ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ2/05/2025 at 8:51 AM
ନୂଆଦିଲ୍ଲୀ: ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ସହଯୋଗୀ ସଦସ୍ୟ ଦେଶମାନଙ୍କ ମଧ୍ୟରେ ଏକଦା ସବୁଠାରୁ ଶକ୍ତିଶାଳୀ ବିବେଚିତ କେନିଆ କ୍ରିକେଟ ଦଳ ଏବେ ନିଜ ଦେଶରେ କ୍ରିକେଟକୁ ପୁନରୁଦ୍ଧାର କରିବା ପାଇଁ ଏକ ବଡ଼ ପଦକ୍ଷେପ ନେଉଛି।
କେନିଆ କ୍ରିକେଟ୍ ବୋର୍ଡ ଘୋଷଣା କରିଛି ଯେ ସେପ୍ଟେମ୍ବର ୨୦୨୫ରୁ ଦେଶରେ ଏକ ନୂତନ ଫ୍ରାଞ୍ଚାଇଜ୍-ଭିତ୍ତିକ T20 ଲିଗ୍, CKT20 ଆରମ୍ଭ ହେବ। ଏହି ଲିଗ୍ କ୍ରିକେଟ୍ କେନିଆ ଏବଂ ଦୁବାଇ/ଭାରତ-ଭିତ୍ତିକ କ୍ରୀଡା ପରିଚାଳନା କମ୍ପାନୀ AOS ସ୍ପୋର୍ଟସ୍ ମଧ୍ୟରେ ଏକ ଚୁକ୍ତି ଅନୁଯାୟୀ ଆୟୋଜିତ ହେଉଛି। ଏହି ଲିଗର ପ୍ରଥମ ସଂସ୍କରଣ ୨୫ ଦିନ ଧରି ଚାଲିବ। ଯେଉଁଥିରେ ମୋଟ ୬ଟି ଫ୍ରାଞ୍ଚାଇଜ୍ ଦଳ ଅଂଶଗ୍ରହଣ କରିବେ।
ଏହି ଦଳଗୁଡ଼ିକୁ ସେମାନଙ୍କ ଦଳରେ ଅତି କମରେ ପାଞ୍ଚ ଜଣ ଆନ୍ତର୍ଜାତୀୟ ଖେଳାଳିଙ୍କୁ ସାମିଲ କରିବାର ଅନୁମତି ଦିଆଯିବ। ଯାହା ଫଳରେ ଲିଗ୍ ବିଶ୍ୱ ସ୍ତରରେ ମଧ୍ୟ ସ୍ୱୀକୃତି ପାଇବ ବୋଲି ଆଶା କରାଯାଉଛି। ତଥାପି, ପ୍ରତ୍ୟେକ ମ୍ୟାଚ୍ର ପ୍ଲେଇଂ ଇଲେଭେନରେ କେବଳ ଚାରି ଜଣ ବିଦେଶୀ ଖେଳାଳିଙ୍କୁ ଅନୁମତି ଦିଆଯିବ ଏବଂ ବାକି ଖେଳାଳିମାନେ ସ୍ଥାନୀୟ କେନିଆ ଖେଳାଳି ହେବେ। ଏହି ପଦକ୍ଷେପର ଲକ୍ଷ୍ୟ କେନିଆର ଘରୋଇ କ୍ରିକେଟରମାନଙ୍କୁ ଅଧିକ ସୁଯୋଗ ପ୍ରଦାନ କରିବା ଏବଂ ସେମାନଙ୍କୁ ଉଚ୍ଚସ୍ତରୀୟ ପ୍ରତିଯୋଗିତାରେ ଖେଳିବାର ଅଭିଜ୍ଞତା ପ୍ରଦାନ କରିବା ବୋଲି କୁହାଯାଉଛି।