍ଶନରେ ସେ ଦୀର୍ଘ ୩୫ ବର୍ଷ ଧରି ବିଏସ୍ପି, କାଂଶୀରାମ ଓ ବାବାସାହେବ ଡ. ଭୀମରାଓ ଆମ୍ବେଦକରଙ୍କ ମିଶନ ପାଇଁ ସମର୍ପିତ ହୋଇ କାମ କରିଛନ୍ତି। ମାୟାବତୀ ତାଙ୍କୁ ଯେଉଁ ଦାୟିତ୍ୱ ଦେଇଥିଲେ, ତାହାକୁ ନିଜ ସାମର୍ଥ୍ୟ ଅନୁସାରେ ପୂରଣ କରିବାକୁ ସେ ସବୁବେଳେ ଚେଷ୍ଟା କରିଥିବା ମଧ୍ୟ କହିଛନ୍ତି। ଅଶୋକଙ୍କ ସନ୍ନ୍ୟାସ ଘୋଷଣା ପରେ ଏବେ ସମସ୍ତଙ୍କ ନଜର ଆକାଶ ଆନନ୍ଦଙ୍କ ଉପରେ ରହିଛି। ତେବେ ମାୟାବତୀ ଆକାଶଙ୍କୁ ପୁଣି ବିଏସ୍ପିରେ ସକ୍ରିୟ ଦାୟିତ୍ୱ ଦେବେ କି ନାହିଁ, ତାହା ଆଗାମୀ ଦିନରେ ସ୍ପଷ୍ଟ ହେବ।
