ଆମାଜନ ଟ୍ରକରୁ ୬୦୪ ମୋବାଇଲ ଚୋରି, କୋଟି କୋଟି ଟଙ୍କାର ଠକେଇର ପର୍ଦ୍ଦାଫାଶ
ଇ-କମର୍ସ କମ୍ପାନୀ ଆମାଜନର ଏକ ଡେଲିଭରି ଟ୍ରକରୁ ୬୦୪ଟି ମୋବାଇଲ ଫୋନ ଚୋରି ହୋଇଥିବା ଘଟଣା ସାମ୍ନାକୁ ଆସିଛି। ଟ୍ରକଟି ଗୋଟିଏ ଗୋଦାମରୁ ଅନ୍ୟ ଗୋଦାମକୁ ମୋବାଇଲ ଫୋନ ନେଇ ଯାଉଥିବା ବେଳେ ଏହି ଚୋରି ଘଟିଥିବା ଜଣାପଡ଼ିଛି। ଘଟଣା ପରେ କମ୍ପାନୀ ପକ୍ଷରୁ ପୋଲିସ ଥାନାରେ ଅଭିଯୋଗ ଦାଖଲ କରାଯାଇଥିବା ବେଳେ ତଦନ୍ତ ଆରମ୍ଭ ହୋଇଛି।
ଟ୍ରକଟି ଗନ୍ତବ୍ୟ ସ୍ଥାନରେ ପହଞ୍ଚିବା ପରେ ପାର୍ସଲଗୁଡ଼ିକର ଯାଞ୍ଚ କରାଯାଇଥିଲା। ସେତେବେଳେ ୬୦୪ଟି ମୋବାଇଲ ଫୋନ ନଥିବା ଜଣାପଡ଼ିଥିଲା। ଏହାପରେ ପୋଲିସ ଟ୍ରକର ଯାତ୍ରାପଥ, ଜିପିଏସ୍ ଡାଟା ଏବଂ ସିସିଟିଭି ଫୁଟେଜ୍ ଯାଞ୍ଚ କରୁଛି। ପ୍ରାଥମିକ ତଦନ୍ତରୁ ଯାତ୍ରା ସମୟରେ କୌଣସି ସ୍ଥାନରେ ପାର୍ସଲ ଖୋଲି ମୋବାଇଲଗୁଡ଼ିକ ଚୋରି କରାଯାଇଥିବା ସନ୍ଦେହ କରାଯାଉଛି।
ଚୋରି ହୋଇଥିବା ମୋବାଇଲଗୁଡ଼ିକର ମୂଲ୍ୟ କୋଟି କୋଟି ଟଙ୍କା ହେବ ବୋଲି ଅନୁମାନ କରାଯାଉଛି। ଏହି ଘଟଣାରେ ଟ୍ରକ କର୍ମଚାରୀ କିମ୍ବା ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେନେଇ ମଧ୍ୟ ପୋଲିସ ତଦନ୍ତ କରୁଛି। ସେହିପରି ଚୋରି ହୋଇଥିବା ସମସ୍ତ ମୋବାଇଲର ଆଇଏମଇଆଇ ନମ୍ବରକୁ ଟ୍ରାକିଂରେ ରଖାଯାଇଛି ଏବଂ ଅଭିଯୁକ୍ତଙ୍କୁ ଚିହ୍ନଟ କରି ଶୀଘ୍ର ଗିରଫ କରାଯିବ ବୋଲି ପୋଲିସ ସୂଚନା ଦେଇଛି।
