ବ୍ରାଜିଲ ଉପରେ ୫୦% ଶୁଳ୍କ ଲଗାଇଲା ଆମେରିକା, ରାଗିଲେ ରାଷ୍ଟ୍ରପତି ଲୁଲା
ନୂଆଦିଲ୍ଲୀ: ବୁଧବାର ଦିନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକକାଳୀନ ଅନେକ ଦେଶ ଉପରେ ଭାରୀ ଶୁଳ୍କ ଲାଗୁ କରିବାର ଘୋଷଣା କରିଛନ୍ତି। ଟ୍ରମ୍ପ ଅନ୍ୟ ଦେଶ ସହିତ ବ୍ରାଜିଲ ଉପରେ ୫୦ ପ୍ରତିଶତ ସିଧାସଳଖ ଶୁଳ୍କ ଲାଗୁ କରି ଏହାକୁ ଏପର୍ଯ୍ୟନ୍ତ ସବୁଠାରୁ କଠିନ ପଦକ୍ଷେପ ବୋଲି କହିଛନ୍ତି।
ଟ୍ରମ୍ପ ପ୍ରଥମେ ଆଲଜେରିଆ, ଇରାକ, ଲିବିଆ, ଶ୍ରୀଲଙ୍କା, ବ୍ରୁନେଇ, ମାଲଡୋଭା ଏବଂ ଫିଲିପାଇନ୍ସ ଉପରେ ଶୁଳ୍କ ଘୋଷଣା କରିଥିଲେ। ଏହି ସମସ୍ତ ଶୁଳ୍କ ଅଗଷ୍ଟ ୧ରୁ କାର୍ଯ୍ୟକାରୀ ହେବ। ଟ୍ରମ୍ପ ଭାରୀ ଶୁଳ୍କ ଲାଗୁ କରିବା ପରେ ବ୍ରାଜିଲ ରାଷ୍ଟ୍ରପତି ମଧ୍ୟ ତାଙ୍କର ପ୍ରତିକ୍ରିୟା ଦେଇଛନ୍ତି।
ଟ୍ରମ୍ପ ୫୦ ପ୍ରତିଶତ ଶୁଳ୍କ ଲାଗୁ ନେଇ ଘୋଷଣା କରିବାର କିଛି ଘଣ୍ଟା ପରେ ବ୍ରାଜିଲ ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲଭା ଏହି ନିଷ୍ପତ୍ତି ଉପରେ କଡ଼ା ପ୍ରତିକ୍ରିୟା ଦେଇଛନ୍ତି। ସେ ଆମେରିକାକୁ ଆର୍ଥିକ ପ୍ରତିଶୋଧର ଚେତାବନୀ ଦେଇଛନ୍ତି।ସିଲଭା କହିଛନ୍ତି ଯେ ଯଦି ଆମେରିକା ଏକପାଖିଆ ଭାବରେ ବ୍ରାଜିଲ ଉପରେ ଶୁଳ୍କ ବୃଦ୍ଧି କରେ, ତେବେ ବ୍ରାଜିଲ ମଧ୍ୟ ସମାନ ସ୍ତରରେ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଟ୍ରମ୍ପ କହିଛନ୍ତି ଯେ ଏହି ନିଷ୍ପତ୍ତି ବ୍ରାଜିଲର ପୂର୍ବତନ ରାଷ୍ଟ୍ରପତି ଜାଇର ବୋଲସୋନାରୋଙ୍କ ପ୍ରତି କରାଯାଉଥିବା ବ୍ୟବହାର ପରିପ୍ରେକ୍ଷୀରେ ନିଆଯାଇଛି।
ସୂଚନା ଅନୁଯାୟୀ, ବୋଲସୋନାରୋ ବର୍ତ୍ତମାନ ଏକ ବିଦ୍ରୋହ ଷଡ଼ଯନ୍ତ୍ର ଅଭିଯୋଗରେ ବିଚାରର ସମ୍ମୁଖୀନ ହେଉଛନ୍ତି।
