ଆଧାର ଆଡ୍ରେସ୍ ଅପଡେଟ୍ ହେଲା ସହଜ, ଏସବୁ ପରିବର୍ତ୍ତନ ପାଇଁ ଲାଗୁ ହେବ ଫି

ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

ଭାରତୀୟ ବିଶିଷ୍ଟ ପରିଚୟ ପ୍ରାଧିକରଣ (UIDAI) ଆଧାର କାର୍ଡଧାରୀଙ୍କ ପାଇଁ ଏକ ବଡ଼ ପରିବର୍ତ୍ତନ ଘୋଷଣା କରିଛି। ଏଣିକି ଅନଲାଇନ୍ ପୋର୍ଟାଲ୍‌ରେ ଠିକଣା ପରିବର୍ତ୍ତନ ପ୍ରକ୍ରିୟାକୁ ଅତ୍ୟନ୍ତ ସହଜ କରାଯାଇଛି, ଯାହା ଦେଶରେ ଡିଜିଟାଲ୍ ବ୍ୟବହାରକୁ ତ୍ୱରାନ୍ୱିତ କରିବ।

ଅନଲାଇନ୍‌ରେ ଆଧାର ଠିକଣା ଅପଡେଟ୍ ସେବା ଜୁଲାଇ ୧୪, ୨୦୨୬ ପର୍ଯ୍ୟନ୍ତ ସମ୍ପୂର୍ଣ୍ଣ ମାଗଣା ରହିବ।

ଠିକଣା ବ୍ୟତୀତ ନାମ, ଜନ୍ମ ତାରିଖ, ମୋବାଇଲ୍ ନମ୍ବର ଏବଂ ବାୟୋମେଟ୍ରିକ୍ସ (ଆଙ୍ଗୁଠି ଚିହ୍ନ, ଆଖିର ସ୍କାନ୍, ମୁହଁର ଫଟୋ) ଆଦି ଜନସାଂଖ୍ୟିକ ତଥ୍ୟରେ ପରିବର୍ତ୍ତନ ପାଇଁ ନିକଟସ୍ଥ ଆଧାର ସେବା କେନ୍ଦ୍ରକୁ ଯିବାକୁ ପଡ଼ିବ।

UIDAI ଏହି ଅନ୍ୟାନ୍ୟ ଜନସାଂଖ୍ୟିକ ତଥ୍ୟ ଓ ବାୟୋମେଟ୍ରିକ୍ସ ପରିବର୍ତ୍ତନ ପାଇଁ ଏକ ନୂତନ ଫି’ ଧାର୍ଯ୍ୟ କରିଛି। ଏହାର ଦର ₹ ୭୫ରୁ ₹ ୧୨୫ ମଧ୍ୟରେ ରହିଛି, ଯାହା ଆଧାର ସେବା କେନ୍ଦ୍ରରେ ଅପଡେଟ୍ କରାଯାଇପାରିବ।

ଅନଲାଇନ୍‌ରେ ଠିକଣା ଅପଡେଟ୍ ପାଇଁ ଏପରି କରନ୍ତୁ
ଠିକଣା ପରିବର୍ତ୍ତନ କରିବା ପାଇଁ ଆଧାର କାର୍ଡଧାରୀମାନେ ନିମ୍ନଲିଖିତ ପଦ୍ଧତି ଅନୁସରଣ କରିପାରିବେ:

UIDAIର ଅଫିସିଆଲ୍ ୱେବସାଇଟ୍‌କୁ ଯାଆନ୍ତୁ।

‘Document Update’ (ଡକ୍ୟୁମେଣ୍ଟ୍ ଅପଡେଟ୍) ସେକ୍ସନ୍‌ରେ କ୍ଲିକ୍ କରନ୍ତୁ।

‘Submit’ (ଜମା କରନ୍ତୁ) ଉପରେ କ୍ଲିକ୍ କରି ଆଧାର ନମ୍ବର ଦାଖଲ କରନ୍ତୁ।

ପଞ୍ଜୀକୃତ ମୋବାଇଲ୍ ନମ୍ବରରେ ଆସିଥିବା OTP ଦ୍ୱାରା ଯାଞ୍ଚ (verification) କରନ୍ତୁ।

‘Address Update’ (ଠିକଣା ଅପଡେଟ୍) ଉପରେ କ୍ଲିକ୍ କରି ନିଜ ଡକ୍ୟୁମେଣ୍ଟ୍ କିମ୍ବା ପରିବାର ମୁଖ୍ୟଙ୍କ ଆଧାର ସହାୟତାରେ ଅପଡେଟ୍ କରିବାକୁ ବାଛନ୍ତୁ।

ଆବଶ୍ୟକୀୟ ବିବରଣୀ ଏବଂ ସମର୍ଥନକାରୀ ଦସ୍ତାବିଜ୍ (supporting document) ଅପଲୋଡ୍ କରନ୍ତୁ।

ଭବିଷ୍ୟତ ଆବଶ୍ୟକତା ପାଇଁ ରସିଦ୍‌ (acknowledgment receipt) ସେଭ୍ କରନ୍ତୁ।

ରସିଦ୍‌ରେ ଥିବା ୧୪-ଅଙ୍କ ବିଶିଷ୍ଟ ଅପଡେଟ୍ ଅନୁରୋଧ ନମ୍ବର (URN) ବ୍ୟବହାର କରି ଅନଲାଇନ୍‌ରେ ଠିକଣା ଅପଡେଟ୍ ସ୍ଥିତି(ଷ୍ଟାଟସ) ଯାଞ୍ଚ କରାଯାଇପାରିବ।

UIDAI ଅନୁଯାୟୀ, ଆଧାର ଠିକଣା ଅପଡେଟ୍ ହେବାକୁ ବୈଧ ଦସ୍ତାବିଜ୍ ଦାଖଲର ତାରିଖରୁ ୯୦ ଦିନ ପର୍ଯ୍ୟନ୍ତ ସମୟ ଲାଗିପାରେ।