ବାଂଲାଦେଶ ଆଇସିଟି ଆଜି ଶେଖ୍ ହସିନାଙ୍କ ବିରୋଧରେ ରାୟ ଶୁଣାଇବ; ଢାକାରେ ହାଇଆଲର୍ଟ
ନୂଆଦିଲ୍ଲୀ,୧୭|୧୧: ମାନବତା ବିରୋଧୀ ଅପରାଧ ମାମଲାରେ ପଦଚ୍ୟୁତ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ବିରୋଧରେ ଆନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ – ବାଂଲାଦେଶ (ICT-BD) ରାୟ ପ୍ରକାଶ କରିବା ପୂର୍ବରୁ ସୋମବାର ବାଂଲାଦେଶରେ ଅସାଧାରଣ ଭାବରେ ନୀରବତା ଦେଖାଦେଇଥିଲା। ରାୟର ଗୋଟିଏ ଦିନ ପୂର୍ବରୁ, ହସିନାଙ୍କ ଦଳ ଆୱାମୀ ଲିଗ୍ ଦେଶବ୍ୟାପୀ “ସମ୍ପୂର୍ଣ୍ଣ ବନ୍ଦ” ଘୋଷଣା କରିଛି। ଏହି ବନ୍ଦ ଡାକରା ଏପରି ସମୟରେ ଦିଆଯାଇଛି, ଯେତେବେଳେ ୟୁନୁସ୍ ସରକାର ପୂର୍ବରୁ ଆୱାମୀ ଲିଗ୍ର ସମସ୍ତ କାର୍ଯ୍ୟକଳାପକୁ ନିଷିଦ୍ଧ କରିସାରିଛି। ଦୁଇ ନେତାଙ୍କ ସମର୍ଥକ ମୁହାଁମୁହିଁ ହେବାର ସମ୍ଭାବନା ଥିବାରୁ ଏବେ ସାରା ଦେଶରେ ହାଇ ଆଲର୍ଟ ଜାରି କରାଯାଇଛି।
ରାତିସାରା ପୋଡ଼ାଜଳା ଏବଂ ବୋମା ଆକ୍ରମଣ ପରେ ଭୟଙ୍କର ନୀରବତା ଦେଖାଯାଇଥିଲା | ଅଜ୍ଞାତ ଆକ୍ରମଣକାରୀମାନେ ଏକ ପୋଲିସ ଷ୍ଟେସନ୍ କମ୍ପ୍ଲେକ୍ସର ଯାନବାହନ ଡମ୍ପିଂ କୋଣରେ ନିଆଁ ଲଗାଇ ଦେଇଥିଲେ ଏବଂ ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସଙ୍କ ଜଣେ ପରାମର୍ଶଦାତା ପରିଷଦ ସଦସ୍ୟଙ୍କ ବାସଭବନ ବାହାରେ ଦୁଇଟି ଇମ୍ପ୍ରୋଭାଇଜ୍ଡ ଏକ୍ସପ୍ଲୋସିଭ୍ ଡିଭାଇସ୍ (IED) ବିସ୍ଫୋରଣ କରିଥିଲେ। ଢାକାର ପ୍ରମୁଖ ଛକଗୁଡ଼ିକରେ ମଧ୍ୟ ଏକାଧିକ ବିସ୍ଫୋରଣ ଘଟିଥିବା ରିପୋର୍ଟରେ ଜଣାପଡିଛି। ରଙ୍ଗପୁର, ଚାଟୋଗ୍ରାମ ଏବଂ ଅନ୍ୟାନ୍ୟ ସହରରୁ ମିଳିଥିବା ରିପୋର୍ଟଗୁଡ଼ିକରେ କମ୍ ଭିଡ଼ ଏବଂ ସୁରକ୍ଷା କର୍ମୀଙ୍କ ଦ୍ୱାରା ତୀବ୍ର ପେଟ୍ରୋଲିଂ ସମାନ ପରିବେଶକୁ ଦର୍ଶାଇଛି।
ଉତ୍ତେଜନାକୁ ରୋକିବା ପାଇଁ, ଢାକା ମେଟ୍ରୋପଲିଟାନ୍ ପୋଲିସ (DMP) ହିଂସାତ୍ମକ ପ୍ରଦର୍ଶନକାରୀଙ୍କ ଉପରେ ଗୁଳି ଚଳାଇବାକୁ ଏହାର କର୍ମଚାରୀମାନଙ୍କୁ ଅନୁମତି ଦେଇଛି। DMP କମିଶନର SM ସଜ୍ଜାଦ ଅଲି କହିଛନ୍ତି ଯେ ,”ଯେଉଁ ବ୍ୟକ୍ତି ହତ୍ୟା ଉଦ୍ଦେଶ୍ୟରେ ବସ୍ ପୋଡ଼ି ଦିଅନ୍ତି କିମ୍ବା ବୋମା ଫିଙ୍ଗି ଦିଅନ୍ତି ତାଙ୍କୁ ଗୁଳି କରାଯିବା ଉଚିତ” |
ଆଜି ଆଇସିଟି ରାୟ ଶୁଣାଇବାକୁ ଥିବା ମାମଲାରେ ଶେଖ୍ ହାସିନା, ପୂର୍ବତନ ଗୃହମନ୍ତ୍ରୀ ଅସଦୁଜ୍ଜାମାନ ଖାନ କମାଲ ଏବଂ ପୂର୍ବତନ ପୁଲିସ ମହାନିରୀକ୍ଷକ ଚୌଧୁରୀ ଅବଦୁଲ୍ଲା ଅଲ-ମାମୁନଙ୍କ ବିରୋଧରେ ଗମ୍ଭୀର ଅଭିଯୋଗ ରହିଛି। ଅଭିଯୋଗ ହେଉଛି ଯେ, ଜୁଲାଇ-ଅଗଷ୍ଟ ୨୦୨୪ରେ ଛାତ୍ର ପ୍ରତିବାଦ ସମୟରେ ସେମାନେ ହିଂସା ବୃଦ୍ଧି କରିବା ଏବଂ ନିରସ୍ତ୍ର ଛାତ୍ରଙ୍କ ଉପରେ ଗୁଳି ଚଳାଇବା ପାଇଁ ଆଦେଶ ଦେଇଥିଲେ। ଶୁଣାଣି ଅକ୍ଟୋବର ୨୩ରେ ଶେଷ ହୋଇଥିବା ବେଳେ ଆଜି ଦଣ୍ଡ ଘୋଷଣା କରାଯିବ।
ଆଇସିଟି-ବିଡି ନିୟମ ଅନୁଯାୟୀ, ହସିନା ଯଦି ରାୟ ପ୍ରକାଶର ୩୦ ଦିନ ମଧ୍ୟରେ ଆତ୍ମସମର୍ପଣ କରନ୍ତି କିମ୍ବା ଗିରଫ ନ ହୁଅନ୍ତି, ତେବେ ସେ ଆପିଲେଟ୍ ଡିଭିଜନରେ ଆବେଦନ କରିପାରିବେ ନାହିଁ। ଆୱାମୀ ଲିଗର ଫେସବୁକ୍ ପୃଷ୍ଠାରେ ଅପଲୋଡ୍ ହୋଇଥିବା ଏକ ଅଡିଓ ବାର୍ତ୍ତାରେ, ହସିନା ଅଭିଯୋଗଗୁଡ଼ିକୁ ପ୍ରତ୍ୟାଖ୍ୟାନ କରିଛନ୍ତି ଏବଂ ସମର୍ଥକମାନଙ୍କୁ ଚିନ୍ତା ନକରିବାକୁ ଅନୁରୋଧ କରିଛନ୍ତି, ଏବଂ କହିଛନ୍ତି ଯେ, “ଏହା କେବଳ ସମୟର କଥା”। ହସିନା ଏବଂ ତାଙ୍କର ଦୁଇ ସହଯୋଗୀଙ୍କ ବିରୁଦ୍ଧରେ ଗତବର୍ଷ ଜୁଲାଇରେ ବିଦ୍ରୋହ ସହିତ ଜଡିତ ମାନବତା ବିରୋଧୀ ଅପରାଧର ଅଭିଯୋଗ ରହିଛି, ଯେଉଁଥିରେ ହତ୍ୟା, ହତ୍ୟା ଉଦ୍ୟମ, ନିର୍ଯାତନା, ନିରସ୍ତ୍ର ଛାତ୍ର ପ୍ରତିବାଦକାରୀଙ୍କ ଉପରେ ଘାତକ ବଳ ପ୍ରୟୋଗ, ଘାତକ ଅସ୍ତ୍ରଶସ୍ତ୍ର ନିୟୋଜିତ କରିବାର ନିର୍ଦ୍ଦେଶ ଏବଂ ରଙ୍ଗପୁର ଏବଂ ଢାକାରେ ନିର୍ଦ୍ଦିଷ୍ଟ ହତ୍ୟା ଅନ୍ତର୍ଭୁକ୍ତ ଅଭିଯୋଗ ମଧ୍ୟ ରହିଛି । ହସିନା ସମସ୍ତ ଅଭିଯୋଗକୁ “ସମ୍ପୂର୍ଣ୍ଣ ମିଥ୍ୟା” ବୋଲି କହି ଅସ୍ୱୀକାର କରିଛନ୍ତି।
