ପାରିବାରିକ କଳହରେ ବଳି ପଡିଲା ୧୧ ମାସର ଶିଶୁକନ୍ୟା; ପୋଷ୍ଟମର୍ଟମ ରିପୋର୍ଟ ଖୋଲିଲା ହତ୍ୟାର ସତ, ବାପା-ମା’ ଗିରଫ
ବେଙ୍ଗାଲୁରୁ: କର୍ଣ୍ଣାଟକର ବେଙ୍ଗାଲୁରୁରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ପାରିବାରିକ କଳହର ପରିଣତି ସ୍ୱରୂପ ୧୧ ମାସର ଏକ ଶିଶୁକନ୍ୟାର ମୃତ୍ୟୁ ଘଟିଥିବା ଅଭିଯୋଗରେ ପୋଲିସ ତା’ର ବାପା ଓ ମା’ଙ୍କୁ ଗିରଫ କରିଛି। ପ୍ରଥମେ ଶିଶୁଟି ଖଟରୁ ପଡ଼ି ମୃତ୍ୟୁ ହୋଇଥିବା କହି ଘଟଣାକୁ ଦୁର୍ଘଟଣା ବୋଲି ଦର୍ଶାଇବାକୁ ଚେଷ୍ଟା କରାଯାଇଥିଲେ ମଧ୍ୟ ପୋଷ୍ଟମର୍ଟମ ରିପୋର୍ଟରେ ସତ ସାମ୍ନାକୁ ଆସିଥିଲା।
ପୋଲିସ ସୂଚନା ଅନୁସାରେ, ଗତ ଜୁନ୍ ୯ ତାରିଖରେ ଆଭାଲାହାଲି ଥାନା ଅଧୀନ କିଟାଗାନୁର ଅଞ୍ଚଳର ବାସିନ୍ଦା ସେକାପ୍ପା ପୋଲିସକୁ ଫୋନ୍ କରି ତାଙ୍କ ୧୧ ମାସର ଝିଅ ଖଟରୁ ପଡ଼ି ମୃତ୍ୟୁ ହୋଇଥିବା କହିଥିଲେ। ସେତେବେଳେ ତାଙ୍କ ସ୍ତ୍ରୀ ବିଜୟଲକ୍ଷ୍ମୀ ଶୋଇଥିବାରୁ ଘଟଣା ବିଷୟରେ କିଛି ଜାଣିପାରିନଥିବା ସେ ଦାବି କରିଥିଲେ। ଶିଶୁଟିକୁ ଇଷ୍ଟ ପଏଣ୍ଟ ହସ୍ପିଟାଲକୁ ନିଆଯାଇଥିଲେ ମଧ୍ୟ ଡାକ୍ତର ତାକୁ ମୃତ ଘୋଷଣା କରିଥିଲେ। ତେବେ ପୋଷ୍ଟମର୍ଟମ ରିପୋର୍ଟରେ ଶରୀର ଭିତରେ ରକ୍ତସ୍ରାବ, ଶ୍ୱାସରୁଦ୍ଧ ହୋଇ ମୃତ୍ୟୁ ଏବଂ ଶରୀରର ବିଭିନ୍ନ ସ୍ଥାନରେ ଆଘାତର ଚିହ୍ନ ଥିବା ଜଣାପଡ଼ିଥିଲା। ଖଟର ଉଚ୍ଚତା ମାତ୍ର ୨ ଫୁଟ୍ ଥିବାରୁ ଏହି ଦାବିକୁ ପୋଲିସ ସନ୍ଦେହ କରି ତଦନ୍ତ ଜୋରଦାର କରିଥିଲା।
ତଦନ୍ତରେ ଜଣାପଡ଼ିଛି ଯେ, ଘଟଣା ଦିନ ସେକାପ୍ପା ଓ ବିଜୟଲକ୍ଷ୍ମୀଙ୍କ ମଧ୍ୟରେ ପାରିବାରିକ ବିବାଦ ହୋଇଥିଲା। ଅଭିଯୋଗ ଅନୁସାରେ, ରାଗରେ ବିଜୟଲକ୍ଷ୍ମୀ ପ୍ରଥମେ ଶିଶୁଟିକୁ ଗୋଇଠା ମାରିଥିଲେ। ଶିଶୁଟି କାନ୍ଦିବାରୁ ସେକାପ୍ପା ଆହୁରି ଉତ୍ତେଜିତ ହୋଇ ତାକୁ ଜୋରରେ ତଳକୁ କଚାଡ଼ି ଦେଇଥିଲେ, ଫଳରେ ତା’ର ମୃତ୍ୟୁ ଘଟିଥିଲା। ପଡ଼ୋଶୀଙ୍କ ସହ ବିଜୟଲକ୍ଷ୍ମୀଙ୍କ କଥିତ ସମ୍ପର୍କକୁ ନେଇ ପାରିବାରିକ କଳହ ହୋଇଥିବା ନେଇ ପୋଲିସ ସନ୍ଦେହ କରୁଛି। ଉଭୟ ଅଭିଯୁକ୍ତଙ୍କୁ ଗିରଫ କରାଯାଇଥିବା ବେଳେ ଘଟଣାର ତଦନ୍ତ ଜାରି ରହିଛି।
