୨୨ ଘଣ୍ଟା ପରେ ମାଲ୍ୟଗିରି ପାହାଡ଼ରୁ ଉଦ୍ଧାର ହେଲେ ୩ ଯୁବକ; ବାଟବଣା ହୋଇ ଫସି ରହିଥିଲେ
ଅନୁଗୋଳ: ଅନୁଗୋଳ ଜିଲ୍ଲା ପାଲଲହଡାର ମାଲ୍ୟଗିରି ପାହାଡ଼ରେ ବାଟବଣା ହୋଇ ଫସି ରହିଥିବା ୩ ଜଣ ଯୁବକଙ୍କୁ ପ୍ରାୟ ୨୨ ଘଣ୍ଟାର ରେସ୍କ୍ୟୁ ଅପରେସନ୍ ପରେ ଅଗ୍ନିଶମ ବାହିନୀ ସୁରକ୍ଷିତ ଭାବେ ଉଦ୍ଧାର କରିଛି। ଉଦ୍ଧାର ହୋଇଥିବା ଯୁବକମାନେ କେନ୍ଦୁଝର ଜିଲ୍ଲାର ଘନାଶ୍ୟାମ ପାତ୍ର, ଅନନ୍ତ ମୁଣ୍ଡା ଓ ପଦ୍ମିନ ମହାନ୍ତ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ବୁଧବାର କେନ୍ଦୁଝରର ୧୩ ଜଣ ଯୁବକ ମାଲ୍ୟଗିରି ପାହାଡ଼ ବୁଲିବାକୁ ଯାଇଥିଲେ। ଫେରିବା ବେଳେ ୬ ଜଣ ପ୍ରଥମେ ତଳକୁ ଆସିଥିବା ବେଳେ ପରେ ଆଉ ୪ ଜଣ ସୁରକ୍ଷିତ ଭାବେ ଓହ୍ଲାଇ ଆସିଥିଲେ। କିନ୍ତୁ ଅବଶିଷ୍ଟ ୩ ଜଣ ଯୁବକ ପାହାଡ଼ର ଉପର ଅଞ୍ଚଳକୁ ଚଢ଼ି ଯାଇ ବାଟବଣା ହୋଇଯାଇଥିଲେ। ଅନ୍ଧାର ହୋଇଯିବାରୁ ସେମାନେ ତଳକୁ ଫେରିପାରିନଥିଲେ।
ଖବର ପାଇ ପାଲଲହଡା ଅଗ୍ନିଶମ ବାହିନୀ ତୁରନ୍ତ ଖୋଜାଖୋଜି ଅଭିଯାନ ଆରମ୍ଭ କରିଥିଲା। ଦୀର୍ଘ ୨୨ ଘଣ୍ଟାର ଉଦ୍ୟମ ପରେ ଗୁରୁବାର ସମସ୍ତ ୩ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ସେମାନଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ଥିବା ସୂଚନା ମିଳିଛି। ଏହି ଘଟଣା ପରେ ପାହାଡ଼ିଆ ଅଞ୍ଚଳକୁ ଯିବାବେଳେ ସତର୍କତା ଅବଲମ୍ବନ କରିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି।
