ରୋହିତଙ୍କ ସପକ୍ଷରେ ପାକିସ୍ତାନର ପୂର୍ବତନ ୱିକେଟକିପର! “ଲର୍ଡ୍ସରେ ରୋହିତଙ୍କ ଶତକ ହିଁ ସବୁ ପ୍ରଶ୍ନର ଉତ୍ତର’: କାମରାନ ଆକମଲ
ନୂଆଦିଲ୍ଲୀ: ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଚାଲିଥିବା ଚର୍ଚ୍ଚା ମଧ୍ୟରେ ପାକିସ୍ତାନର ପୂର୍ବତନ ୱିକେଟକିପର-ବ୍ୟାଟର କାମରାନ ଆକମଲ ଭାରତୀୟ କ୍ରିକେଟ ତାରକାଙ୍କ ସମର୍ଥନରେ ବଡ଼ ବୟାନ ଦେଇଛନ୍ତି। ଲର୍ଡ୍ସରେ ଇଂଲଣ୍ଡ ବିପକ୍ଷ ତୃତୀୟ ଦିନିକିଆରେ ରୋହିତ ଖେଳିଥିବା ୧୩୮ ରନ୍ର ଶତକୀୟ ଇନିଂସକୁ ସେ ‘ଷ୍ଟେଟମେଣ୍ଟ ଇନିଂସ’ ବୋଲି ବର୍ଣ୍ଣନା କରିଛନ୍ତି। ତାଙ୍କ ମତରେ, ବ୍ୟାଟିଂର ଜବାବ ଦେଇ ରୋହିତ ନିଜ ଭବିଷ୍ୟତକୁ ନେଇ ଚାଲିଥିବା ସମସ୍ତ ଆଲୋଚନା ସମାଲୋଚନାର ଅବସାନ ଘଟାଇଛନ୍ତି।
‘ଦ ଗେମ୍ ପ୍ଲାନ୍’ ଏକ ପଡକାଷ୍ଟରେ କାମରାନ ଆକମଲ କହିଛନ୍ତି, ଇଂଲଣ୍ଡ ସିରିଜ ଜିତିବାର ଯୋଗ୍ୟ ଥିଲେ ମଧ୍ୟ ମ୍ୟାଚ୍ର ସବୁଠୁ ବଡ଼ ପ୍ରଦର୍ଶନ ଥିଲା ରୋହିତଙ୍କ ଶତକ। ସେ କହିଛନ୍ତି, ରୋହିତଙ୍କୁ ନେଇ ବହୁ ପ୍ରକାର ଚର୍ଚ୍ଚା ହେଉଥିଲା ଏବଂ ୨୦୨୭ ବିଶ୍ୱକପ୍ ଯୋଜନାରେ ସେ ନାହାନ୍ତି ବୋଲି ଗୁଜବ ମଧ୍ୟ ପ୍ରଚାର ହେଉଥିଲା। କିନ୍ତୁ ଲର୍ଡ୍ସରେ ତାଙ୍କ ବ୍ୟାଟିଂ ସେହି ସମସ୍ତ ପ୍ରଶ୍ନର ସ୍ପଷ୍ଟ ଉତ୍ତର ଦେଇଛି। ଆକମଲ ଆହୁରି କହିଛନ୍ତି, ରୋହିତ ଓ ବିରାଟ କୋହଲିଙ୍କ ପରି ମହାନ ଖେଳାଳିଙ୍କୁ ଏପରି ସ୍ୱାଭାବିକ ଭାବେ ଚର୍ଚ୍ଚା ନୁହେଁ ବରଂ ପଡ଼ିଆରେ ସେମାନଙ୍କ ପ୍ରଦର୍ଶନ ଆଧାରରେ ବିଚାର କରାଯିବା ଉଚିତ।
ଭାରତର ବୋଲିଂ ପ୍ରଦର୍ଶନକୁ ନେଇ ମଧ୍ୟ ଆକମଲ ସମାଲୋଚନା କରିଛନ୍ତି। ପ୍ରସିଦ୍ଧ କୃଷ୍ଣ, ଅର୍ଶଦୀପ ସିଂହ ଓ ଗୁରନୂର ବ୍ରାର ଅଧିକ ରନ୍ ବ୍ୟୟ କରିଥିବାରୁ ଦଳ ଚାପରେ ପଡ଼ିଥିଲା ବୋଲି ସେ କହିଛନ୍ତି। କୁଲଦୀପ ଯାଦବଙ୍କୁ ଚୂଡ଼ାନ୍ତ ଏକାଦଶରେ ନ ରଖିବାକୁ ମଧ୍ୟ ସେ ଭୁଲ୍ ବୋଲି ଦର୍ଶାଇଛନ୍ତି। ତାଙ୍କ ମତରେ, ଡେଥ୍ ଓଭରରେ ଭାରତୀୟ ବୋଲରମାନେ ୮୦ରୁ ଅଧିକ ରନ୍ ଦେଇଥିବାରୁ ଇଂଲଣ୍ଡ ୩୮୭ ରନ୍ର ବଡ଼ ସ୍କୋର କରିଥିଲା। ଜବାବରେ ରୋହିତଙ୍କ ଶତକ ଓ ବିରାଟଙ୍କ ଅର୍ଦ୍ଧଶତକ ସତ୍ତ୍ୱେ ଭାରତ ୩୬୦/୭ରେ ସୀମିତ ରହି ୨୭ ରନ୍ରେ ମ୍ୟାଚ୍ ସହ ୨-୧ରେ ସିରିଜ ହାରିଥିଲା।
