ସୌମିତ୍ରି ମେହେର31/12/2024 at 10:23 PM
ବୀରମହାରାଜପୁର : (ସୌମିତ୍ରି ମେହେର) ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ମୁର୍ଷୁଣ୍ଢୀ ପଞ୍ଚାୟତ ଅନ୍ତର୍ଗତ ତେନ୍ତୁଳିମହଦା ଗ୍ରାମରେ ମଙ୍ଗଳବାର ବକୁଳ ଅମାବାସ୍ୟା ଉଦଯାପିତ ହୋଇଯାଇଛି । ଏହି ଅବସରରେ ସୋମବାର ସକାଳୁ କଳସ ଶୋଭାଯାତ୍ରା ଅନୁଷ୍ଠିତ ହୋଇ ଅଷ୍ଟ ପ୍ରହରୀ ନାମ ଯଜ୍ଞ ର ଅଧିବାସ ଆରମ୍ଭ ହୋଇଥିଲା । ଏଥିରେ ଆଖପାଖ ଅଞ୍ଚଳର ବହୁ ସଂକୀର୍ତ୍ତନ ମଣ୍ଡଳୀ ଯୋଗଦେଇ ଥିଲେ। ମଙ୍ଗଳବାର ପୂର୍ଣ୍ଣାହୁତି ଓ ନଗର ପରିକ୍ରମା କରିବା ସହ ସୁନ୍ଦରା କାଣ୍ଡ ପାରାୟଣ ଅନୁଷ୍ଠିତ ହୋଇଥିଲା । ଏଥିରେ ପାରାୟଣ ଗାୟିକା ଇତିଶ୍ରୀ ଦାସ ସୁନ୍ଦର ଭାବରେ ପାରାୟଣ ପଠନ କରିଥିଲେ | ପିତାବଲି ପୀଠରେ ପଞ୍ଚାନନ ଦେହୁରୀ ଓ ଅଷ୍ଟପ୍ରହରୀ ଯଜ୍ଞରେ ନବୀନ ମିଶ୍ର ପୂଜା କାର୍ଯ୍ୟ ତୁଲାଇଥିବା ବେଳେ ହରେଶ ମିଶ୍ର ଓ ଧର୍ମପତ୍ନୀ କର୍ତ୍ତା ଦାଇତ୍ୱ ନିର୍ବାହ କରିଥିଲେ।
ଏହି ଅବସରରେ ବହୁ ଦୁରଦୁରାନ୍ତରୁ ଶତାଧିକ ଜନସାଧାରଣ ସାମିଲ ଥିବା ଦେଖାଯାଇଥିଲା । ଉକ୍ତ କାର୍ଯ୍ୟକ୍ରମ ଗ୍ରାମବାସୀଙ୍କ ସହଯୋଗରେ ଆୟୋଜିତ ହୋଇଥିଲା |