୮ ଦେଶର ମିଳିତ ଉଦ୍ଧାରକାରୀ ଦଳର ୧୦୦ ଘଣ୍ଟାର ଅପରେସନ ପରେ , ଭୂକମ୍ପ ଭଗ୍ନାବଶେଷରୁ ଉଦ୍ଧାର ହେଲେ ଭେନେଜୁଏଲାର ସୁରକ୍ଷାକର୍ମୀ
ଉତ୍ତର ଭେନେଜୁଏଲାରେ ଜୁନ୍ ୨୪ରେ ଘଟିଥିବା ଶକ୍ତିଶାଳୀ ଭୂମିକମ୍ପ ପରେ ଭଗ୍ନାବଶେଷ ତଳେ ଫସି ରହିଥିବା ୪୩ ବର୍ଷୀୟ ସୁରକ୍ଷାକର୍ମୀ ହର୍ନାନ୍ ଆଲବର୍ଟୋ ଗିଲ୍ ଫ୍ଲୋରେସଙ୍କୁ ଦୀର୍ଘ ୮ ଦିନ ପରେ ଜୀବନ୍ତ ଉଦ୍ଧାର କରାଯାଇଛି। ଚିଲିର ନେତୃତ୍ୱରେ ଆମେରିକା, ପର୍ତ୍ତୁଗାଲ, ମେକ୍ସିକୋ, କୋଷ୍ଟା ରିକା, ଏଲ୍ ସାଲଭାଡୋର, ଭେନେଜୁଏଲା ସମେତ ୮ଟି ଦେଶର ଉଦ୍ଧାରକାରୀ ଦଳ ପ୍ରାୟ ୧୦୦ ଘଣ୍ଟାର ଅଭିଯାନ ପରେ ତାଙ୍କୁ ସୁରକ୍ଷିତ ଭାବେ ବାହାରକୁ ଆଣିଥିଲେ।
ଭୂମିକମ୍ପ ସମୟରେ ଲାଗୁଆଇରା ରାଜ୍ୟର ଗାଲେରିଆସ୍ ପ୍ଲାୟା ଗ୍ରାଣ୍ଡେ ସପିଂ ସେଣ୍ଟରରେ ରାତ୍ରିକାଳୀନ ଡ୍ୟୁଟିରେ ଥିବା ଗିଲ୍ ଫ୍ଲୋରେସ ତାଙ୍କ ସୁରକ୍ଷା କ୍ୟାବିନ୍ ଭିତରେ ଫସି ଯାଇଥିଲେ। ୭.୨ ଓ ୭.୫ ତୀବ୍ରତାର ଦୁଇଟି ଶକ୍ତିଶାଳୀ ଭୂମିକମ୍ପରେ ସାତ ମହଲା କୋଠା ଭୁଶୁଡ଼ି ପଡ଼ିଥିଲେ ମଧ୍ୟ ତାଙ୍କ କ୍ୟାବିନ୍ ଅକ୍ଷତ ରହିଥିଲା। ଏହା ତାଙ୍କୁ ଧ୍ୱଂସାବଶେଷ ତଳେ ଏକ ଛୋଟ ବାୟୁ ସ୍ଥାନ ଯୋଗାଇ ଜୀବନ୍ତ ରଖିଥିଲା। ଏହି ବିପର୍ଯ୍ୟୟରେ ୨,୨୦୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ୧୧ ହଜାରରୁ ଅଧିକ ଲୋକ ଆହତ ହୋଇଛନ୍ତି।
ଉଦ୍ଧାରକାରୀ ଦଳ ଟେଲିସ୍କୋପିକ୍ କ୍ୟାମେରା ସାହାଯ୍ୟରେ ଗିଲ୍ ଫ୍ଲୋରେସଙ୍କ ସହ ଯୋଗାଯୋଗ ସ୍ଥାପନ କରିବା ସହ ସଂକୀର୍ଣ୍ଣ ରାସ୍ତା ଦେଇ ପାଣି ଓ ତରଳ ପୁଷ୍ଟିକର ଖାଦ୍ୟ ପହଞ୍ଚାଇଥିଲେ। ଶେଷ ପର୍ଯ୍ୟାୟରେ ପ୍ରାୟ ୩୦ ଜଣ ଉଦ୍ଧାରକାରୀ ମିଳିତ ଭାବେ ଧ୍ୱଂସାବଶେଷ ହଟାଇ ତିନି ମିଟର ଲମ୍ବା ସୁଡ଼ଙ୍ଗ ଖୋଳି ତାଙ୍କୁ ବାହାରକୁ ଆଣିଥିଲେ। ଉଦ୍ଧାର ପରେ ଗିଲ୍ ଫ୍ଲୋରେସଙ୍କୁ ତୁରନ୍ତ ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଥିଲା।
