ଓଡ଼ିଶା ଡଟ୍ ନ୍ୟୁଜ୍20/12/2024 at 3:26 PM
ନୂଆଦିଲ୍ଲୀ: ସଂସଦ ବାହାରେ ବିଜେପି ଓ କଂଗ୍ରେସ ସାଂସଦଙ୍କ ମଧ୍ୟରେ ମାରପିଟ ଘଟଣାକୁ ନେି ରାଜନୀତି ତେଜିବାରେ ଲାଗିଛି । ଉଭୟ ଦଳ ପରସ୍ପରକୁ ଦାୟୀ କରୁଥିବା ବେଳେ ଏତଲା ଦେଇଛନ୍ତି । ବିଜେପି ସାଂସଦଙ୍କ ଏତଲାକୁ ଆଧାର କରି ରାହୁଲଙ୍କ ବିରୋଧରେ ପୋଲିସ ମାମଲା ରୁଜୁ କରିଛି । ଯାହା ରାହୁଲଙ୍କ ଅଡୁଆ ବଢ଼ାଇଛି । ଘଟଣାରେ ଦୁଇ ସାଂସଦ ପ୍ରତାପ ଷଡ଼ଙ୍ଗୀ ଏବଂ ମୁକେଶ ରାଜପୁତ ଆହତ ହୋଇ ମେଡିକାଲରେ ଚିକିତ୍ସାଧୀନ ଅଛନ୍ତି ।
ଘଟଣାରେ କଂଗ୍ରେସ ସାଂସଦ ତଥା ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଦାୟୀ କରି ବିଜେପି ପୋଲିସର ଦ୍ଵାରସ୍ଥ ହୋଇଥିଲା । ଅଭିଯୋଗ କ୍ରମେ ଭାରତ ନ୍ୟାୟ ସଂହିତାର ଏକାଧିକ ଧାରା ଅଧୀନରେ ରାହୁଲଙ୍କ ବିରୋଧରେ ମାମଲା ରୁଜୁ ହୋଇଛି । ଉଦ୍ଦେଶ୍ୟମୂଳକ ଭାବେ ଗଭୀର ଆଘାତ ଦେବା, ଅନ୍ୟର ଜୀବନ ପ୍ରତି ତଥା ବ୍ୟକ୍ତିଗତ ସୁରକ୍ଷାରେ ବିପଦ ସୃଷ୍ଟି କରିବା, ଅପରାଧିକ କାର୍ଯ୍ୟକଳାପ ଦ୍ଵାରା ଅନ୍ୟକୁ ଭୟଭୀତ କରାଇବା ଭଳି ଗମ୍ଭୀର ଦଫା ରାହୁଲଙ୍କ ବିରୋଧରେ ଲାଗିଛି ।