ଓଡ଼ିଶା ଡଟ୍ ନ୍ୟୁଜ୍22/08/2024 at 12:24 PM
ସିଦ୍ଧିପେଟ: ସ୍ଥିତି ଭୟାନକ । ଯେଉଁଠିକୁ ଚାହିଁଲେ ଲାଗୁଛି ବୁଲୁଛନ୍ତି ଯୌନ ପିପାସୁ । ନା ଦେଖୁଛନ୍ତି ବୟସ, ନା ଦେଉଛି ବିବେକକୁ ବାଧା । ନିଜର ଯୌନ କ୍ଷୁଧା ମେଣ୍ଟାଇବାକୁ ଶିଶୁ ଓ ନାବାଳିକାଙ୍କୁ କରୁଛନ୍ତି ଟାର୍ଗେଟ । କୋଲକାତା ଡାକ୍ତରୀ ଛାତ୍ରୀଙ୍କୁ ରେପ୍ ଆଣ୍ଡ ମର୍ଡର ଘଟଣାକୁ ନେଇ ସାରା ଦେଶରେ ବୋବଲା ମଚିଥିବା ବେଳେ ତେଲେଙ୍ଗାନାରୁ ଆସିଛି ଆଉ ଏକ ଦୁଷ୍କର୍ମ ଅଭିଯୋଗ । ଏକ ୩ ବର୍ଷର ଶିଶୁକନ୍ୟାକୁ ଚକୋଲେଟ ଦେବାକୁ କହି ଜଣେ ଯୁବକ କରିଛି ଦୁଷ୍କର୍ମ । ଘଟଣା ଘଟିଛି ତେଲଙ୍ଗାନାର ସିଦ୍ଦିପେଟରେ । ଘଟଣାରେ ଅଜୟ ନାମକ ଅଭିଯୁକ୍ତକୁ ଗିରଫ କରିଛି ପୋଲିସ ।
ପୋଲିସ୍ ସୂଚନା ଅନୁସାରେ, ଅଗଷ୍ଟ ୧୯ ତାରିଖ ସୋମବାର ଘଟଣା ଘଟିଛି । ଅଭିଯୁକ୍ତ ଅଜୟର ଘର ଉତ୍ତର ପ୍ରଦେଶରେ । ସେ ଏଠାରେ ପେଣ୍ଟର ଭାବେ କାମ କରୁଥିଲା । ସେ ଯେଉଁ ହାଉସିଂ କମ୍ପ୍ଲେକ୍ସରେ କାମ କରୁଥିଲା, ସେଠାରେ ୩ ବର୍ଷର ଝିଅର ଘର ।
ଝିଅଟିକୁ ଏକାକୀ ଦେଖିବା ପରେ ତା’କୁ ଚକୋଲେଟର ଲୋଭ ଦେଖାଇଥିଲା । ଝିଅଟି ଚକୋଲେଟ ଆଶାରେ ତା’ ପାଖକୁ ଯିବାରୁ ଅଜୟ ତା’କୁ ନିଜ ରୁମକୁ ନେଇ ଯାଇଥିଲା । ସେଠାରେ ସେ ତା’ ସହ ଦୁଷ୍କର୍ମ କରିଥିଲା।
ଝିଅଟି ବାପା ଉକ୍ତ ହାଉସିଂ କମ୍ପ୍ଲେକ୍ସରେ ୱାଚମ୍ୟାନ ଭାବେ କାମ କରନ୍ତି । ଘଟଣା ସମ୍ପର୍କରେ ସେ ଜାଣିବା ପରେ ୨୦ ତାରିଖରେ ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ହାଉସିଂ କମ୍ପ୍ଲେକ୍ସରେ ପହଞ୍ଚି ଅଭିଯୁକ୍ତ ଅଜୟକୁ ଗିରଫ କରିଛି । ବର୍ତ୍ତମାନ ଝିଅଟିର ଚିକିତ୍ସା ସିଦ୍ଦିପେଟର ଗୋଟିଏ ହସ୍ପିଟାଲରେ ଚାଲିଛି । ତା’ର ସ୍ୱାସ୍ଥ୍ୟାବସ୍ଥା ସ୍ଥିର ରହିଛି । ପୋଲିସ କମିଶନ ଡ.ବି. ଅରୁଦ୍ଧା କହିଛନ୍ତି, ଅଧିକାରୀମାନଙ୍କୁ ତୁରନ୍ତ ତଦନ୍ତ ସାରିବାକୁ ଓ ଚାର୍ଜଶିଟ ଫାଇଲ କରିବାକୁ କୁହାଯାଇଛି । ନ୍ୟାୟ ପ୍ରଦାନ ପାଇଁ ଫାଷ୍ଟଟ୍ରାକ ବିଚାର ପାଇଁ ପଦକ୍ଷେପ ଗ୍ରହଣ କରାଯିବ ।