ଟ୍ରମ୍ପଙ୍କୁ ଇରାନର ଉପହାସ! ଆନିମେସନ ଭିଡିଓ ଭାଇରଲ
ତେହରାନ,୨୭।୪: ୱାଶିଂଟନରେ ହ୍ବାଇଟ ହାଉସ କରେସପଣ୍ଡେଣ୍ଟ୍ସଙ୍କ ରାତ୍ରୀଭୋଜନ ଚାଲିଥିବା ସମୟରେ ଘଟିଥିବା ଗୁଳିକାଣ୍ଡ ଘଟଣା ଉପରେ , ଇରାନ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ପରିହାସ କରି ଏକ ଲେଗୋ-ଶୈଳୀର ‘ଡିସ ଟ୍ରାକ’ ଭିଡିଓ ଜାରି କରିଛି। ଏହି ଭିଡିଓ ସୋସିଆଲ ମିଡିଆରେ ଖୁବ ଜୋରେ ଭାଇରଲ ହେବାରେ ଲାଗିଛି |
ତେବେ ସୋସିଆଲ ମିଡିଆରେ ଖୁବ ଭାଇରଲ ହୋଇଥିବା ଏହି ଆନିମେଟେଡ କ୍ଲିପରେ ଏକ ବ୍ୟଙ୍ଗାତ୍ମକ ଗୀତ ରହିଛି ଯାହା ଟ୍ରମ୍ପଙ୍କ ନେତୃତ୍ୱ ଏବଂ ତାଙ୍କ ଆଖପାଖରେ ଥିବା ସୁରକ୍ଷା ବ୍ୟବସ୍ଥାକୁ ଟାର୍ଗେଟ କରିଥିବାର ଦର୍ଶାଯାଇଛି | କ୍ଲିପରେ ସୁରକ୍ଷା କର୍ମୀମାନେ ପରିସ୍ଥିତିକୁ ନିୟନ୍ତ୍ରଣ କରୁଥିବା ଦୃଶ୍ୟ ମଧ୍ୟ ଦେଖିବାକୁ ମିଳିଛି।
ଭିଡିଓଟି ହ୍ବାଇଟ ହାଉସରେ ରାତ୍ରୀଭୋଜନ ସମୟରେ ସୃଷ୍ଟି ହୋଇଥିବା ଗୁଳିକାଣ୍ଡ ଘଟଣାକୁ ଦର୍ଶାଉଛି | ଉକ୍ତ ଗୁଳିକାଣ୍ଡ ଘଟଣା ପରେ ଟ୍ରମ୍ପ ଏବଂ ଅନ୍ୟ ଶୀର୍ଷ ନେତାମାନଙ୍କୁ ହଠାତ ସେହି ସ୍ଥାନ ଖାଲି କରିବାକୁ ପଡିଥିଲା।
ତେବେ ଇରାନ ପକ୍ଷରୁ ଟ୍ରମ୍ପ ପ୍ରଶାସନକୁ ସମାଲୋଚନା କରିବା ପାଇଁ, ଭିଡିଓର ନିର୍ମାତାମାନେ ଏକ ରାପ-ଶୈଳୀର ‘ଡିସ ଟ୍ରାକ’ ବ୍ୟବହାର କରିଥିଲେ | ଯେଉଁଥିରେ ଟ୍ରମ୍ପଙ୍କୁ ନାଟକ ନିର୍ମାଣ ଏବଂ ତାଙ୍କ ନିଜସ୍ବ ଏଜେଣ୍ଡା ଅନୁଯାୟୀ କାହାଣୀକୁ ହେରଫେର କରିବାର ଅଭିଯୋଗ କରାଯାଇଥିଲା। ଏଥିରେ ଆହୁରି ସ୍ପଷ୍ଟ ଭାବରେ ଦର୍ଶାଯାଇଛି ଯେ, ଟ୍ରମ୍ପ ସରକାର ଆମେରିକା ଭିତରେ ଗଣମାଧ୍ୟମ କିପରି କାହାଣୀକୁ ନିୟନ୍ତ୍ରଣ କରନ୍ତି | କିନ୍ତୁ ତାଙ୍କର ଏ ଆଧିପତ୍ୟ ଇରାନ ଉପରେ କୌଣସି ପ୍ରଭାବ ନାହିଁ।
ତେବେ ଭିଡିଓରେ ଟ୍ରମ୍ପଙ୍କୁ ଉପହାସ କରି କୁହାଯାଇଛିଯେ , ଯେତେବେଳେ ତାଙ୍କର ଲୋକପ୍ରିୟତା କିମ୍ବା ଅନୁମୋଦନ ମୂଲ୍ୟାଙ୍କନ ହ୍ରାସ ପାଏ, ସେ ସାଧାରଣ ଲୋକଙ୍କ ଧ୍ୟାନ ନିଜ ଆଡ଼କୁ କେନ୍ଦ୍ରିତ କରିବାକୁ ନାଟକୀୟ ପରିସ୍ଥିତି ସୃଷ୍ଟି କରନ୍ତି କିମ୍ବା ବିଭ୍ରାନ୍ତିକର ମନ୍ତବ୍ୟ ଦିଅନ୍ତି।
ଏହି ଭିଡିଓ ରେ ,ଟ୍ରମ୍ପଙ୍କ ସାର୍ବଜନୀନ ବ୍ୟକ୍ତିତ୍ୱକୁ ନେଇ ଆକ୍ଷେପ କରିବା ସହିତ ଟ୍ରମ୍ପଙ୍କୁ ‘ଅତ୍ୟନ୍ତ ଦୁର୍ବଳ’ ଭାବରେ ମଧ୍ୟ ବର୍ଣ୍ଣନା କରାଯାଇଛି | ଆହୁରି ଦର୍ଶାଯାଇଛି କି ଯେ, ଦେଶ ବର୍ତ୍ତମାନ ଏକ ଆର୍ଥିକ ସଙ୍କଟର ସମ୍ମୁଖୀନ ହେଉଛି। ଏହା ବ୍ୟତୀତ, କିଛି MAGA ସମର୍ଥକ ମଧ୍ୟ ତାଙ୍କ ନେତୃତ୍ୱର ବିରୋଧ କି ଆସୁଥିବା ମଧ୍ୟ ଭିଡିଓରେ ଦର୍ଶାଯାଇଛି |
