ପବନ କଲ୍ୟାଣଙ୍କୁ ଆକ୍ଷେପ କରି ଫସିଲେ ୟୁଟ୍ୟୁବର, ୫ ଦିନରେ ୫ ଥର ଗିରଫକୁ ନେଇ ବଢ଼ିଲା ବିବାଦ
ଆନ୍ଧ୍ରପ୍ରଦେଶର ଜଣାଶୁଣା ୟୁଟ୍ୟୁବର ବାଚାଲାକୁରୀ ଜୋସେଫ୍ ଓରଫ୍ ‘ପ୍ରଶ୍ନ ରାବଣ’ଙ୍କ ଗିରଫକୁ ନେଇ ରାଜ୍ୟରେ ରାଜନୈତିକ ଓ ଆଇନଗତ ବିବାଦ ଜୋର ଧରିଛି। ଏଲୁରୁରେ ଆୟୋଜିତ ଏକ ସଭାରେ ଉପ-ମୁଖ୍ୟମନ୍ତ୍ରୀ ପବନ କଲ୍ୟାଣ ଓ ତାଙ୍କ ପରିବାର ସମ୍ପର୍କରେ କଥିତ ଅପମାନଜନକ ମନ୍ତବ୍ୟ ଦେବା ପରେ ତାଙ୍କ ବିରୋଧରେ ବିଭିନ୍ନ ଜିଲ୍ଲାରେ ଏକାଧିକ ମାମଲା ରୁଜୁ ହୋଇଥିଲା। ଏହାପରେ ଗତ ଜୁନ୍ ୩୦ରେ ହାଇଦ୍ରାବାଦରୁ ତାଙ୍କୁ ଗିରଫ କରାଯାଇଥିଲା।
ଜୁଲାଇ ୧ରେ ଏକ ମାମଲାରେ ଜାମିନ ମିଳିଥିଲେ ମଧ୍ୟ, ପୋଲିସ ଟ୍ରାଞ୍ଜିଟ୍ ୱାରେଣ୍ଟ ଆଧାରରେ ଲଗାତାର ଅନ୍ୟ ମାମଲାରେ ତାଙ୍କୁ ୫ ଦିନ ମଧ୍ୟରେ ୫ ଥର ଗିରଫ କରିଛି। ପରେ କ୍ରିଷ୍ଣା ଜିଲ୍ଲାର ଗନ୍ନାଭରମ୍ ପୋଲିସ ଏକ ନୂଆ ମାମଲାରେ ବେଆଇନ କାର୍ଯ୍ୟକଳାପ (ନିବାରଣ) ଆଇନ (ୟୁଏପିଏ)ର ବିଭିନ୍ନ ଧାରା ଯୋଡ଼ିଥିଲା। ଜୁଲାଇ ୬ରେ କୋର୍ଟ ତାଙ୍କୁ ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇବା ପରେ ନେଲୋର କେନ୍ଦ୍ରୀୟ କାରାଗାରକୁ ସ୍ଥାନାନ୍ତର କରାଯାଇଛି।
ପୋଲିସର ଅଭିଯୋଗ ଅନୁସାରେ, ପ୍ରଶ୍ନ ରାବଣ ନିଜ ୟୁଟ୍ୟୁବ୍ ଚ୍ୟାନେଲ୍ରେ ନିଷିଦ୍ଧ ସିପିଆଇ (ମାଓବାଦୀ) ସଂଗଠନକୁ ପ୍ରଶଂସା କରିବା ସହ ଉଗ୍ରବାଦୀ ଚିନ୍ତାଧାରାକୁ ପ୍ରୋତ୍ସାହନ ଦେଉଥିବା ଭିଡିଓ ପ୍ରସାରଣ କରୁଥିଲେ। ଏହି ଅଭିଯୋଗକୁ ନେଇ ପୋଲିସ ଅଧିକ ତଦନ୍ତ ପାଇଁ ତାଙ୍କୁ ରିମାଣ୍ଡରେ ନେବାକୁ କୋର୍ଟରେ ଆବେଦନ କରିଛି। ଅନ୍ୟପକ୍ଷରେ, ତାଙ୍କ ଓକିଲ ଏହାକୁ ବାକ୍ ସ୍ୱାଧୀନତା ଉପରେ ଆକ୍ରମଣ ବୋଲି ଦର୍ଶାଇଛନ୍ତି। ୱାଇଏସଆର କଂଗ୍ରେସ ପକ୍ଷରୁ ତାଙ୍କୁ ଆଇନଗତ ସହାୟତା ଦେବାକୁ ଘୋଷଣା କରାଯାଇଥିବା ବେଳେ ଅଭିନେତା ପ୍ରକାଶ ରାଜ ମଧ୍ୟ ବାରମ୍ବାର ଗିରଫକୁ ନେଇ ପ୍ରଶ୍ନ ଉଠାଇଛନ୍ତି। ସେପଟେ ପବନ କଲ୍ୟାଣ କହିଛନ୍ତି, ଗଣତନ୍ତ୍ରରେ ସମାଲୋଚନାର ସ୍ଥାନ ରହିଛି, କିନ୍ତୁ ବ୍ୟକ୍ତିଗତ ଆକ୍ଷେପ ଓ ପରିବାରକୁ ଅପମାନ କରିବା କୌଣସି ପରିସ୍ଥିତିରେ ଗ୍ରହଣଯୋଗ୍ୟ ନୁହେଁ।
