Selectors Meeting: ଅଗରକରଙ୍କ ଅନୁପସ୍ଥିତିରେ ପ୍ରଜ୍ଞାନ ଓଝାଙ୍କୁ ମିଳିଲା ଦାୟିତ୍ୱ, ନୂଆ ଚିଫ୍ ସିଲେକ୍ଟର ନେଇ ଚର୍ଚ୍ଚା
ନୂଆଦିଲ୍ଲୀ: ଅଜିତ ଅଗରକରଙ୍କ କାର୍ଯ୍ୟକାଳ ଅକ୍ଟୋବର ୪ରେ ଶେଷ ହେବାକୁ ଥିବାବେଳେ, ତାଙ୍କ ଅନୁପସ୍ଥିତିରେ ପ୍ରଜ୍ଞାନ ଓଝାଙ୍କୁ ଚୟନ କମିଟିର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଦାୟିତ୍ୱ ଦିଆଯାଇଛି। ମଙ୍ଗଳବାର ଗୌହାଟୀରେ ଚୟନ କମିଟିର ବୈଠକ ବସିଥିଲା। ଏହି ବୈଠକରେ ନ୍ୟୁଜିଲାଣ୍ଡ ଗସ୍ତ ସମ୍ପର୍କରେ ଦଳ ଚୟନ ନେଇ ଆଲୋଚନା ହୋଇଥିବା ରିପୋର୍ଟ ରହିଛି। BCCIର ବର୍ତ୍ତମାନର ପୁରୁଷ ଚୟନ କମିଟିରେ ଅଜିତ ଅଗରକରଙ୍କ ସହ ଶିବ ସୁନ୍ଦର ଦାସ, ଅଜୟ ରାତ୍ରା, ଆର୍ପି ସିଂହ ଓ ପ୍ରଜ୍ଞାନ ଓଝା ସଦସ୍ୟ ଅଛନ୍ତି।
ପ୍ରଜ୍ଞାନ ଓଝା ଭାରତ ପାଇଁ ୨୪ଟି ଟେଷ୍ଟ ମ୍ୟାଚ୍ରେ ୧୧୩ ୱିକେଟ୍ ନେଇଥିବାବେଳେ ୧୮ଟି ଦିନିକିଆରେ ୨୧ ୱିକେଟ୍ ଏବଂ ୬ଟି ଟି-୨୦ ମ୍ୟାଚ୍ରେ ୧୦ ୱିକେଟ୍ ନେଇଥିଲେ। ବର୍ତ୍ତମାନ ଅଗରକରଙ୍କ ଅନୁପସ୍ଥିତିରେ ସେ ଚୟନ କମିଟିର ବୈଠକରେ ଅଧ୍ୟକ୍ଷତା କରୁଛନ୍ତି। ତେବେ ତାଙ୍କୁ ସ୍ଥାୟୀ ଭାବେ ମୁଖ୍ୟ ଚୟନକର୍ତ୍ତା କରାଯିବ କି ନାହିଁ, ସେନେଇ ଏପର୍ଯ୍ୟନ୍ତ ଔପଚାରିକ ଘୋଷଣା ହୋଇନାହିଁ। ମୁଖ୍ୟ ଚୟନକର୍ତ୍ତା ପଦ ପାଇଁ ଅନ୍ୟ ନାମ ନେଇ ମଧ୍ୟ ଚର୍ଚ୍ଚା ଚାଲିଛି।
ଅଜିତ ଅଗରକର ୨୦୨୩ରେ ଭାରତୀୟ ପୁରୁଷ ଦଳର ଚୟନ କମିଟିର ଅଧ୍ୟକ୍ଷ ହୋଇଥିଲେ। ତାଙ୍କ କାର୍ଯ୍ୟକାଳରେ ଭାରତ ୨୦୨୪ ଟି-୨୦ ବିଶ୍ୱକପ୍ ଏବଂ ୨୦୨୫ ଚାମ୍ପିଅନ୍ସ ଟ୍ରଫି ଜିତିଥିଲା। ଏବେ ତାଙ୍କ କାର୍ଯ୍ୟକାଳ ଶେଷ ହେବାକୁ ଥିବାରୁ ନୂଆ ମୁଖ୍ୟ ଚୟନକର୍ତ୍ତାଙ୍କୁ ନେଇ ଚର୍ଚ୍ଚା ବଢ଼ିଛି। ବର୍ତ୍ତମାନ ପ୍ରଜ୍ଞାନ ଓଝା ମଧ୍ୟବର୍ତ୍ତୀକାଳୀନ ଦାୟିତ୍ୱରେ ଥିବା ତଥ୍ୟ ସ୍ପଷ୍ଟ ହୋଇଥିଲେ ମଧ୍ୟ, ସ୍ଥାୟୀ ନିଯୁକ୍ତି ସମ୍ପର୍କରେ BCCIର ଅନ୍ତିମ ନିଷ୍ପତ୍ତିକୁ ଅପେକ୍ଷା କରାଯାଉଛି।
