Red Fort Blast: NIA ଚାର୍ଜସିଟ୍ରେ ଚାଞ୍ଚଲ୍ୟକର ଖୁଲାସା, ବିସ୍ଫୋରକ ଯୋଜନା ସହ ଉମରଙ୍କ ଲିଙ୍କ୍ ନେଇ ନୂଆ ତଥ୍ୟ
ନୂଆଦିଲ୍ଲୀ: ଦିଲ୍ଲୀ ଲାଲକିଲ୍ଲା ନିକଟରେ ୨୦୨୫ ନଭେମ୍ବର ୧୦ରେ ହୋଇଥିବା କାର୍ ବିସ୍ଫୋରଣ ମାମଲାରେ ଏନ୍ଆଇଏ ଚାର୍ଜସିଟ୍ରୁ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ଏନ୍ଆଇଏ ଅନୁସାରେ, ମାମଲାର ମୁଖ୍ୟ ଅଭିଯୁକ୍ତ ଉମର ଉନ୍-ନବୀ ନୁହ୍ରେ ଏକ ଭଡ଼ା ଘରେ ଲୁଚି ରହିଥିବା ସମୟରେ ନିଜ ପରିସ୍ରାକୁ ପଲିଥିନ୍ ବ୍ୟାଗ୍ରେ ସଂରକ୍ଷଣ କରୁଥିଲା। ଘର ଭିତରୁ ଦୁର୍ଗନ୍ଧ ବାହାରିବା ପରେ ଘରମାଲିକାଣୀ ତାଙ୍କ ସ୍ୱାମୀଙ୍କୁ ଏନେଇ ଜଣାଇଥିବା ଚାର୍ଜସିଟ୍ରେ ଉଲ୍ଲେଖ ରହିଛି।
ଏନ୍ଆଇଏର ଦାବି ଅନୁସାରେ, ଅଭିଯୁକ୍ତଙ୍କ ପେନ୍ଡ୍ରାଇଭ୍ରୁ ମିଳିଥିବା ଏକ ପିଡିଏଫ୍ ଫାଇଲ୍ରେ ୟୁରିଆ ନାଇଟ୍ରେଟ୍ ଆଧାରିତ ବିସ୍ଫୋରକ ପ୍ରସ୍ତୁତି ସମ୍ପର୍କିତ ତଥ୍ୟ ଥିଲା। ସେଥିରେ ୟୁରିଆର ବିକଳ୍ପ ଉତ୍ସ ଭାବେ ପରିସ୍ରାରୁ ୟୁରିଆ ବାହାର କରିବାର ଉଲ୍ଲେଖ ଥିବା ତଦନ୍ତକାରୀ ସଂସ୍ଥା କହିଛି। ତେବେ ବିସ୍ଫୋରକ ପ୍ରସ୍ତୁତିର ବିସ୍ତୃତ ପ୍ରକ୍ରିୟା ଏଠାରେ ଦିଆଯାଉନାହିଁ। ଏହି ମାମଲାରେ ଉମର ଉନ୍-ନବୀଙ୍କୁ ଏନ୍ଆଇଏ ଆତଙ୍କୀ ମଡ୍ୟୁଲର କଥିତ ମାଷ୍ଟରମାଇଣ୍ଡ ଏବଂ ଅପରେସନାଲ୍ ଇନ୍-ଚାର୍ଜ ବୋଲି ଦର୍ଶାଇଛି।
ଚାର୍ଜସିଟ୍ ଅନୁଯାୟୀ, ନଭେମ୍ବର ୧୦ର ବିସ୍ଫୋରଣରେ ବ୍ୟବହୃତ ଆଇ-୨୦ କାର୍କୁ ଏକ ଯାନବାହୀ ବିସ୍ଫୋରକ ଉପକରଣରେ ପରିଣତ କରାଯାଇଥିଲା ଏବଂ ବିସ୍ଫୋରଣ ସମୟରେ ଉମର ଗାଡ଼ି ଭିତରେ ଥିବା ଏନ୍ଆଇଏ କହିଛି। ବିସ୍ଫୋରଣସ୍ଥଳରୁ ମିଳିଥିବା ଜୈବିକ ନମୁନାର ଡିଏନ୍ଏ ପରୀକ୍ଷାରୁ ତାଙ୍କ ଉପସ୍ଥିତି ସ୍ପଷ୍ଟ ହୋଇଥିବା ଦାବି କରାଯାଇଛି। ଏନ୍ଆଇଏ ଅନୁସାରେ, ଏହି ଆକ୍ରମଣ ପଛରେ ପ୍ରାୟ ଦୁଇ ବର୍ଷର ଯୋଜନା ଥିଲା ଏବଂ ଉମର ଉନ୍-ନବୀ ନିଷ୍କ୍ରିୟ ହୋଇପଡ଼ିଥିବା ଆତଙ୍କୀ ମଡ୍ୟୁଲକୁ ପୁଣି ସକ୍ରିୟ କରିବା ପାଇଁ କାମ କରୁଥିଲା।
