ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ30/05/2025 at 6:12 PM
ନୂଆଦିଲ୍ଲୀ: ବଜାର ନିୟାମକ SEBI ବଲିଉଡ ଅଭିନେତା ଅର୍ଶଦ ୱାରସୀ, ତାଙ୍କ ପତ୍ନୀ ଏବଂ ଭାଇଙ୍କ ସମେତ ୫୯ ଜଣଙ୍କୁ ଗୋଟିଏ ବର୍ଷ ପାଇଁ ବ୍ୟାନ କରିଛି। ସେମାନଙ୍କ ଉପରେ ଷ୍ଟକ୍ ବଜାରର ନିବେଶକମାନଙ୍କ ସହିତ ଖେଳ ଖେଳି ଟଙ୍କା ରୋଜଗାର କରିବାର ଅଭିଯୋଗ ଅଛି। ଯଦିଓ ଏହି ମାମଲା ୨୦୨୩ ମସିହାର କିନ୍ତୁ ତଦନ୍ତ ସମାପ୍ତ କରିବା ପରେ SEBI ଏବେ ଏହାର ନିଷ୍ପତ୍ତି ନେଇଛି।
SEBI ଏହି ସମସ୍ତ ଅଭିଯୁକ୍ତଙ୍କ ଉପରେ ଜରିମାନା ମଧ୍ୟ ଲଗାଇଛି। ରିପୋର୍ଟରେ କୁହାଯାଇଛି ଯେ ଅର୍ଶଦ ୱାରସୀ, ତାଙ୍କ ପତ୍ନୀ ଏବଂ ଭାଇଙ୍କୁ ଗୋଟିଏ ବର୍ଷ ପାଇଁ ଷ୍ଟକ୍ ବଜାରରେ ଯେକୌଣସି ପ୍ରକାରର ବାଣିଜ୍ୟ କରିବାରୁ ନିଷେଧ କରାଯାଇଛି। ସେମାନଙ୍କ ଉପରେ ଜାଲିଆତି ଭାବରେ ସେମାନଙ୍କ କମ୍ପାନୀ ସାଧନା ବ୍ରଡକାଷ୍ଟ ଲିମିଟେଡ୍ (SBL) ମାଧ୍ୟମରେ ସେୟାର ମୂଲ୍ୟ ବୃଦ୍ଧି କରିବା ଏବଂ ପରେ ଏହାକୁ ବିକ୍ରି କରିବାର ଅଭିଯୋଗ ଅଛି। SEBI ସାଧନା ବ୍ରଡକାଷ୍ଟ ଲିମିଟେଡ୍ ମାମଲାରେ ଏକ ଚୂଡ଼ାନ୍ତ ନିର୍ଦ୍ଦେଶ ଜାରି କରିଛି। କମ୍ପାନୀ ଏବେ ଏହାର ନାମ ପରିବର୍ତ୍ତନ କରି କ୍ରିଷ୍ଟାଲ୍ ବିଜନେସ୍ ସିଷ୍ଟମ୍ ଲିମିଟେଡ୍ କରିଥିବା ଜଣାପଡ଼ିଛି।
SEBI ଏହି ସମସ୍ତ ବ୍ୟକ୍ତିଙ୍କ ଉପରେ ପୃଥକ ଭାବରେ ୫ ଲକ୍ଷ ଟଙ୍କା ଜରିମାନା ମଧ୍ୟ ଲଗାଇଛି। ଏହା ବ୍ୟତୀତ SEBI ସେମାନଙ୍କଠାରୁ ପମ୍ପ ଏବଂ ଡମ୍ପ ବାଣିଜ୍ୟ ମାଧ୍ୟମରେ ରୋଜଗାର କରାଯାଇଥିବା ମୋଟ ୧.୦୫ କୋଟି ଟଙ୍କା ଆଦାୟ କରିବାକୁ ମଧ୍ୟ ନିର୍ଦ୍ଦେଶ ଦେଇଛି। ସେବି ଅଭିଯୋଗ କରିଛି ଯେ ୱାରସି ଏବଂ ଅନ୍ୟମାନେ, ମନୀଷ ମିଶ୍ର ନାମକ ଜଣେ ବ୍ୟକ୍ତିଙ୍କ ସହ ମିଶି SBL ବିଷୟରେ ଏକ ମିଥ୍ୟା ସକାରାତ୍ମକ କାହାଣୀ ସୃଷ୍ଟି କରିଥିଲେ ଏବଂ ନିବେଶକମାନଙ୍କୁ କମ୍ପାନୀର ସେୟାର କିଣିବାକୁ ପ୍ରବର୍ତ୍ତାଇଥିଲେ।