ପ୍ରଜ୍ଞା ପଟ୍ଟନାୟକ

4/05/2023 at 5:32 PM

ଝାରସୁଗୁଡା: ପାଖେଇ ଆସୁଛି ଝାରସୁଗୁଡା ନିର୍ବାଚନ। ଆଉ ମାତ୍ର କେଇଟା ଦିନ ବାକି। ଗୋଟେ ପଟେ ନିର୍ବାଚନ ଲାଗି ପ୍ରଚାର ଜମୁଥିବା ବେଳେ ଅନ୍ୟପଟେ ମୁହାଁମୁହିଁ ହୋଇଛନ୍ତି ବିରୋଧୀ। ଝାରସୁଗୁଡା ବିଧାନସଭା ଉପ-ନିର୍ବାଚନ ପାଇଁ ବିଜେପି ଏବଂ ଶାସକ ଦଳ ବିଜେଡି ପରସ୍ପର ବିରୋ‌ଧରେ ହିଂସା ଘଟାଇଥିବା ଅଭିଯୋଗ ଆଣିଛନ୍ତି।

ମେ ୧୦ ରେ ଝାରସୁଗୁଡା ଉପନିର୍ବାଚନ। ଉଭୟ ରାଜନୈତିକ ଦଳ ପରସ୍ପର ବିରୋଧରେ ଦୋଷ ଲଦାଲଦି ହେଉଛନ୍ତି। ବୁଧବାର ପ୍ରଚାର ସମୟରେ ବିଜେଡି କାର୍ଯ୍ୟକର୍ତ୍ତାମାନେ ତାଙ୍କୁ ଆକ୍ରମଣ କରିଥିବା ଅଭିଯୋଗ କରି ସୁନ୍ଦରଗଡର ବରିଷ୍ଠ ନେତା କୁସୁମ ଟେଟେ ଏଫଆଇଆର ଦାଖଲ କରିଛନ୍ତି।

ସେ ଅଭିଯୋଗ କରିଛନ୍ତି ଯେ ଯେତେବେଳେ ସେ ବିଜେପି ପ୍ରାର୍ଥୀ ଟଙ୍କାଧର ତ୍ରିପାଠୀଙ୍କ ପାଇଁ ପ୍ରଚାର କରୁଥିଲେ ସେତେବେଳେ ଅନେକ ଦୁଷ୍କର୍ମକାରୀ ତାଙ୍କ ଉପରକୁ ପଥର ଓ ଅଣ୍ଡା ଫିଙ୍ଗିଥିଲେ।ବୁଧବାର ବିଳମ୍ବିତ ରାତିରେ କୁସୁମ ଟେଟେ ଦେଇଥିବା ଅଭିଯୋଗ ଆଧାରରେ ୧୭ ଜଣଙ୍କ ବିରୋଧରେ ମାମଲା ରୁଜୁ ହୋଇଛି।

ବିଧାୟକ ତଥା ଅନ୍ୟାନ୍ୟ ବିଜେପି ନେତା ମଧ୍ୟ ପୋଲିସ ଷ୍ଟେସନ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ଏହି କାର୍ଯ୍ୟ କରିଥିବାରୁ କିଛି ବିଜେଡି କର୍ମୀଙ୍କୁ ତୁରନ୍ତ ଗିରଫ କରିବାକୁ ଦାବି କରିଥିଲେ। ସେପଟେ ବିଜେପି ଗୁଣ୍ଡାଗର୍ଦ୍ଦି କରିବା ଅଭିଯୋଗ କରି ସିଇଓଙ୍କ ନିକଟରେ ଫେରାଦ ଦେଇଛି ବିଜେଡି।