Amit Shah: ରାହୁଲ ଗାନ୍ଧୀଙ୍କୁ ଅମିତ ଶାହଙ୍କ କଡା ଜବାବ! କହିଲେ ‘ବିତର୍କ କରିବାକୁ ହେଲେ ସଂସଦକୁ ଆସନ୍ତୁ’
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଖୋଲା ବିତର୍କ ପାଇଁ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଆହ୍ୱାନର ଜବାବ ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଗୁରୁବାର ହରିୟାଣାରେ ବିଜେପିର ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ପଦଯାତ୍ରା ସମୟରେ ଶାହ କହିଛନ୍ତି, ରାହୁଲ ଯଦି ଆଲୋଚନା କରିବାକୁ ଚାହୁଁଛନ୍ତି, ତେବେ ସଂସଦକୁ ଆସନ୍ତୁ। ଏଥିପାଇଁ ସେ ପ୍ରଧାନମନ୍ତ୍ରୀଙ୍କୁ ଚିଠି ଲେଖି ଆଲୋଚନା ପାଇଁ ଅନୁରୋଧ କରନ୍ତୁ। କଂଗ୍ରେସ ଅନୁରୋଧ କଲେ ସରକାର ଏସ୍ଆଇଆର୍ (ଭୋଟର ତାଲିକାର ସ୍ୱତନ୍ତ୍ର ସଂଶୋଧନ) ଉପରେ ଆଲୋଚନା ପାଇଁ ସଂସଦର ସ୍ୱତନ୍ତ୍ର ଅଧିବେଶନ ଡାକିବାକୁ ପ୍ରସ୍ତୁତ ବୋଲି ଶାହ କହିଛନ୍ତି।
ଏହି ସମୟରେ ଅମିତ ଶାହ କଂଗ୍ରେସର ନିର୍ବାଚନ ଆୟୋଗ ଏବଂ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କୁ ନେଇ ରହିଥିବା ଦାବିକୁ ମଧ୍ୟ ସମାଲୋଚନା କରିଥିଲେ। ଏସ୍ଆଇଆର୍କୁ ନିର୍ବାଚନରେ ପରାଜୟର କାରଣ କହିବା ନେଇ ସେ କଂଗ୍ରେସକୁ ପ୍ରଶ୍ନ କରିଥିଲେ। ଶାହଙ୍କ କହିବା ଅନୁସାରେ, ୨୦୧୪, ୨୦୧୯ ଓ ୨୦୨୪ ଲୋକସଭା ନିର୍ବାଚନରେ ମଧ୍ୟ କଂଗ୍ରେସ ପରାଜିତ ହୋଇଥିଲା, ସେତେବେଳେ ଏସ୍ଆଇଆର୍ ହୋଇନଥିଲା। ଏହା ସହ ସେ କଂଗ୍ରେସର ବିରୋଧ ପ୍ରଦର୍ଶନକୁ ନେଇ କଟାକ୍ଷ କରିଥିଲେ। କବାଡ଼ିରେ ହାରିଥିବା ଦଳ ରେଫରିଙ୍କୁ ଦୋଷ ଦେବା ଭଳି କଂଗ୍ରେସ ନିର୍ବାଚନ ଆୟୋଗକୁ ଦୋଷ ଦେଉଛି ବୋଲି ଶାହ କହିଥିଲେ।
ଶାହ ଆହୁରି କହିଥିଲେ ଯେ, ବିଜେପି କେବଳ ସଂସଦରେ ନୁହେଁ, ବରଂ ରାଜ୍ୟ ବିଧାନସଭା, ଗାଁ ଓ ରାସ୍ତାରେ ମଧ୍ୟ କଂଗ୍ରେସକୁ ଜବାବ ଦେବ। ରାହୁଲ ଗାନ୍ଧୀଙ୍କ ଆହ୍ୱାନର ଜବାବରେ ଏହି ପଦଯାତ୍ରାକୁ ବିଜେପିର ପ୍ରତିକ୍ରିୟା ବୋଲି ବର୍ଣ୍ଣନା କରି ସେ କହିଥିଲେ, ଦଳ କଂଗ୍ରେସ ସହ ଯେକୌଣସି ମଞ୍ଚରେ ମୁକାବିଲା କରିବାକୁ ପ୍ରସ୍ତୁତ।
