ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ31/08/2025 at 11:35 AM
ବିଦ୍ରୋହ ଭିତରେ ନୂଆ ଯୁବ ସଭାପତିଙ୍କ ରାଜା ପୁଅ ଆଉ ରାଜା ହେବନି ବୟାନ ଦଳ ପାଇଁ ସୃଷ୍ଟି କରିଛି ଅଡୁଆ । କୁହାଯାଉଛି ପରିବାରଦ ରାଜନୀତି ପାଇଁ ବିଜେଡିରେ ଥିବା ପ୍ରାୟ ୫୦ରୁ ଅଧିକ ନେତାଙ୍କୁ ପରୋକ୍ଷରେ କରାଯାଇଛି ଟାର୍ଗେଟ୍ । ଯୁବ ସଭାପତିଙ୍କ ଏ ବୟାନ ବିଜୁଙ୍କ ପୁଅ ହିସାବରେ ନବୀନଙ୍କ ପାଇଁ ବି ସୃଷ୍ଟି କରିଛି ଅଡୁଆ । ସେପଟେ ଅସନ୍ତୋଷ ପ୍ରଶମିତ କରିବା ପାଇଁ ମଙ୍ଗୁଆଳ ମାନଙ୍କ ସବୁ ଉଦ୍ୟମ ବାରମ୍ବାର ଫେଲ୍ ମାରୁଛି । ଶୀର୍ଷ ନେତୃତ୍ୱ ଅସନ୍ତୁଷ୍ଟ ଗୋଷ୍ଠୀଙ୍କୁ ଡାକି ଆଲୋଚନା ପାଇଁ ଚେଷ୍ଟା ଜାରି ରଖିଛନ୍ତି ।
ଭୈରବ ପାଣ୍ଡିଆନଙ୍କ ବସ୍ ଗିରିକୁ ନେଇ ବିଜେଡିରେ ଦେଖା ଦେଇଥିବା ବିଦ୍ରୋହ ଆଗକୁ ପ୍ରଶମିତ ହେଉଛି ନା ଉଗ୍ର ରୂପ ଧାରଣ କରୁଛି ତାହା ଉପରେ ରାଜ୍ୟବାସୀଙ୍କ ନଜର । ନେତୃତ୍ୱଙ୍କ ସହ ଆଲୋଚନା କରି ନିଷ୍ପତ୍ତି ନେଉଥିଲେ ନବୀନ । କିନ୍ତୁ ଏବେ ବସ୍ ଭଳି ନିଷ୍ପତ୍ତି ଶୁଣାଉଛନ୍ତି ଭୈରବ ପାଣ୍ଡିଆନ ।ସେ ଯାହା କହୁଛନ୍ତି ତାକୁ ମାନିବାକୁ ବାଧ୍ୟ କରୁଛନ୍ତି । ପାଣ୍ଡିଆନଙ୍କ ଦବଦବାକୁ ନେଇ ବିଜେଡିରେ ବହୁଛି ଅସନ୍ତୋଷର ଝଡ଼ । ବରିଷ୍ଠଙ୍କ ବାକ ବିତଣ୍ଡା ପରେ ଯୁବ ଛାତ୍ର ସଭାପତି ଚୟନକୁ ନେଇ ହୋଇଛି ବିସ୍ଫୋରଣ । ବିନା ଆଲୋଚନାରେ ସଭାପତି ଚୟନ କରାଯାଇଥିବାରୁ ବିଦ୍ରୋହ କରୁଛନ୍ତି ଉଭୟ ଯୁବ ଓ ଛାତ୍ର ଗୋଷ୍ଠୀ । କିନ୍ତୁ ବିଦ୍ରୋହୀଙ୍କୁ ଦମନ ଲାଗି କୋଟେରୀ ଗ୍ରୁପ ମାଧ୍ୟମରେ ପାଣ୍ଡିଆନ ଦେଇଛନ୍ତି କଡ଼ା ବାର୍ତ୍ତା । ନବୀନ ନିବାସ ବୈଠକ ପରେ କୁହାଯାଇଛି ବସ୍ ଇଜ୍ ଅଲୱେଜ୍ ରାଇଟ୍ । ଅର୍ଥାତ ବସଙ୍କ ନିର୍ଦ୍ଦେଶ ସମସ୍ତେ ମାନିବାକୁ ବାଧ୍ୟ।