ଡିସେମ୍ବର ୧ରୁ ସଂସଦର ଶୀତ ଅଧିବେଶନ ଆରମ୍ଭ
ନୂଆଦିଲ୍ଲୀ: ସଂସଦର ଶୀତକାଳୀନ ଅଧିବେଶନ ଡିସେମ୍ବର ୧ ତାରିଖରୁ ଆରମ୍ଭ ହୋଇ ଡିସେମ୍ବର ୧୯ ତାରିଖ ପର୍ଯ୍ୟନ୍ତ ଚାଲିବ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ରବିବାର ଏକ ଇନ୍ ଷ୍ଟାଗ୍ରାମ୍ ପୋଷ୍ଟରେ ଏହି ସୂଚନା ସେୟାର କରିଛନ୍ତି।
ଶୀତକାଳୀନ ଅଧିବେଶନ ସମୟରେ ବିରୋଧୀ ନେତାମାନେ SIR ପ୍ରସଙ୍ଗରେ ସରକାରଙ୍କୁ ଘେରିବାକୁ ଚେଷ୍ଟା କରିପାରନ୍ତି। ହରିୟାଣା ଏବଂ ମହାରାଷ୍ଟ୍ରରେ କଥିତ ଭୋଟ ଚୋରି ପ୍ରସଙ୍ଗ ମଧ୍ୟ ଉଠାଯାଇପାରେ।କିରେନ୍ ରିଜିଜୁ ଇନ୍ ଷ୍ଟାଗ୍ରାମ୍ ରେ ଲେଖିଛନ୍ତି, “ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଡିସେମ୍ବର ୧, ୨୦୨୫ ରୁ ଡିସେମ୍ବର ୧୯, ୨୦୨୫ (ସଂସଦୀୟ କାର୍ଯ୍ୟର ଆବଶ୍ୟକତା ଅନୁଯାୟୀ) ସଂସଦର ଶୀତକାଳୀନ ଅଧିବେଶନ ଡାକିବା ପାଇଁ ସରକାରଙ୍କ ପ୍ରସ୍ତାବକୁ ଅନୁମୋଦନ କରିଛନ୍ତି। ଆମେ ଏକ ଗଠନମୂଳକ ଏବଂ ଉତ୍ପାଦନକ୍ଷମ ଅଧିବେଶନର ଅପେକ୍ଷା କରୁଛୁ। ଯାହା ଆମର ଗଣତନ୍ତ୍ରକୁ ମଜବୁତ କରିବ ଏବଂ ଲୋକଙ୍କ ଆକାଂକ୍ଷା ପୂରଣ କରିବ।”
ସଂସଦର ମୌସୁମୀ ଅଧିବେଶନ ଜୁଲାଇ ୨୧ ରୁ ଅଗଷ୍ଟ ୨୧ ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା। ଏହି ୩୨ ଦିନ ମଧ୍ୟରୁ ଗୃହ କେବଳ ୨୧ ଦିନ ପାଇଁ ଚାଲୁଥିଲା। ଏହି ସମୟ ମଧ୍ୟରେ ସଂସଦର ଉଭୟ ଗୃହରେ ମୋଟ ୧୫ଟି ବିଲ୍ ଗୃହୀତ ହୋଇଥିଲା। ତଥାପି ଅଧିବେଶନର ପ୍ରଥମ ଦିନରେ ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଇସ୍ତଫାକୁ ନେଇ ପ୍ରବଳ ହଟ୍ଟଗୋଳ ହୋଇଥିଲା। ପରବର୍ତ୍ତୀ ସମୟରେ ଉପାଧ୍ୟକ୍ଷ ହରିବଂଶ ନାରାୟଣ ସିଂହ ସମଗ୍ର ଅଧିବେଶନ ପାଇଁ ରାଜ୍ୟସଭାର କାର୍ଯ୍ୟକାରିତା ପରିଚାଳନା କରିଥିଲେ। ଏହି ସମୟ ମଧ୍ୟରେ ଲୋକସଭାରେ 14 ଟି ବିଲ୍ ଆଗତ କରାଯାଇଥିଲା ଏବଂ 12 ଟି ଗୃହୀତ ହୋଇଥିଲା। ସେହିପରି ରାଜ୍ୟସଭାରେ 15ଟି ବିଲ୍ ଗୃହୀତ/ପ୍ରତ୍ୟାହାର କରାଯାଇଥିଲା। ଅଧିବେଶନ ସାରା ଉଭୟ ଗୃହରେ ବାରମ୍ବାର ବାଧା ସୃଷ୍ଟି ହୋଇଥିଲା।
ଲୋକସଭାର ଉତ୍ପାଦକତା ପ୍ରାୟ ୩୧% ଏବଂ ରାଜ୍ୟସଭାର ପ୍ରାୟ ୩୯% ଥିଲା। ଏହି ଅଧିବେଶନ ସମୟରେ ଉପଲବ୍ଧ ମୋଟ ୧୨୦ ଘଣ୍ଟା ମଧ୍ୟରୁ ଲୋକସଭାରେ କେବଳ ୩୭ ଘଣ୍ଟା ଆଲୋଚନା ସମ୍ଭବ ହୋଇଥିଲା ଏବଂ ରାଜ୍ୟସଭାରେ କେବଳ ୪୧ ଘଣ୍ଟା ୧୫ ମିନିଟ୍ ଆଲୋଚନା ସମ୍ଭବ ହୋଇଥିଲା।
