Asian Games 2026: ସଫ୍ଟ ଟେନିସ୍ରେ ଭାରତର ପ୍ରଥମ ପଦକ, ଜୟ ମୀନା ଜିତିଲେ ଐତିହାସିକ ବ୍ରୋଞ୍ଜ
ନୂଆଦିଲ୍ଲୀ: ଏସିଆନ୍ ଗେମ୍ସରେ ଭାରତ ପାଇଁ ଆଉ ଏକ ଐତିହାସିକ ଅଧ୍ୟାୟ ଯୋଡ଼ିଛନ୍ତି ଜୟ ମୀନା। ୨୬ ବର୍ଷୀୟ ମଧ୍ୟପ୍ରଦେଶର ଏହି ଖେଳାଳି ପୁରୁଷ ସିଙ୍ଗଲ୍ସ ସଫ୍ଟ ଟେନିସ୍ରେ ବ୍ରୋଞ୍ଜ ପଦକ ଜିତି ଏହି କ୍ରୀଡ଼ାରେ ଭାରତକୁ ଏସିଆନ୍ ଗେମ୍ସର ପ୍ରଥମ ପଦକ ଦେଇଛନ୍ତି। ଜାପାନର ଟାକୁୟା କୁରୋସାକାଙ୍କ ବିପକ୍ଷରେ ସେମିଫାଇନାଲରେ ୨-୪ରେ ପରାଜୟ ପରେ ଜୟଙ୍କ ଅଭିଯାନ ଶେଷ ହୋଇଥିଲେ ମଧ୍ୟ ସେ ଇତିହାସ ରଚିଛନ୍ତି।
ସେମିଫାଇନାଲରେ ଜୟ ଆରମ୍ଭରେ ତିନୋଟି ଗେମ୍ରେ ପଛରେ ପଡ଼ିଥିଲେ। କିନ୍ତୁ ସେ ଜୋରଦାର ପ୍ରତ୍ୟାବର୍ତ୍ତନ କରି ଚତୁର୍ଥ ଗେମ୍କୁ ୪-୧ ଏବଂ ପଞ୍ଚମ ଗେମ୍କୁ ୬-୪ରେ ଜିତି ମ୍ୟାଚ୍କୁ ରୋମାଞ୍ଚକର ସ୍ଥିତିକୁ ନେଇଥିଲେ। ତେବେ ଷଷ୍ଠ ଗେମ୍ରେ କୁରୋସାକା ୪-୧ରେ ବିଜୟୀ ହୋଇ ଫାଇନାଲରେ ପହଞ୍ଚିଥିଲେ। ଜୟଙ୍କ ସେମିଫାଇନାଲ୍ ସ୍କୋର ୩-୫, ୧-୪, ୧-୪, ୪-୧, ୬-୪, ୧-୪ ରହିଥିଲା।
ଏହା ଜୟ ମୀନାଙ୍କ ତୃତୀୟ ଏସିଆନ୍ ଗେମ୍ସ ଅଂଶଗ୍ରହଣ। ଡେୱାସର ଏହି ଖେଳାଳି ୨୦୨୨ ନ୍ୟାସନାଲ୍ ଗେମ୍ସରେ ପୁରୁଷ ସିଙ୍ଗଲ୍ସରେ ସ୍ୱର୍ଣ୍ଣ ପଦକ ଜିତିଥିଲେ। ଏହା ପୂର୍ବରୁ ୨୦୨୪ ୱାର୍ଲ୍ଡ ସଫ୍ଟ ଟେନିସ୍ ଚାମ୍ପିଅନସିପ୍ରେ ଆଧ୍ୟା ତିୱାରୀଙ୍କ ସହ ମିଶ୍ରିତ ଡବଲ୍ସରେ ବ୍ରୋଞ୍ଜ ଜିତି ଭାରତ ପାଇଁ ପ୍ରଥମ ପଦକ ଆଣିଥିଲେ। ଏବେ ଏସିଆନ୍ ଗେମ୍ସରେ ଐତିହାସିକ ବ୍ରୋଞ୍ଜ ସହ ଭାରତୀୟ ସଫ୍ଟ ଟେନିସ୍ରେ ନିଜ ନାଁ ଲେଖାଇଛନ୍ତି ଜୟ।
