Asian Games 2026: ଗୋଲ୍ଡ ଜିତିଲେ କମଲିନୀ, ୭୫ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କଲେ ତାମିଲନାଡୁ ସରକାର
ତାମିଲନାଡୁ: ଜାପାନରେ ଚାଲିଥିବା ୨୦ତମ ଏସିଆନ୍ ଗେମ୍ସରେ ଭାରତୀୟ ମହିଳା କ୍ରିକେଟ୍ ଦଳ ସ୍ୱର୍ଣ୍ଣ ପଦକ ଜିତିବା ପରେ ତାମିଲନାଡୁର କ୍ରିକେଟର ଜି. କମଲିନୀଙ୍କ ପାଇଁ ବଡ଼ ପୁରସ୍କାର ଘୋଷଣା ହୋଇଛି। ଦଳର ସ୍ୱର୍ଣ୍ଣ ବିଜୟରେ ସାମିଲ ଥିବା କମଲିନୀଙ୍କୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ସରକାର ୭୫ ଲକ୍ଷ ଟଙ୍କାର ନଗଦ ରାଶି ପ୍ରୋତ୍ସାହନ ଘୋଷଣା କରିଛନ୍ତି। କମଲିନୀ ମଦୁରାଇର ଜଣେ ୱିକେଟକିପର-ବ୍ୟାଟର ଏବଂ ଭାରତୀୟ ମହିଳା ଦଳର ସଦସ୍ୟ ଅଟନ୍ତି।
ଭାରତୀୟ ମହିଳା ଦଳ ଏସିଆନ୍ ଗେମ୍ସର ମହିଳା ଟି-୨୦ କ୍ରିକେଟ୍ ଫାଇନାଲ୍ରେ ଶ୍ରୀଲଙ୍କାକୁ ୧୪୭ ରନ୍ରେ ପରାସ୍ତ କରି ସ୍ୱର୍ଣ୍ଣ ପଦକ ଜିତିଛି। ଭାରତ ପ୍ରଥମେ ବ୍ୟାଟିଂ କରି ୩ ୱିକେଟ୍ରେ ୨୧୬ ରନ୍ କରିଥିଲା। ଏହାର ଜବାବରେ ଶ୍ରୀଲଙ୍କା ମାତ୍ର ୬୯ ରନ୍ରେ ଅଲଆଉଟ୍ ହୋଇଥିଲା। ଏହି ବିଜୟ ସହ ଭାରତ ୨୦୨୬ ଏସିଆନ୍ ଗେମ୍ସର ପ୍ରଥମ ସ୍ୱର୍ଣ୍ଣ ପଦକ ହାସଲ କରିଥିଲା।
ମୁଖ୍ୟମନ୍ତ୍ରୀ ବିଜୟ ସୋସିଆଲ୍ ମିଡିଆରେ ଭାରତୀୟ ଦଳକୁ ଅଭିନନ୍ଦନ ଜଣାଇବା ସହ କମଲିନୀଙ୍କ ସଫଳତାକୁ ପ୍ରଶଂସା କରିଥିଲେ। କମଲିନୀଙ୍କ ଏହି ସଫଳତା ତାମିଲନାଡୁର ଯୁବପିଢ଼ି ଓ ମହିଳାମାନଙ୍କୁ ନୂଆ ପ୍ରେରଣା ଏବଂ ଆତ୍ମବିଶ୍ୱାସ ଦେବ ବୋଲି ସେ କହିଥିଲେ। ଏହା ସହ ରାଜ୍ୟ ସରକାର ପ୍ରତିଭାବାନ୍ କ୍ରୀଡ଼ାବିତ୍ମାନଙ୍କୁ ସହଯୋଗ ଜାରି ରଖିବ ବୋଲି ମଧ୍ୟ ଜଣାଇଛନ୍ତି।
