ସ୍ପାଇସଜେଟ୍ ବିମାନର ଇଞ୍ଜିନ ଫେଲ୍; ଏମର୍ଜେନ୍ସି ଲ୍ୟାଣ୍ଡିଂ…
ନୂଆଦିଲ୍ଲୀ: ବିମାନ କମ୍ପାନୀ ସ୍ପାଇସଜେଟ୍ ସମ୍ପର୍କରେ ଏକ ବଡ଼ ଖବର ସାମ୍ନାକୁ ଆସିଛି। ମୁମ୍ବାଇରୁ କୋଲକାତା ଯାଉଥିବା ସ୍ପାଇସଜେଟ୍ SG670 ବିମାନର ଗୋଟିଏ ଇଞ୍ଜିନ୍ ଖରାପ ହୋଇଯିବାରୁ ଜରୁରୀକାଳୀନ ଅବତରଣ କରିବାକୁ ପଡିଛି।
ବିମାନବନ୍ଦର ଅଧିକାରୀଙ୍କ ଅନୁଯାୟୀ, ପାଇଲଟ୍ ତୁରନ୍ତ ସତର୍କତାର ସହିତ ଜରୁରୀକାଳୀନ ଅବତରଣ ପାଇଁ ଅନୁମତି ମାଗିଥିଲେ। ଯାହା ପରେ ବିମାନଟି କୋଲକାତା ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିଥିଲା। ରବିବାର ବିଳମ୍ବିତ ରାତିରେ ଘଟିଛି ଏହି ଘଟଣା। ଅଧିକାରୀମାନେ କହିଛନ୍ତି ଯେ ବିମାନଟି ସୁରକ୍ଷିତ ଭାବରେ ଅବତରଣ କରିବା ପରେ ରାତି 11:38 (23:38) ରେ ସମ୍ପୂର୍ଣ୍ଣ ଜରୁରୀକାଳୀନ ପରିସ୍ଥିତିକୁ ପ୍ରତ୍ୟାହାର କରାଯାଇଥିଲା। ବିମାନରେ ଥିବା ସମସ୍ତ ଯାତ୍ରୀ ଏବଂ କ୍ରୁ ସୁରକ୍ଷିତ ଅଛନ୍ତି।
ଅନ୍ୟପକ୍ଷରେ ଘଟଣା ଜଣାପଡିବା ମାତ୍ରେ ବିମାନବନ୍ଦରରେ ଅଗ୍ନିଶମ ଗାଡ଼ି ଏବଂ ଡାକ୍ତରୀ ଦଳ ମୁତୟନ କରାଯାଇଥିଲା। ଅବତରଣ ପରେ ଇଞ୍ଜିନ୍ ଫେଲ୍ କାରଣ ଜାଣିବା ପାଇଁ ବୈଷୟିକ ଦଳ ବିମାନର ଯାଞ୍ଚ ଆରମ୍ଭ କରିଥିଲେ।
