ସିୟା ଗୋୟଲ କେତନଙ୍କୁ ହତ୍ୟା କରିବା ପୂର୍ବରୁ ଇନ୍ଦୋରର ଚର୍ଚ୍ଚିତ ରାଜା ରଘୁବଂଶୀ ହତ୍ୟା ମାମଲା ସମ୍ପର୍କରେ ବିସ୍ତୃତ ସୂଚନା ଗୁଗୁଲ୍ରେ ଖୋଜି ପଢ଼ିଥିଲେ
ପୁନେର କେତନ ଅଗ୍ରୱାଲଙ୍କ ହତ୍ୟା ମାମଲାରେ ତଦନ୍ତ ସମୟରେ ଏକ ନୂଆ ତଥ୍ୟ ସାମ୍ନାକୁ ଆସିଛି। ପୁଲିସ ଜବତ କରିଥିବା ଦୁଇଟି ମୋବାଇଲ୍ ଫୋନର ଇଣ୍ଟରନେଟ୍ ହିଷ୍ଟ୍ରିରୁ ଜଣାପଡ଼ିଛି ଯେ, ମୁଖ୍ୟ ଅଭିଯୁକ୍ତ ସିୟା ଗୋୟଲ କେତନଙ୍କୁ ହତ୍ୟା କରିବା ପୂର୍ବରୁ ଇନ୍ଦୋରର ଚର୍ଚ୍ଚିତ ରାଜା ରଘୁବଂଶୀ ହତ୍ୟା ମାମଲା ସମ୍ପର୍କରେ ବିସ୍ତୃତ ସୂଚନା ଗୁଗୁଲ୍ରେ ଖୋଜି ପଢ଼ିଥିଲେ। ଏପରିକି ଗିରଫ ପରେ ହାଜତରେ ମହିଳାଙ୍କୁ ମାଡ଼ ମରାଯାଏ କି ନାହିଁ, ସେ ସମ୍ପର୍କରେ ମଧ୍ୟ ଇଣ୍ଟରନେଟ୍ରୁ ସୂଚନା ସଂଗ୍ରହ କରିଥିବା ତଦନ୍ତରୁ ଜଣାପଡ଼ିଛି।
ପୁଲିସ ସୂଚନା ଅନୁଯାୟୀ, ଦୁଇ ଦିନ ପୂର୍ବେ ସିୟାଙ୍କୁ ତାଙ୍କ ଘରକୁ ନେଇ ତଲାସି କରାଯାଇଥିଲା। ସେଠାରୁ ତାଙ୍କ ବେଡ୍ରୁମ୍ରୁ ଆଉ ଏକ ମୋବାଇଲ୍ ଫୋନ୍ ଜବତ କରାଯାଇଛି। ଏହାସହ ଘଟଣାର ପ୍ରତ୍ୟକ୍ଷଦର୍ଶୀଙ୍କ ବୟାନ ମଧ୍ୟ ରେକର୍ଡ କରାଯାଇଛି। ତଦନ୍ତରେ ଜଣାପଡ଼ିଛି ଯେ, ଗତ ଜୁନ୍ ୧୯ ତାରିଖରେ ସିୟା ଗୋୟଲ ଓ ତାଙ୍କ ପ୍ରେମିକ ଚେତନ ଚୌଧୁରୀ ପୁନେର ଲୋହାଗଡ଼ କିଲ୍ଲା ନିକଟରେ କେତନଙ୍କୁ ପ୍ରାୟ ୪୦୦ ଫୁଟ ଗଭୀର ଖାଇକୁ ଠେଲି ଦେଇଥିଲେ, ଯାହାଫଳରେ ତାଙ୍କର ମୃତ୍ୟୁ ଘଟିଥିଲା। ବର୍ତ୍ତମାନ ଉଭୟ ଅଭିଯୁକ୍ତ ଜୁଲାଇ ୧୬ ପର୍ଯ୍ୟନ୍ତ ବିଚାର ବିଭାଗୀୟ ହାଜତରେ ରହିବେ।
ଏହି ମାମଲାରେ ସିନ୍ ରିକ୍ରିଏସନ୍ ସମୟରେ ସିୟା ଗଣମାଧ୍ୟମକୁ ଅଶ୍ଳୀଳ ଇଙ୍ଗିତ କରିଥିବା ଅଭିଯୋଗ ମଧ୍ୟ ଉଠିଛି। ତେବେ ସିୟା ଏହାକୁ ଖଣ୍ଡନ କରି କହିଛନ୍ତି ଯେ, ଭାଇରାଲ୍ ଭିଡିଓକୁ ଭୁଲ୍ ଭାବେ ବର୍ଣ୍ଣନା କରାଯାଉଛି। ପୁଲିସ ତାଙ୍କୁ ଆଇନଗତ ପ୍ରକ୍ରିୟା ପାଇଁ ଘରକୁ ନେଇଯାଉଥିବା ବେଳେ ଗାଡ଼ିର ଦ୍ୱାରରେ ତାଙ୍କର ଦୁଇଟି ଆଙ୍ଗୁଠି ଚାପି ଯାଇ ଆହତ ହୋଇଥିଲା ଏବଂ ସେ ସେହି ଆଘାତ ଦେଖାଉଥିଲେ ବୋଲି ସଫେଇ ଦେଇଛନ୍ତି। ଉଲ୍ଲେଖଯୋଗ୍ୟ, ଫେବୃଆରୀ ୧୧ରେ କେତନ ଓ ସିୟାଙ୍କର ନିର୍ବନ୍ଧ ହୋଇଥିଲା। କିନ୍ତୁ ସିୟା ଏହି ବିବାହରେ ରାଜି ନଥିବାରୁ ପ୍ରେମିକ ଚେତନଙ୍କ ସହ ମିଶି କେତନଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର ରଚିଥିବା ପୁଲିସ ତଦନ୍ତରୁ ସାମ୍ନାକୁ ଆସିଛି।
