PM Modi: ହାତ ଧରି ଇରାନ ରାଷ୍ଟ୍ରପତିଙ୍କୁ BRICS ମଞ୍ଚକୁ ନେଲେ ମୋଦୀ, ବିଶ୍ୱକୁ ବଡ଼ ବାର୍ତ୍ତା ଦେଲା ଭାରତର କୂଟନୀତି
ନୂଆଦିଲ୍ଲୀ: ନୂଆଦିଲ୍ଲୀରେ ଆୟୋଜିତ BRICS ବିଜନେସ୍ ଫୋରମ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଇରାନ ରାଷ୍ଟ୍ରପତି ମାସୁଦ ପେଜେଶ୍କିଆନଙ୍କ ଏକ ଫଟୋ ଏବେ ଭାରତର କୂଟନୈତିକ ଆଭିମୁଖ୍ୟକୁ ନେଇ ଚର୍ଚ୍ଚାରେ ରହିଛି। ଭାରତ ମଣ୍ଡପମ୍ରେ ହେଉଥିବା କାର୍ଯ୍ୟକ୍ରମକୁ ମୋଦୀ ନିଜେ ପେଜେଶ୍କିଆନଙ୍କ ହାତ ଧରି ନେଇଥିବା ଦୃଶ୍ୟ ସାମ୍ନାକୁ ଆସିଛି। ତାଙ୍କ ସହ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଓ ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ୍ ରାମାଫୋସା ମଧ୍ୟ ଚାଲୁଥିବା ଦେଖାଯାଇଥିଲା।
ଏହି ଫଟୋ ବଦଳୁଥିବା ବିଶ୍ୱ ବ୍ୟବସ୍ଥା ମଧ୍ୟରେ ଭାରତର ସନ୍ତୁଳିତ କୂଟନୀତିକୁ ପ୍ରତିଫଳିତ କରିଛି। ଇରାନ ଓ ରୁଷିଆ ସହ ସମ୍ପର୍କ ରଖିବା ସହ ଭାରତ ଆମେରିକା ଓ ପଶ୍ଚିମ ଦେଶଗୁଡ଼ିକ ସହ ନିଜର ରଣନୈତିକ ସହଭାଗିତାକୁ ମଧ୍ୟ ଜାରି ରଖିଛି। ଇରାନ ଓ ଇସ୍ରାଏଲ-ଆମେରିକା ମଧ୍ୟରେ ଚାଲିଥିବା ତିକ୍ତତା ଏବଂ ରୁଷିଆ-ୟୁକ୍ରେନ୍ ଯୁଦ୍ଧ ଭଳି ଜଟିଳ ପରିସ୍ଥିତି ମଧ୍ୟରେ ଭାରତ ସମସ୍ତ ପକ୍ଷ ସହ ଆଲୋଚନାର ରାସ୍ତା ଖୋଲା ରଖିଛି। ଏହି ଗସ୍ତ ଇରାନ ରାଷ୍ଟ୍ରପତିଙ୍କ ଭାରତରେ ପ୍ରଥମ ରାଷ୍ଟ୍ରପତି ଭାବେ ଗସ୍ତ ବୋଲି ମଧ୍ୟ ଉଲ୍ଲେଖ କରାଯାଇଛି।
ପରେ ପ୍ରଧାନମନ୍ତ୍ରୀ ମୋଦୀ ଇରାନ ରାଷ୍ଟ୍ରପତିଙ୍କ ସହ ଦ୍ୱିପାକ୍ଷିକ ଆଲୋଚନା କରିଥିଲେ। ଦୁଇ ନେତା ଭାରତ-ଇରାନ ସମ୍ପର୍କ ସହ ପଶ୍ଚିମ ଏସିଆର ସାମ୍ପ୍ରତିକ ସ୍ଥିତି ଉପରେ ଆଲୋଚନା କରିଥିଲେ। ମଧ୍ୟପ୍ରାଚ୍ୟ ସଙ୍କଟର ଦୀର୍ଘସ୍ଥାୟୀ ସମାଧାନ ପାଇଁ ଭାରତ ‘ଆଲୋଚନା ଓ କୂଟନୀତି’କୁ ଆଗକୁ ବଢ଼ିବାର ମାର୍ଗ ବୋଲି ଗୁରୁତ୍ୱ ଦେଇଛି। ଏହାସହ ଶକ୍ତି ସୁରକ୍ଷାକୁ ଗୁରୁତ୍ୱ ଦେଇ ଯୋଗାଣ ନେଇ ଯାଉଥିବା ଜାହାଜଗୁଡ଼ିକର ସୁରକ୍ଷିତ ଯାତାୟାତ ଉପରେ ମଧ୍ୟ ଭାରତ ଗୁରୁତ୍ୱାରୋପ କରିଛି। ଆଲୋଚନା ପରେ ମୋଦୀ କହିଥିଲେ ଯେ, ପେଜେଶ୍କିଆନଙ୍କ ଭାରତ ଗସ୍ତ ତାଙ୍କର ପ୍ରଥମ ଗସ୍ତ ହୋଇଥିବାରୁ ଏହା ଆହୁରି ବିଶେଷ। ଦୁଇ ଦେଶର ବନ୍ଧୁତ୍ୱକୁ ଦୀର୍ଘମିଆଦୀ ଓ ଉଭୟ ପକ୍ଷ ପାଇଁ ଲାଭଦାୟକ ରଣନୀତି ମାଧ୍ୟମରେ ଆଗକୁ ନେବା ନେଇ ସହମତି ରହିଥିବା ସେ କହିଥିଲେ।
