ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

18/07/2025 at 10:26 AM

ୱାଶିଂଟନ: ଆମେରିକା ପାକିସ୍ତାନ ସମର୍ଥିତ ଦ ରେଜିଷ୍ଟାନ୍ସ ଫ୍ରଣ୍ଟ (TRF)କୁ ବିଦେଶୀ ଆତଙ୍କବାଦୀ ସଂଗଠନ (FTO) ଏବଂ ସ୍ୱତନ୍ତ୍ର ଭାବରେ ମନୋନୀତ ବିଶ୍ୱ ଆତଙ୍କବାଦୀ (SDGT) ତାଲିକାରେ ରଖିଛି। ଆମେରିକାର ବିଦେଶ ସଚିବ ମାର୍କୋ ରୁବିଓ ଶୁକ୍ରବାର ଏକ ବିବୃତ୍ତି ଜାରି କରି ଏହି ସୂଚନା ଦେଇଛନ୍ତି।

ମାର୍କୋ ରୁବିଓ ବିବୃତ୍ତିରେ ଲେଖିଛନ୍ତି, ‘ଲସ୍କର-ଏ-ତୈବା (LeT)ର ଏକ ମୁଖା ଏବଂ ପ୍ରକ୍ସି TRF, 22 ଏପ୍ରିଲ, 2025 ରେ ଭାରତର ପହଲଗାମରେ ହୋଇଥିବା ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ଯେଉଁଥିରେ ୨୬ ଜଣ ସାଧାରଣ ନାଗରିକ ପ୍ରାଣ ହରାଇଥିଲେ। ଏହା ୨୦୦୮ରେ ମୁମ୍ବାଇ ଆକ୍ରମଣ ପରେ ଭାରତରେ ସାଧାରଣ ନାଗରିକଙ୍କ ଉପରେ ଲସ୍କରର ସବୁଠାରୁ ଭୟଙ୍କର ଆକ୍ରମଣ ଥିଲା। ”TRF 2024 ଆକ୍ରମଣ ସମେତ ଭାରତୀୟ ସୁରକ୍ଷା ବାହିନୀ ଉପରେ ଅନେକ ଆକ୍ରମଣ ପାଇଁ ମଧ୍ୟ ଦାୟୀ ବୋଲି ଦାବି କରିଛି।

ଆମେରିକା ସରକାରଙ୍କ ଏହି ନିଷ୍ପତ୍ତି ହେଉଛି ପହଲଗାମ ଆକ୍ରମଣର ନ୍ୟାୟ ପାଇଁ ରାଷ୍ଟ୍ରପତି ଟ୍ରମ୍ପଙ୍କ ଆହ୍ୱାନ। ଏହି କାର୍ଯ୍ୟ ଆମର ଜାତୀୟ ସୁରକ୍ଷା ସ୍ୱାର୍ଥକୁ ସୁରକ୍ଷା ଦେବା ଏବଂ ଆତଙ୍କବାଦ ବିରୋଧରେ ଲଢ଼େଇ ପାଇଁ ଟ୍ରମ୍ପ ପ୍ରଶାସନର ପ୍ରତିବଦ୍ଧତାକୁ ପ୍ରତିଫଳିତ କରେ।

‘TRF ହେଉଛି ମୁଖ୍ୟତଃ ଜମ୍ମୁ ଏବଂ କାଶ୍ମୀରରେ ସକ୍ରିୟ ଏକ ଆତଙ୍କବାଦୀ ସଂଗଠନ। ଏହା ପ୍ରାୟତଃ ସାଧାରଣ ନାଗରିକ ପରି ଦେଖାଯାଉଥିବା ଲୋକଙ୍କୁ ନିଯୁକ୍ତି ଦିଏ, କିନ୍ତୁ ଗୁପ୍ତ ଭାବରେ ଆତଙ୍କବାଦୀ କାର୍ଯ୍ୟକଳାପରେ ଜଡିତ ଥାଏ। ଏମାନଙ୍କୁ ହାଇବ୍ରିଡ୍ ଆତଙ୍କବାଦୀ ମଧ୍ୟ କୁହାଯାଏ। ଭାରତ ସରକାର ଜାନୁଆରୀ ୫, ୨୦୨୩ରେ TRF କୁ ଏକ ଆତଙ୍କବାଦୀ ସଂଗଠନ ଘୋଷଣା କରିଥିଲେ।