ଓଡ଼ିଶା ଡଟ୍ ନ୍ୟୁଜ୍12/12/2024 at 11:53 AM
ଲକ୍ଷ୍ନୌ: ଉତ୍ତରପ୍ରଦେଶ ବାରଣଶସୀରେ ନିଜକୁ ଜଣେ ପୂଜକ ବଳି ପକାଇ ଦେଇଛନ୍ତି । ମାଆ କାଳୀଙ୍କୁ ସନ୍ତୁଷ୍ଟ କରିବାକୁ ଯାଇ ସେ ନିଜ ଗଳା କାଟି ଦେଇ ବଳି ଚଢ଼ିଛନ୍ତି । ୨୪ ଘଣ୍ଟା ନିରନ୍ତର ପୂଜା ସତ୍ତ୍ୱେ ମାଆ ଦର୍ଶନ ନଦେବାରୁ ସେ ନିରାଶ ହୋଇ ଦେବୀଙ୍କୁ ସନ୍ତୁଷ୍ଟ କରିବା ପାଇଁ ନିଜ ଗଳା କାଟି ଦେଇଛନ୍ତି । ଫଳରେ ତାଙ୍କର ମୃତ୍ୟୁ ଘଟିଥିଲା ।
ପୋଲିସ ସୂଚନା ଅନୁସାରେ, ବାରଣାସୀ ସହରର ଗାଈ ଘାଟ ଅଞ୍ଚଳରେ ଏକ ଭଡ଼ା ଘରେ ରହୁଥିବା ପୂଜକ ଅମିତ ଶର୍ମା (୪୦) ଘରେ ଦେବୀଙ୍କ ଆରାଧନା କରୁଥିବା ସମୟରେ ଏକ ଛୁରୀ ସାହାଯ୍ୟରେ ନିଜ ଗଳା କାଟି ଦେଇଛନ୍ତି । ନିଜ ବେକ କାଟିବା ପୂର୍ବରୁ ସେ ଦେବୀ କାଳୀଙ୍କୁ ଡାକିଥିଲେ । ମା’ କାଳୀ ଦର୍ଶନ ଦିଅ ବୋଲି କହି କହି ସେ ଚିତ୍କାର କରୁଥିବା ଶୁଣିଥିବା ରୋଷେଇ ଘରେ ଥିବା ତାଙ୍କ ପତ୍ନୀ ଜୁଲି କହିଛନ୍ତି । ପୂଜକ ଅମିତଙ୍କ ଚିତ୍କାର ଶୁଣି ତାଙ୍କ ପତ୍ନୀଙ୍କ ସମେତ ସାହି ପଡ଼ିଶା ଲୋକ ମଧ୍ୟ ସେଠାକୁ ଧାଇଁ ଆସିଥିଲେ । ସମସ୍ତେ ପହଞ୍ଚିବା ବେଳକୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ସେ ନିଜ ଗଳା କାଟି ସେଠାରେ ପଡ଼ିଥିଲେ । ତାଙ୍କୁ ତୁରନ୍ତ ଉଦ୍ଧାର କରି ଡାକ୍ତରଖାନାକୁ ନିଆଯାଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଘଟଣାକୁ ନେଇ ସ୍ଥାନୀୟ ସହକାରୀ ପୋଲିସ କମିଶନର ଈଶାନ ସୋନୀ କହିଛନ୍ତି, ଦେବୀ କାଳୀ ତାଙ୍କୁ ଦର୍ଶନ ଦେବେ ବୋଲି ପୂଜକ ଜଣକ ଜିଦ୍ ଧରିଥିଲେ । ଯେତେବେଳେ ତାହା ଘଟିଲା ନାହିଁ, ସେ ବିବ୍ରତ ହୋଇ ତାଙ୍କ ଗଳା କାଟିଦେଲେ । ତାଙ୍କୁ ସ୍ଥାନୀୟ ଡାକ୍ତରଖାନାର ଟ୍ରମା ସେଣ୍ଟରକୁ ନିଆଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଥିଲା । ସେ ଭଡ଼ାରେ ରହୁଥିବା ଘରର ମାଲିକଙ୍କ କହିବା ଅନୁଯାୟୀ ପୂଜାରୀ ଅମିତ ଶର୍ମା ପ୍ରାୟ ୭ ବର୍ଷ ହେବ ସେଠାରେ ରହୁଥିଲେ । ସେ କାଶୀ ବିଶ୍ୱନାଥ ମନ୍ଦିରରେ ଯାଇ ପୂଜାର୍ଚ୍ଚନା କରିବା ସହ ଘରେ ମଧ୍ୟ ପୂଜାପାଠ କରନ୍ତି ।