ଯୁଦ୍ଧ ଆଶଙ୍କା ମଧ୍ୟରେ କମିଲା ସୁନା ଦର! ଜାଣନ୍ତୁ କେବେ କିଣିଲେ ମିଳିବ ଅଧିକ ଫାଇଦା
ଭୁବନେଶ୍ୱର: ବିଶ୍ୱରେ ଯୁଦ୍ଧ ଆଶଙ୍କା ବଢ଼ୁଥିବା ସତ୍ତ୍ୱେ ସୁନା ବଜାରରେ ଦେଖାଯାଇଛି ଏକ ଅପ୍ରତ୍ୟାଶିତ ପରିବର୍ତ୍ତନ। ସାଧାରଣତଃ ଯୁଦ୍ଧ କିମ୍ବା ବିଶ୍ୱସ୍ତରୀୟ ଅସ୍ଥିରତା ସମୟରେ ନିବେଶକମାନେ ସୁନାକୁ ସବୁଠାରୁ ସୁରକ୍ଷିତ ନିବେଶ ବୋଲି ମନେ କରିଥାନ୍ତି, ଯାହା ଫଳରେ ସୁନା ଦର ବୃଦ୍ଧି ପାଏ। କିନ୍ତୁ ଏଥର ଚିତ୍ର ସମ୍ପୂର୍ଣ୍ଣ ଭିନ୍ନ। ଜୁଲାଇ ୯ରେ ଅନ୍ତର୍ଜାତୀୟ ବଜାର କୋମେକ୍ସ (COMEX)ରେ ସୁନା ଦର ପ୍ରାୟ ୦.୩୭ ପ୍ରତିଶତ ହ୍ରାସ ପାଇ ୪,୦୬୭ ଡଲାରରେ ପହଞ୍ଚିଛି। ଭାରତୀୟ ବଜାରରେ ମଧ୍ୟ ୧୦ ଗ୍ରାମ ସୁନାର ଦର ପ୍ରାୟ ୧.୪୩ରୁ ୧.୪୪ ଲକ୍ଷ ଟଙ୍କା ମଧ୍ୟରେ ରହିଥିବା ବେଳେ ରୁପାର ଦର କିଲୋ ପିଛା ୨.୨୩ ଲକ୍ଷ ଟଙ୍କାକୁ ଖସିଛି।
ମଧ୍ୟପ୍ରାଚ୍ୟରେ ବଢ଼ୁଥିବା ଉତ୍ତେଜନା ଏବଂ ଆମେରିକା-ଇରାନ ସମ୍ପର୍କକୁ ନେଇ ବିଶ୍ୱ ବଜାରରେ ଅନିଶ୍ଚିତତା ଦେଖାଦେଇଛି। ଆମେରିକାର ନୀତିଗତ ପଦକ୍ଷେପ ପରେ ଯୁଦ୍ଧ ଆଶଙ୍କା ବଢ଼ିଥିଲେ ମଧ୍ୟ ଏହାର ପ୍ରଭାବ ସୁନା ଦର ଉପରେ ସାଧାରଣ ଧାରାଠାରୁ ଭିନ୍ନ ରହିଛି। ବିଶେଷଜ୍ଞଙ୍କ ମତରେ ଡଲାରର ସ୍ଥିତି, ସୁଧ ହାର ନୀତି ଏବଂ ବିଶ୍ୱ ବଜାରର ଅନ୍ୟାନ୍ୟ ଆର୍ଥିକ ସଙ୍କେତ ଯୋଗୁଁ ସୁନା ଦର ଉପରେ ଚାପ ସୃଷ୍ଟି ହୋଇଛି।
ବଜାର ବିଶେଷଜ୍ଞମାନଙ୍କ କହିବା ଅନୁଯାୟୀ, ଦୀର୍ଘମିଆଦି ନିବେଶ କିମ୍ବା ଆଗାମୀ ବିବାହ ଋତୁକୁ ଦୃଷ୍ଟିରେ ରଖି ସୁନା କିଣିବାକୁ ଚାହୁଁଥିବା ଲୋକଙ୍କ ପାଇଁ ବର୍ତ୍ତମାନର ଦର ଏକ ଭଲ ସୁଯୋଗ ହୋଇପାରେ। ତେବେ ଆଗାମୀ ଦିନରେ ଆମେରିକାର ସୁଧ ହାର ନିଷ୍ପତ୍ତି, ଡଲାରର ଗତିବିଧି ଏବଂ ମଧ୍ୟପ୍ରାଚ୍ୟର ପରିସ୍ଥିତି ଉପରେ ସୁନା ଦର ନିର୍ଭର କରିବ। ତେଣୁ ବଡ଼ ନିବେଶ ପୂର୍ବରୁ ବଜାରର ସଦ୍ୟତମ ସ୍ଥିତି ଉପରେ ନଜର ରଖିବା ଏବଂ ପର୍ଯ୍ୟାୟକ୍ରମେ ସୁନା କିଣିବା ବୁଦ୍ଧିମାନ ପଦକ୍ଷେପ ହେବ।
ତେବେ ଆଜି ଭୁବନେଶ୍ୱରରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ପାଇ ୧,୪୩,୧୨୦ ଟଙ୍କା ରହିଥିବା ବେଳେ ଯାହା ଗତକାଲି ୧୦ ଗ୍ରାମ ପ୍ରତି ୧,୪୫,୨୫୦ ଟଙ୍କା ରହିଥିଲା। ଯାହାର ଅର୍ଥ ହେଉଛି, ପୂର୍ବ ଦିନ ତୁଳନାରେ, ସହରରେ ସୁନାର ମୂଲ୍ୟ ପ୍ରତି ୧୦ ଗ୍ରାମ ପାଇଁ ପ୍ରାୟ ୨,୧୩୦ ଟଙ୍କା ହ୍ରାସ ପାଇଛି।
