Gurinder Singh Sangha:ଭାରତୀୟ ହକି ଅମ୍ପାୟାରଙ୍କ ନାମରେ ଯୌନ ନିର୍ଯାତନା ଅଭିଯୋଗ, Asian Games ଅଧାରୁ ଭାରତ ଫେରିଲେ ଗୁରିନ୍ଦର ସିଂହ ସଂଘା
ନୂଆଦିଲ୍ଲୀ : ଜାପାନରେ ଚାଲିଥିବା Asian Games 2026 ମଧ୍ୟରେ ଭାରତୀୟ ହକି ଅମ୍ପାୟାର ଓ ଟେକ୍ନିକାଲ୍ ଅଧିକାରୀ ଗୁରିନ୍ଦର ସିଂହ ସଂଘାଙ୍କୁ ଭାରତ ଫେରାଇ ଦିଆଯାଇଛି। ତାଙ୍କ ବିରୋଧରେ ଯୌନ ନିର୍ଯାତନା ସମ୍ପର୍କିତ ଏକାଧିକ ଅଭିଯୋଗ ଆସିଥିବା ନେଇ ରିପୋର୍ଟ ପ୍ରକାଶ ପାଇଛି। ହକି ଇଣ୍ଡିଆର ଜଣେ ଅଧିକାରୀ ପିଟିଆଇକୁ କହିଥିବା ଅନୁସାରେ, ମାଲେସିଆର ଜଣେ ମହିଳା ହକି ଅଧିକାରୀ ତାଙ୍କ ବିରୋଧରେ ଅଭିଯୋଗ କରିଥିଲେ। ନାଗୋୟାରେ ରହିବା ସମୟରେ ଜଣେ ହୋଟେଲ କର୍ମଚାରୀଙ୍କ ସହ ଅନୁଚିତ ବ୍ୟବହାର ନେଇ ମଧ୍ୟ ଅଭିଯୋଗ ଆସିଥିବା କୁହାଯାଇଛି।
ଗୁରିନ୍ଦର ସିଂହ ସଂଘାଙ୍କୁ Asian Hockey Federation (AHF) ପକ୍ଷରୁ ଏସିଆନ୍ ଗେମ୍ସ ହକି ପ୍ରତିଯୋଗିତା ପାଇଁ ଅମ୍ପାୟାର ମ୍ୟାନେଜର ଭାବେ ନିଯୁକ୍ତ କରାଯାଇଥିଲା। ରିପୋର୍ଟ ଅନୁସାରେ, ଅଭିଯୋଗ ପରେ ସେ ପ୍ରତିଯୋଗିତା ଶେଷ ହେବା ପୂର୍ବରୁ ଜାପାନ ଛାଡ଼ି ଭାରତ ଫେରିଛନ୍ତି। ତେବେ ତାଙ୍କ ବିରୋଧରେ ଆସିଥିବା ଅଭିଯୋଗଗୁଡ଼ିକ ନେଇ ଅନ୍ତିମ ନିଷ୍କର୍ଷ ବା ଦୋଷ ପ୍ରମାଣିତ ହୋଇଥିବା ତଥ୍ୟ ଏପର୍ଯ୍ୟନ୍ତ ସାମ୍ନାକୁ ଆସିନାହିଁ। AHFର ତଦନ୍ତ ରିପୋର୍ଟ ମିଳିବା ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ହକି ଇଣ୍ଡିଆ ପକ୍ଷରୁ କୁହାଯାଇଛି।
ଏହା ପ୍ରଥମ ଥର ନୁହେଁ ଯେ, ଗୁରିନ୍ଦରଙ୍କ ବିରୋଧରେ ଏଭଳି ଅଭିଯୋଗ ଆସିଛି। ୨୦୨୫ ହକି ଇଣ୍ଡିଆ ଲିଗ୍ ସମୟରେ ରାଞ୍ଚିରେ ଜଣେ ମହିଳା ଅମ୍ପାୟାର ତାଙ୍କ ବ୍ୟବହାରକୁ ନେଇ
ଅଭିଯୋଗ ଆଣିଥିଲେ। ଏହାପରେ ହକି ଇଣ୍ଡିଆ ଏକ ତିନିଜଣିଆ କମିଟି ଗଠନ କରି ଘଟଣାର ପ୍ରାଥମିକ ତଦନ୍ତ କରିଥିଲା। ହକି ଇଣ୍ଡିଆର ଜଣେ ଅଧିକାରୀଙ୍କ ଦାବି ଅନୁସାରେ, ସେହି ତଦନ୍ତରେ ଗୁରିନ୍ଦରଙ୍କ ବିରୋଧରେ ପର୍ଯ୍ୟାପ୍ତ ପ୍ରମାଣ ମିଳିନଥିଲା। ବର୍ତ୍ତମାନର ଅଭିଯୋଗ ଉପରେ AHFର ରିପୋର୍ଟ ପରେ ପରବର୍ତ୍ତୀ ପଦକ୍ଷେପ ସ୍ପଷ୍ଟ ହେବ।
