ଓଡ଼ିଶା ଡଟ୍ ନ୍ୟୁଜ୍

11/12/2024 at 3:09 PM

ବିଡ: ସାଙ୍ଗର ପୋଲିସ ଚାକିରି ହୋଇଗଲା । ଏଥିପାଇଁ ଦେଇଥିଲା ପାର୍ଟି । ଏତିରେ ସାମିଲ ହେଲେ ଅତି ଘନିଷ୍ଠ ବନ୍ଧୁ । ହେଲେ ଏହି ପାର୍ଟିର ମଜା ଯେ କିଛି ସାଙ୍ଗଙ୍କ ଜୀବନରେ ଥିଲା ଶେଷ ଖୁସି ତାହା କାହାକୁ ଜଣା ନଥିଲା । ପାର୍ଟି ଆରମ୍ଭ ହେବା ପରେ ଆସର ଜମିଲା । ଆଉ ମଉଜ ମଜଲିସ କରି ସାଙ୍ଗକୁ ଚାକିରିର ଶୁଭକାମନା ଜଣାଇ ଯିଏ ଯାହା ବାଟରେ ଘରକୁ ଫେରିଲେ । ହେଲେ ବାଟରେ ଜଗି ବସିଥିଲା ଦୁର୍ଘଟଣା ରୂପୀ ଯମ । ପାର୍ଟି ସାରି ଫେରୁଥିବା ବେଳେ ସେମାନଙ୍କ କାର ସହ ଏକ ଟ୍ରକର ଧକ୍କା ହୋଇଥିଲା । ଫଳରେ ୪ ଜଣ ସାଙ୍ଗଙ୍କ ମୃତ୍ୟୁ ଘଟିଛି । ଏମିତି ଘଟଣା ଘଟିଛି ମହାରାଷ୍ଟ୍ରର ବିଡ୍ ଜିଲ୍ଲା ଅମ୍ବାଜୋଗାଇ ନିକଟ ୱାଘାଲାଠାରେ । ଦୁର୍ଘଟଣାରେ ଗୋଟିଏ ଗାଁର ୪ ଜଣ ଯୁବକଙ୍କ ଜୀବନ ଚାଲିଯାଇଛି ।

ସୂଚନା ଅନୁସାରେ ଆଜିମ ପଶାମିୟା ଶୈଖ ନାମକ ଯୁବକ ନିକଟରେ ଷ୍ଟେଟ୍ ରିଜର୍ଭ ପୋଲିସ ଫୋର୍ସ (SRPF) ଚାକିରି ପାଇଁ ଚୟନ ହୋଇଛନ୍ତି । ଏହି ଖୁସିରେ ପାର୍ଟି କରିବା ପାଇଁ ସେ ଓ ତାଙ୍କର ପାଞ୍ଚଜଣ ସାଙ୍ଗ ମିଶି ସୋମବାର ରାତିରେ ମଂଜରଶୁମ୍ଭ ଯାଇଥିଲେ । ହେଲେ ଏଠାରୁ ଫେରିବା ବେଳେ ଛତ୍ରପତି ଶମ୍ଭାଜୀ ନଗର-ଲାତୁର ରାସ୍ତାରେ ଥିବା ଅମ୍ବାଜୋଗାଇ ନିକଟ ୱାଘାଲାଠାରେ ଦୁର୍ଘଟଣା ଘଟିଥିଲା ।

ଦୁର୍ଘଟଣାରେ ବାଲାଜୀ ଶଙ୍କର ମାନେ (୨୭), ଦୀପକ ଦିଲିପ ସୱାରେ (୩୦) ଏବଂ ଫାରୁଖ ବାବୁମିୟାଁ ଶୈଖ (୩୦) ଘଟଣାସ୍ଥଳରେ ପ୍ରାଣ ହରାଇଥିଲେ । ଅନ୍ୟମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ହ୍ରିତିକ ହନୁମନ୍ତ ଗାଏକୱାଡ (୨୪)ଙ୍କର ମୃତ୍ୟୁ ଘଟିଥିଲା । ଅନ୍ୟ ଦୁଇ ସାଙ୍ଗ ଆଜିମ ପଶାମିୟା ଶୈଖ (୩୦) ଏବଂ ମୁବାରକ ସତ୍ତର ଶୈଖ (୨୮)ଙ୍କ ଅବସ୍ଥା ଏବେ ବି ଗୁରୁତର ଅଛି । ସେମାନେ ଅମ୍ବାଜୋଗାଇସ୍ଥିତ ସ୍ଵାମୀ ରାମାନନ୍ଦ ତୀର୍ଥ ହସ୍ପିଟାଲରେ ଚିକିତ୍ସିତ ହେଉଛନ୍ତି ।

ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଗାଡିକୁ ଜବତ କରିଛି । ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହାସହ ପୋଲିସ ଏକ ଦୁର୍ଘଟଣାଜନିତ ମାମଲା ରୁଜୁ କରି ଘଟଣାର ତଦନ୍ତ କରୁଛି ।