Congo School Fire: ଦୁଇ ସ୍କୁଲରେ ଭୟଙ୍କର ଅଗ୍ନିକାଣ୍ଡ, ୨୬ ଛାତ୍ରଛାତ୍ରୀଙ୍କ ମୃତ୍ୟୁ; ଦଶାଧିକ ଆହତ
ନୂଆଦିଲ୍ଲୀ: ପୂର୍ବ କଙ୍ଗୋର ବୁକାଭୁ ସହରରେ ଗୁରୁବାର ଏକ ଭୟାବହ ଅଗ୍ନିକାଣ୍ଡରେ ଦୁଇଟି ପାଖାପାଖି ସ୍କୁଲ ପ୍ରଭାବିତ ହୋଇଛି। ଏହି ଦୁର୍ଘଟଣାରେ ଅତିକମରେ ୨୬ ଜଣ ଛାତ୍ରଛାତ୍ରୀଙ୍କ ମୃତ୍ୟୁ ଘଟିଥିବା ବେଳେ ଦଶାଧିକ ଆହତ ହୋଇଛନ୍ତି। ପ୍ରଥମେ ବିଦ୍ରୋହୀ ପ୍ରଶାସନ ପକ୍ଷରୁ ୨୪ ଜଣଙ୍କ ମୃତ୍ୟୁ ଓ ୨୯ ଜଣ ଆହତ ହୋଇଥିବା କୁହାଯାଇଥିଲା। ପରେ ପ୍ରାଦେଶିକ ପ୍ରଶାସନ ମୃତ୍ୟୁସଂଖ୍ୟା ୨୬କୁ ବଢ଼ିଥିବା ସୂଚନା ଦେଇଛି। ମୃତକଙ୍କ ମଧ୍ୟରେ ୧୯ ଜଣ ଛାତ୍ରୀ ଓ ୭ ଜଣ ଛାତ୍ର ଥିବା ଜଣାପଡ଼ିଛି।
ସ୍ଥାନୀୟ ଅଧିକାରୀଙ୍କ ଅନୁସାରେ, ଏକ ଘରୁ ନିଆଁ ଲାଗିବା ପରେ ଏହା ପାଖରେ ଥିବା ଫୁରାହା ମାଧ୍ୟମିକ ସ୍କୁଲ ଓ ଉଜାମା ପ୍ରାଥମିକ ସ୍କୁଲକୁ ବ୍ୟାପିଥିଲା। ଘଟଣା ସମୟରେ ସ୍କୁଲରୁ ବାହାରିବା ରାସ୍ତା ସଙ୍କୁଚିତ ଥିବାରୁ ଛାତ୍ରଛାତ୍ରୀଙ୍କ ମଧ୍ୟରେ ଆତଙ୍କ ଓ ଠେଲାପେଲା ସୃଷ୍ଟି ହୋଇଥିଲା। କିଛି ଛାତ୍ରଛାତ୍ରୀ ଝରକା ଦେଇ ବାହାରିବାକୁ ଚେଷ୍ଟା କରିଥିବା ବେଳେ ଅନେକେ ଭିତରେ ଫସିଯାଇ ଧୂଆଁରେ ଶ୍ୱାସରୁଦ୍ଧ ହୋଇଥିଲେ। ଅଗ୍ନିକାଣ୍ଡରେ ପ୍ରାୟ ୩୦୦ଟି କାଠ ଘର ମଧ୍ୟ ନଷ୍ଟ ହୋଇଥିବା ରିପୋର୍ଟ ଆସିଛି। ଆହତମାନଙ୍କୁ ସ୍ଥାନୀୟ ଚିକିତ୍ସାକେନ୍ଦ୍ରରେ ଭର୍ତ୍ତି କରାଯାଇଛି ଏବଂ ଅଧିକ ସଂଖ୍ୟାରେ ଆହତ ଆସିବାରୁ ଚିକିତ୍ସାକର୍ମୀଙ୍କୁ ମଧ୍ୟ ଚାପର ସାମ୍ନା କରିବାକୁ ପଡ଼ୁଛି।
ବୁକାଭୁ ସହର ଫେବୃଆରୀ ୨୦୨୫ରୁ ରୁୱାଣ୍ଡା ସମର୍ଥିତ ଏମ୍-୨୩ ବିଦ୍ରୋହୀ ଗୋଷ୍ଠୀର ନିୟନ୍ତ୍ରଣରେ ରହିଛି। ଏହି ଅଞ୍ଚଳରେ ଦୀର୍ଘଦିନ ଧରି ସଶସ୍ତ୍ର ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଚାଲିଥିବା ବେଳେ ସ୍ୱାସ୍ଥ୍ୟସେବା ମଧ୍ୟ ଚାପରେ ରହିଛି। ସେହି ସମୟରେ ଅଞ୍ଚଳରେ ଇବୋଲା ସଂକ୍ରମଣ ଯୋଗୁଁ ଚିକିତ୍ସା ବ୍ୟବସ୍ଥା ଉପରେ ଅତିରିକ୍ତ ଚାପ ପଡ଼ିଛି। ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ ଘଟଣାର ତଦନ୍ତ ଜାରି ରହିଛି।
